Mateyu 17:1-27

  • Yesu wasambuka (1-13)

  • Chivwanu cha nge kanje ka kamganji (14-21)

  • Nyifwa yaku Yesu yikambikiya so limu (22, 23)

  • Kulipira msonkhu ndi ndalama yakutuliya mumulomu mwa somba (24-27)

17  Pati pajumpha mazuŵa 6, Yesu wanguto Peturo, Yakobe ndi mvurwa waki Yohane ndipu wanguluta nawu paphiri litali kwakuŵija.  Iyu wangusambuka yiwu achilereska. Chisku chaki chingugabuka nge lumwi, malaya ngaki ngakubwalu nganguŵala* ukongwa nge ukweru.  Ndipu awonani! Mozesi ndi Eliya anguŵawoneke penipo, ndipu akambiskananga ndi Yesu.  Pavuli paki, Peturo wangukambiya Yesu kuti: “Ambuya, mwachita umampha kuza nasi kunu. Asani mukhumba, ndingajintha mahema ngatatu panu, limoza linu, limoza laku Mozesi ndipu linyaki laku Eliya.”  Peturo weche kulongoro, mtambu wakuŵala unguŵabenekere ndipu awonani! mumtambu wo mungutuwa mazu ngakuti: “Uyu ndi Mwana wangu, mweniyo nditimuyanja, yo watindikondwesa. Muvwiyeni.”  Akusambira ŵati avwa mazu ngo, anguwa kavunama ndipu angutenthema ukongwa.  Sonu Yesu wanguza pafupi ndi kuŵakwaska ndipu wanguti: “Sokani. Mungawopanga cha.”  Ŵati ayunuka, anguwonapu munthu weyosi cha, kweni Yesu pe.  Achisika muphiri, Yesu wanguŵalamula kuti: “Mungakambiyanga munthu weyosi cha chiwona ichi, mpaka po Mwana wa munthu wayuskikiya.” 10  Kweni akusambira ŵaki angumufumba kuti: “Nanga ntchifukwa wuli alembi akamba kuti Eliya watenere kuza dankha?” 11  Iyu wangumuka kuti: “Eliya wazengi nadi ndipu wazamuweziyapu vinthu vosi. 12  Kweni nditikukambiyani kuti Eliya wakuza kali, ndipu angumuziŵa cha kweni angumuchitiya vinthu viheni vosi vo akhumbanga. Mwakuyanana ŵaka, Mwana wa munthu wazamutombozgeka mu manja mwawu.” 13  Sonu akusambira ŵaki anguwamu kuti wakambanga nawu vakukwaskana ndi Yohane Mubatizi. 14  Ŵati afika pafupi ndi chigulu cha ŵanthu, munthu munyaki wanguza kwaku Yesu, wangumugwadiya ndipu wangukamba kuti: 15  “Ambuya mulengiyeni lisungu mwana wangu, chifukwa we ndi vizilirisi ndipu watama ukongwa. Kanandi watuwa pamotu ndipuso kanandi watuwa mumaji. 16  Ndinguza nayu kwa akusambira ŵinu kweni atondeka kumuchizga.” 17  Pakumuka, Yesu wanguŵakambiya kuti: “Hate! mugonezi wambula chivwanu ndipuso wakunyongoroka uwu, kumbi ndilutirizgengi kuŵa namwi mpaka zuŵanji? Kumbi ndikunthiyengepu namwi mpaka zuŵanji? Zani nayu kunu.” 18  Sonu Yesu wanguchenya chiŵanda cho ndipu chingutuwa mwaku iyu, viyo mnyamata yo wanguchira pa ora lenilo. 19  Akusambira ŵaki anguza kwaku iyu kumphepeti ndi kumufumba kuti: “Ntchifukwa wuli isi tatondeka kutuzga chiŵanda chiya?” 20  Iyu wanguŵakambiya kuti: “Ntchifukwa chakuti mwe ndi chivwanu chimana. Nditikuneneskiyani, asani mungaŵa ndi chivwanu, chinanga chingaŵa chimana nge kanje ka kamganji, mwazamukambiya phiri ili kuti, ‘Tuwapu yapa, uluti pa,’ ndipu lazamutuwapu. Palivi cho mwazamutondeka kuchita.” 21  *⁠—— 22  Yesu wanguwunganiska akusambira ŵaki ku Galileya ndipu wanguŵakambiya kuti: “Mwana wa munthu waperekekengi mu manja mwa ŵanthu. 23  Yiwu amubayengi ndipu pa zuŵa lachitatu wazamuyuskika.” Ndipu akusambira ŵaki anguchita chitima ukongwa. 24  Ŵati afika ku Kaperenao ŵanthu akusonkhesa msonkhu wa madirakima ngaŵi anguza kwaku Peturo ndi kumufumba kuti: “Kumbi msambizi winu wapereka msonkhu wa madirakima ngaŵi?” 25  Iyu wangukamba kuti: “Hinya wapereka.” Kweni wati wasere munyumba Yesu ndiyu wangwamba kulongoro nayu kuti: “Uwona wuli Simoni? Kumbi mafumu nga charu ngalonde kwakayani ndalama za misonkhu yakupambanapambana? Ku ŵana ŵawu pamwenga ku ŵanthu aŵaka?” 26  Iyu wati wamuka kuti: “Ku ŵanthu aŵaka,” Yesu wangumukambiya kuti: “Uneneska nadi, ndikuti ŵana atenere cha kupereka msonkhu. 27  Kweni kuti tileki kuŵaguŵiska, uluti kunyanja ukaponyi mbeja ndipu ukato somba yakwamba yo wamungata ndipu asani wachiyipambawuwa kumulomu, wamusaniyamu ndalama yasiliva.* Sonu ukato yeniyo, ukalipiriyi msonkhu wangu ndi waku.”

Mazu Ngam'mphata

Pamwenga kuti, “nganguŵa ngatuŵa.”
Mazu nga pa vesi ili ngasanirika mu Mabayibolu nganyaki, kweni mulivi mumipukutu yakali ya Chigiriki yo yiziŵika umampha.
Mazu ngaki chayingu, “siteta yasiliva.” Yikwana madirakima nganayi.