Mateyu 23:1-39

  • Mungayezganga alembi ndi Afarisi cha (1-12)

  • Soka alembi ndi Afarisi (13-36)

  • Yesu waliriya Yerusalemu (37-39)

23  Sonu Yesu wangukambiya chigulu cha ŵanthu kweniso akusambira ŵaki kuti:  “Alembi ndi Afarisi ajijalika pampandu waku Mozesi.  Mwaviyo, vinthu vosi vo angakukambiyani muvichitengi ndi kuvilondo, kweni mungachitanga cha vo yiwu achita, pakuti yiwu achita vakupambana ndi vo akamba.  Amanga katundu muzitu ndi kumunyekeza pamapewa nga ŵanthu, kweni yiwu ŵeneku akhumba cha kumunderezga ndi chikumbu chawu.  Vosi vo achita, ativichita kuti ŵanthu aŵawoni, chifukwa akuzga timabokosi takuja ndi malemba to avwala nge ntchakuŵavikiliya, ndipuso atalikiska mphonji za malaya ngawu.  Yiwu atanja malu ngakuzirwa pa maphwandu, ndipuso mipandu yakunthazi* mumasinagogi.  Atanja so kuti ŵanthu aŵatawuzgengi mwaulemu mumisika kweniso kuti aŵadanengi kuti Rabi.*  Kweni yimwi mungadanikanga kuti Rabi cha, chifukwa Msambizi winu njumoza, ndipu mosi mwe abali.  Ndipuso mungadananga weyosi cha pacharu chapasi kuti ada, chifukwa Awusemwi mbamoza Wo ŵe kuchanya. 10  Mungadanikanga kuti alongozgi cha, chifukwa Mulongozgi winu njumoza, Khristu. 11  Kweni mura ukongwa pakati pinu, watenere kuja mteŵeti winu. 12  Weyosi yo watijikuzga wayuyulikengi, ndipu weyosi yo watijiyuyuwa, wakwezekengi. 13  “Soka alembi ndi Afarisi, akunyenga yimwi! chifukwa mujaliya ŵanthu khomu lakuselere mu Ufumu wakuchanya, pakuti yimwi mwaŵeni museremu cha, ndipu ŵanthu wo akhumba kuseremu mutiŵazomereza cha. 14  *—— 15  “Soka alembi ndi Afarisi, akunyenga yimwi! chifukwa mutenda mitunda yitaliyitali kweniso muyambuka nyanja kuching’anamuwa* munthu yumoza kuti wasere mugulu linu, ndipu asani wasere, mutimuchitiska kuŵa wakwenere Gehena,* ndipu watuŵa muheni ukongwa kuluska mwaŵeni. 16  “Soka yimwi alongozgi achibulumutiya, chifukwa mukamba kuti, ‘Asani munthu walapizga mwakuzumbuwa nyumba yakusopiyamu, palivi kanthu; kweni asani walapizga mwakuzumbuwa golidi wa munyumba yakusopiyamu, watenere kufiska vo walapizga.’ 17  Akupusa kweniso achibulumutiya yimwi! Kumbi chakukhumbika ukongwa ndi nichi, golidi pamwenga nyumba yakusopiyamu yo yachitiska kuti golidi yo waŵi wakupaturika? 18  Kweniso mukamba kuti, ‘Asani munthu walapizga mwakuzumbuwa malu ngakuperekiyapu sembi,* palivi kanthu; kweni asani walapizga mwakuzumbuwa chawanangwa cho che pamalu ngakuperekiyapu sembi,* watenere kufiska vo walapizga.’ 19  Achibulumutiya yimwi! Kumbi chakukhumbika ukongwa ndi nichi, chawanangwa pamwenga jotcheru lo lachitiska kuti chawanangwa cho chiŵi chakupaturika? 20  Mwaviyo, munthu weyosi yo walapizga mwakuzumbuwa malu ngakuperekiyapu sembi, walapizgiya malu ngakuperekiyapu sembi ndi vosi vo vilipu; 21  ndipu weyosi yo walapizga mwakuzumbuwa nyumba yakusopiyamu, walapizgiya nyumba yakusopiyamu yo ndi Mweniyo waja mwenimo. 22  Kweniso weyosi yo walapizga mwakuzumbuwa kuchanya, walapizgiya mpandu waufumu waku Chiuta ndipuso Mweniyo wajapu. 23  “Soka alembi ndi Afarisi, akunyenga yimwi! chifukwa mupereka vatchumi va minti, dilili ndi kamini,* kweni muleke dala vinthu vakukhumbika ukongwa va mu Dangu* nge urunji, lisungu ndi kugomezgeka. Mwakhumbikanga nadi kuchita vinthu ivi, kweni mwakhumbikanga cha kuleka vinthu vinyaki. 24  Alongozgi achibulumutiya yimwi! mumimita vakumwa vinu kuti mutuzgemu kachidononu kweni mumeza ngamila! 25  “Soka alembi ndi Afarisi, akunyenga yimwi! chifukwa musuka kubwalu kwa kapu ndipuso kwa mbali, kweni mukati mwaki mwazaza mbunu* kweniso kuleka kujiko. 26  Mfarisi wachibulumutiya yiwi, suka dankha mukati mwa kapu ndipuso mwa mbali kuti kubwalu naku kutowi. 27  “Soka alembi ndi Afarisi, akunyenga yimwi! chifukwa muyanana ndi miwunda yakupakika layimu, yo kubwalu yiwoneka yakutowa, kweni mukati mwazaza viwanga va ŵanthu akufwa kweniso vinthu vaukazuzi vakupambanapambana. 28  Mwakuyanana ŵaka, kubwalu muwoneka nge arunji, kweni mukati mwinu mwazaza chinyengu ndi kuleka kuvwiya marangu. 29  “Soka alembi ndi Afarisi, akunyenga yimwi! chifukwa muzenga miwunda ya achimi ndipuso mutowesa miwunda* ya ŵanthu arunji, 30  ndipu mukamba kuti, ‘Asani tengaku mu nyengu ya apapi ŵidu, tatingi tiwovyanengi nawu cha pakubaya achimi.’ 31  Mwaviyo, mutijisumuwa mwija kuti mwe ŵana a ŵanthu wo akubaya achimi. 32  Yiku malizani ntchitu zo* apapi ŵinu akwamba. 33  “Njoka yimwi, ŵana a njoka za poyizoni, muchithaŵengi wuli cheruzgu cha Gehena?* 34  Pa chifukwa chenichi, nditikutumiyani achimi, ŵanthu azeru ndipuso asambizi. Anyaki mwazakuŵabaya ndipuso mwazakuŵapayika pachimiti, anyaki mwazakuŵakwechuwa mumasinagogi nginu ndipuso mwazakuŵatombozga mumatawuni ngakupambanapambana, 35  kuti ndopa zosi za ŵanthu arunji zo zikudirika pacharu chapasi zizi paku yimwi, kwamba ndopa za munthu murunji Abelu, mpaka ndopa zaku Zekariya mwana waku Barakiya, yo mungumubayiya pakati pa malu ngakupaturika ndi malu ngakuperekiyapu sembi. 36  Nditikuneneskiyani, vinthu vosi ivi vichitikiyengi mugonezi uwu. 37  “Yerusalemu, Yerusalemu, wakubaya achimi ndipuso wakuponya mya ŵanthu wo angutumika kwaku yiwi! Kanandi ndakhumbanga kuwunganiska ŵana ŵaku nge mo nyakhutu wawunganiskiya ŵana ŵaki mumapapa ngaki! Kweni yiwi ungukana. 38  Awonani! Akujowoliyani nyumba yinu.* 39  Nditikukambiyani, kutuwa sonu mundiwonengi so cha mpaka po mwazamukambiya kuti, ‘Ngwakutumbikika yo watuza mu zina laku Yehova!’”

Mazu Ngam'mphata

Pamwenga kuti, “yakuzirwa.”
Pamwenga kuti, “Msambizi.”
Wonani mazu ngamumphata pa Mateyu 17:21.
Pamwenga kuti, “kuchisintha.”
Wonani Mazu ngo Ngakonkhoskeka.
Pamwenga kuti, “jotcheru.”
Pamwenga kuti, “pajotcheru.”
Minti, dilili kweniso kamini, ndi vinthu vakusazga ku chakurya kuti chinowi ndi kununkhira.
Wonani Mazu ngo Ngakonkhoskeka.
Pamwenga kuti, “mwazaza vinthu vo mwalonda mwambunu.”
Pamwenga kuti, “miwunda yachikumbusu.”
Mazu ngaki chayingu, “Yiku zazani mwesu wo.”
Wonani Mazu ngo Ngakonkhoskeka.
Panyaki kuti, “Akulekiyani nyumba yinu ye mahami.”