Mateyu 24:1-51

  • CHISIMIKIZU CHA KUŴAPU KWAKU KHRISTU (1-51)

    • Nkhondu, nja, vidilirisi (7)

    • Uthenga wamampha wazamupharazgika (14)

    • Chisuzgu chikulu (21, 22)

    • Chisimikizu cha Mwana wa munthu (30)

    • Chimiti cha mkuyu (32-34)

    • Nge mazuŵa ngaku Nowa (37-39)

    • Lutirizgani kuja masu (42-44)

    • Kapolu wakugomezgeka kweniso kapolu muheni (45-51)

24  Sonu pa nyengu yo Yesu watuwanga kunyumba yakusopiyamu, akusambira ŵaki anguza kwaku iyu kuti amulongo nyumba yosi yakusopiyamu.  Iyu wanguŵakambiya kuti: “Kumbi mutiviwona cha vinthu vosi venivi? Nditikuneneskiyani, palivi mwa panu wo ulekekengi pachanya pa unyaki kwambula kuwisikiya pasi.”  Pa nyengu yo Yesu wenga pa Phiri la Maolivi, akusambira ŵaki anguza kwaku iyu ndi kumufumba kwakuŵija kuti: “Tikambiyeni, kumbi vinthu venivi vichitikengi zuŵanji, ndipu chisimikizu cha kuŵapu kwinu* kweniso cha kumala kwa mugonezi,* ntchinthu wuli?”  Yesu wanguŵamuka kuti: “Tcheŵani kuti ŵanthu aleki kukulandizgani,  chifukwa anandi azengi mu zina langu ndi kukamba kuti, ‘Ini ndini Khristu,’ ndipu azamulandizga ŵanthu anandi.  Mwazamukuvwa viwawa vankhondu kweniso mbiri zankhondu. Mungaziwopanga cha chifukwa vinthu ivi vitenere kuchitika, kweni umaliru wazamuja kuti wechendazi.  “Pakuti mtundu wazamuyukiyana ndi mtundu unyaki, ufumu ndi ufumu unyaki, ndipu kwazamuja nja ndi vidilirisi mumalu ngakupambanapambana.  Vosi ivi vazamuja kwamba ŵaka kwa maurwirwi.  “Ŵanthu azakukuperekani kuti mutombozgeki ndi kukubayani ndipu mwazamutinkhika ndi mitundu yosi ya ŵanthu chifukwa cha zina langu. 10  Ndipuso ŵanthu anandi azamuguŵa, azamuperekana ndi kutinkhana. 11  Kwazamubuka achimi aboza anandi ndipu azamulandizga ŵanthu anandi; 12  ndipuso chifukwa chakuti ŵanthu anandi azamuleka kuvwiya marangu, chanju cha anandi chazamuzizira. 13  Kweni yo wazamukunthiyapu mpaka pakumaliya, wazamutaskika. 14  Ndipu uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi. 15  “Mwaviyo, asani mwaziwona kuti chawuyu chakusakaza cho chingukambika ndi mchimi Daniyeli chama mumalu ngakupaturika (wakuŵerenga wawemu), 16  ndikuti wo ŵe mu Yudeya, ayambi kuthaŵiya kumapiri. 17  Munthu yo we pachanya pa nyumba waleki kusika kuti wakato katundu munyumba yaki, 18  kweniso munthu yo we kumunda waleki kuwere kunyumba kuti wakato laya laki lakubwalu. 19  Soka kwa anthukazi anthumbu kweniso wo azamuja kuti atonkhesa ŵana mu mazuŵa ngo! 20  Lutirizgani kupemphera kuti kuthaŵa ko, kuleki kuzichitika mu chipwepwi pamwenga pa zuŵa la Sabata; 21  chifukwa pa nyengu yo, kwazamukuŵa chisuzgu chikulu cho chechendachitikepu kutuwa po charu chikulengeke mpaka sonu, ndipu chazamuchitikapu so cha. 22  Kukamba uneneska, kwambula kudumulizga mazuŵa ngo palivi munthu yo watingi wazitaskikengi, kweni chifukwa cha akusankhika, mazuŵa ngo ngazamudumulizgika. 23  “Ndipu asani munthu munyaki wazakukukambiyani kuti, ‘Awonani! Khristu we kunu,’ pamwenga, ‘We kuwa!’ mungazigomezganga cha. 24  Chifukwa ŵanthu akujidana kuti Khristu ndipuso achimi aboza azamubuka ndi kuchita visimikizu vikulu kweniso vakuziziswa kuti alandizgi ŵanthu, ndipu asani nkhwamachitika alandizgi chinanga mbakusankhika. 25  Awonani! ndakutcheŵeskiyani limu. 26  Mwaviyo, asani ŵanthu atikukambiyani kuti, ‘Awonani! We muchipululu,’ mungazilutangaku cha; asani atikukambiyani so kuti, ‘Awonani! We muvipinda vamukati,’ mungaziŵagomezganga cha. 27  Chifukwa nge mo limphezi ling’animiya kutuwa kuvuma mpaka kuzambwi, ndimu so kuŵapu* kwa Mwana wa munthu kwazamuŵiya. 28  Kweniso kwekosi ko kwafwiya chinthu, nkhwazi ziwungana kweniko. 29  “Asani chisuzgu chikulu cha mu mazuŵa ngo chazimala ŵaka, lumwi lazamuchita mdima, mwezi wazamuŵala cha, nyenyezi zazamumbotoka kutuwa kuchanya, ndipu nthazi ya vinthu vakuchanya yazamusukunyika. 30  Ndipu pavuli paki, chisimikizu cha Mwana wa munthu chazamuwoneka kuchanya, mafuku ngosi nga ŵanthu pacharu chapasi ngazakujipuma pachifuŵa chifukwa cha chitima, kweniso azamuwona Mwana wa munthu wachiza mu mitambu yakuchanya ndi nthazi ndipuso unkhankhu ukulu. 31  Ndipu wazamutuma angelu ŵaki ndi mbata* yikulu, ndipu azamuwunganiska akusankhika kutuliya ku mphepu zosi zinayi, kwamba kuvigoti va kuchanya mpaka kuvigoti vinyaki va kuchanya. 32  “Sonu sambirani ku chimiti cha mkuyu: Asani mwawona ŵaka kuti mphanda zaki zachita liwondwi muziŵa kuti chifuku che pafupi. 33  Mwakuyanana ŵaka, asani mwaziwona vinthu vosi venivi, ziŵani kuti we pakhomu chayipu. 34  Nditikuneneskiyani kuti mugonezi uwu umalengepu cha mpaka po vinthu vosi ivi vachitikiya. 35  Kuchanya ndi charu chapasi vimalengi, kweni mazu ngangu ngamalengepu cha. 36  “Kweni va zuŵa pamwenga ora laki, palivi munthu yo waziŵa, chinanga mbangelu kuchanya pamwenga Mwana, kweni Ada pe ndiwu aziŵa. 37  Chifukwa nge mo venge mu mazuŵa ngaku Nowa, ndimu so kwazamuŵiya kuŵapu* kwa Mwana wa munthu. 38  Pakuti nge mo venge mu mazuŵa ngo, Chigumula chechendazi, ŵanthu aryanga ndi kumwa, anthulumi atonga, anthukazi ayirwanga mpaka pa zuŵa lo Nowa wanguselere muchingaraŵa, 39  yiwu anguziŵaku kanthu cha mpaka po Chigumula* chinguziya ndi kuŵapeye limu wosi, ndimu so kwazamuŵiya kuŵapu kwa Mwana wa munthu. 40  Pa nyengu yo, ŵanthu ŵaŵi azamuja kuti ŵe mumunda, yumoza wazamutoleka, ndipu munyaki wazamujowoleka. 41  Anthukazi ŵaŵi azamuja kuti apera pa chakuperiyapu chimoza, yumoza wazamutoleka, munyaki wazamujowoleka. 42  Mwaviyo, lutirizgani kuja masu chifukwa muziŵa cha zuŵa lo Ambuyamwi aziyengi. 43  “Kweni ziŵani fundu iyi: Asani mweneku wa nyumba waziŵanga nyengu ya usiku yo* munkhungu waziyengi, watingi wajengi masu kuti munkhungu waleki kuswa nyumba yaki. 44  Pa chifukwa chenichi, yimwi jani akunozgeka chifukwa Mwana wa munthu wazengi mu ora lo yimwi muleka kuŵanaŵanaku. 45  “Kumbi ndiyani yo ndi kapolu wakugomezgeka ndi wazeru, yo mbuyaki wakumuŵika kuti wawoneriyengi a munyumba yaki ndi kuŵapaska chakurya chawu pa nyengu yakwenere? 46  Ngwakutumbikika kapolu mweniyo mbuyaki wachiza watimusaniya wachichita venivi. 47  Nditikuneneskiyani kuti wazakumuŵika kuti waziwoneriyengi vinthu vaki vosi. 48  “Kweni asani kapolu muheni yo, wakamba mumtima mwaki kuti, ‘Ambuya aswera,’ 49  ndipu watamba kupuma akapolu anyaki, ndipuso waturya ndi kumwiya limoza ndi ŵanthu wo aziŵikiya limu kuti mbaloŵevu, 50  mbuya wa kapolu yo, wazengi mu zuŵa lo iyu waleka kuliŵanaŵaniya ndipuso mu ora lo waleka kuliziŵa. 51  Ndipu wazakumulanga ukongwa ndi kumuponya ko kwe akunyenga. Kweniko ndiku kwamuja kuliya ndi kukukuta minyu.

Mazu Ngam'mphata

Wonani Mazu ngo Ngakonkhoskeka.
Pamwenga kuti, “nyengu.” Wonani Mazu ngo Ngakonkhoskeka.
Wonani Mazu ngo Ngakonkhoskeka.
Anyaki akamba kuti, “lipenga.”
Wonani Mazu ngo Ngakonkhoskeka.
Anyaki akamba kuti, “Zandi.”
Mazu ngaki chayingu, “waziŵanga ulonda wo.”