Mateyu 12:1-50

  • Yesu ndi “Mbuya wa Sabata” (1-8)

  • Munthu wakufwa janja wachizgika (9-14)

  • Mteŵeti yo Chiuta watimuyanja (15-21)

  • Viŵanda vituzgika ndi nthazi ya mzimu wakupaturika (22-30)

  • Ubudi wambula kugowokereka (31, 32)

  • Chimiti chiziŵika ndi vipasu vaki (33-37)

  • Chisimikizu chaku Yona (38-42)

  • Asani mzimu uheni wawere mu munthu (43-45)

  • Anyina aku Yesu ndi avurwa ŵaki (46-50)

12  Nyengu yinyaki, Yesu wajumphanga mumunda wa tirigu pa zuŵa la Sabata. Akusambira ŵaki anguvwa nja ndipu angwamba kupuluwa tirigu ndi kurya.  Afarisi ŵati awona venivi angumukambiya kuti: “Wona! Akusambira ŵaku achita vinthu vambula kwenere kuchitika pa zuŵa la Sabata.”  Iyu wanguŵamuka kuti: “Kumbi mukuŵerenga cha vo Davidi wanguchita pa nyengu yo iyu ndi ŵanthu wo wenga nawu anguvwa nja?  Kuti iyu wangusere munyumba yaku Chiuta ndi kurya viŵandi vakulongo kwaku Chiuta, vo iyu wenga wakwenere cha kurya chinanga mbanthu wo wenga nawu, kweni asembi pe?  Pamwenga kumbi mukuŵerenga cha mu Dangu* kuti pa zuŵa la Sabata asembi agwira ntchitu kwambula kuswa dangu la zuŵa la Sabata?  Sonu nditikukambiyani kuti munthu munyaki wakukhumbika ukongwa kuluska nyumba yakusopiyamu, we panu.  Kweni asani mwaziŵanga vo mazu ngakuti, ‘Ndikhumba sembi cha kweni lisungu’ ngang’anamuwa, mphanyi mwaŵayeruzga cha ŵanthu ambula kunanga.  Chifukwa Mwana wa munthu ndiyu Mbuya wa Sabata.”  Wati watuwa penapa, wangusere musinagogi wawu, 10  ndipu mwenimo mwenga munthu wakufwa* janja. Sonu kuti amusaniriyi chifukwa, angumufumba kuti: “Kumbi ntchakwenere kuchizga pa zuŵa la Sabata?” 11  Iyu wanguŵakambiya kuti: “Asani mungaŵa ndi mbereri yimoza ndipu mbereri yo yawa muzenji pa zuŵa la Sabata, ndiyani waku yimwi wangaleka kuyiko ndi kuyituzga? 12  Kwe wuli munthu, pakuti ngwakuzirwa kuluska mbereri! Mwaviyo, mbumampha kuchita vinthu vamampha pa zuŵa la Sabata.” 13  Pavuli paki, wangukambiya munthu yo kuti: “Nyoloska janja laku.” Wangulinyoloska ndipu linguweriyamu umamphaumampha nge linyaki. 14  Kweni Afarisi angutuliya kubwalu ndipu anguchipangana kuti amubayi. 15  Yesu wati waziŵa venivi, wangutuwaku kweniko. Ŵanthu anandi angumulondo ndipu wanguŵachizga wosi, 16  kweni wanguŵakaniza mwanthazi kuti angamusumuwanga cha, 17  ndi chilatu chakuti vifiskiki vo vingukambikiya limu kuporote mwa mchimi Yesaya kuti: 18  “Awonani! Mteŵeti wangu yo ndasankha, wakwanjiwa wangu mweniyo watindikondwesa!* Ndiŵikengi mzimu wangu paku iyu ndipu wazamuchitiska kuti mitundu ya ŵanthu yiziŵi urunji chayiwu. 19  Wapindanengi ndi munthu cha pamwenga kudaniriza ndipu palivi munthu yo wavwengi mazu ngaki mumisewu yikuluyikulu. 20  Deti lakuphwanyika walivikitengi cha ndipuso chisunda chakusiwiriya wachizimwengi cha mpaka po wafiskiya urunji. 21  Nadi panu, mitundu yazamuja ndi chilindizga mu zina laki.” 22  Sonu ŵanthu anguza ndi munthulumi wachiŵanda, yo wenga wachibulumutiya kweniso wenga mbuwu ndipu wangumuchizga mwakuti wambuwu yo wangwamba kulongoro ndi kuwona. 23  Chigulu chosi cha ŵanthu chinguzizwa ndipu chingwamba kukamba kuti: “Kumbi wangaŵa Mwana waku Davidi cha uyu?” 24  Afarisi ati avwa viyo, angukamba kuti: “Munthu uyu watuzga viŵanda mu nthazi yinyaki yeyosi cha kweni yaku Belezebule,* mura wa viŵanda.” 25  Wati waziŵa maŵanaŵanu ngawu wanguŵakambiya kuti: “Ufumu wewosi wo ugaŵikana, ubwanganduka, ndipu tawuni yeyosi pamwenga nyumba yeyosi yo yigaŵikana, yikho cha. 26  Mwakuyanana ŵaka, asani Satana watuzga Satana, ndikuti wajigaŵa; sonu ufumu waki ungakho? 27  Ndipuso asani ini ndituzga viŵanda mu nthazi yaku Belezebule, nanga ŵana* ŵinu ativituzga mu nthazi yaku yani? Ndichu chifukwa chaki azamuja ŵeruzgi ŵinu. 28  Kweni asani ndituzga viŵanda mu nthazi ya mzimu waku Chiuta, ndikuti Ufumu waku Chiuta wakubuchizgani nadi. 29  Pamwenga munthu wangasere wuli munyumba ya munthu wanthazi ndi kulonda katundu waki kwambula kumumanga dankha munthu wanthazi yo? Pijapija asani wangamumanga ndipu wangalonda nyumba yaki. 30  Yo waleka kuŵa pamoza nani, wasuskana nani ndipu yo waleka kuwunjika nani, waparanya. 31  “Pa chifukwa chenichi, nditikukambiyani kuti munthu wangagowokereka ubudi wewosi pamwenga kunyoza kwamtundu wewosi, kweni yo wanyoza mzimu wazamugowokereka cha. 32  Mwakuyeruzgiyapu, munthu weyosi yo wanyoza Mwana wa munthu wagowokerekengi kweni weyosi yo wanyoza mzimu wakupaturika wagowokerekengi cha, mu mugonezi wunu kweniso wo utuza.* 33  “Muchitiska chimiti kuti chiŵi chamampha kweniso vipasu vaki kuti viŵi vamampha, pamwenga muchitiska chimiti kuti chiŵi chiheni kweniso vipasu vaki kuti viŵi viheni, chifukwa chimiti chiziŵika ndi vipasu vaki. 34  Ŵana a njoka yimwi! Mungakamba wuli vinthu vamampha penipo mwe aheni? Chifukwa mulomu ulongoro vo vazaza mumtima. 35  Munthu wamampha watuzga vinthu vamampha kutuliya mu chuma chaki chamampha, penipo munthu muheni watuzga vinthu viheni kutuliya mu chuma chaki chiheni. 36  Nditikukambiyani kuti pa Zuŵa la Cheruzgu, ŵanthu azamumbika mulandu pa vinthu viheni vevosi vo alongoro; 37  pakuti mwazamuyeruzgika kuti mwe arunji chifukwa cha mazu nginu kweniso mwazamuyeruzgika kuti mwe aheni chifukwa cha mazu nginu.” 38  Pakumumuka alembi ndi Afarisi anyaki angukamba kuti: “Msambizi, tikhumba kuti mutilongo chisimikizu chakulongo kuti Chiuta ndiyu wakukutumani.” 39  Pakuŵamuka wanguŵakambiya kuti: “Mugonezi uheni kweniso wachigololu* ulutirizga kupenja chisimikizu kweni palivi chisimikizu chinyaki cho upaskikengi kupatuwaku chaku Yona, mchimi. 40  Chifukwa nge mo Yona wangujaliya mumoyu mwa chisomba chikulu kwa mazuŵa ngatatu, msana ndi usiku, Mwana wa munthu nayu wazamuja mumtima wa charu kwa mazuŵa ngatatu, msana ndi usiku. 41  Ŵanthu a ku Nineve azamuyuka pa nyengu ya cheruzgu limoza ndi mugonezi uwu ndipu azakuwususka, chifukwa Yona wati waŵapharazgiya, angulapa. Kweni awonani! munthu munyaki wakuluska Yona we panu. 42  Fumukazi yakutuliya kumwera yiyuskikengi pa nyengu ya cheruzgu limoza ndi mugonezi uwu ndipu yazakuwususka, chifukwa yingutuwa kukumaliya kwa charu kuti yizivwi zeru zaku Solomoni. Kweni awonani! munthu munyaki wakuluska Solomoni we panu. 43  “Asani mzimu uheni watuwa mu munthu, ujumpha mumalu ngambula maji kupenjapenja malu ngakupumuliyapu kweni utingasaniya cha. 44  Sonu ukamba kuti, ‘Ndiweriyengi kunyumba yangu ko ndikutuwa.’ Ndipu asani wafika usaniya nyumba yambula kanthu, yakupeyeka umamphaumampha ndi kudyoŵeka. 45  Pavuli paki, uluta ndi kuchito mizimu yinyaki 7 yiheni ukongwa kuluska yiwu, asani yasere, yija mwenimo ndipu munthu yo waja muheni ukongwa kuluska mo wenge kali. Viyo ndimu kuŵiyengi ndi mugonezi uheni uwu.” 46  Wachilongoro ndi chigulu cha ŵanthu, anyina ndi avurwa ŵaki anguma kubwalu kuti alongoro nayu. 47  Sonu munthu munyaki wangumukambiya kuti: “Awonani! Anyinamwi ndi avurwa ŵinu ama kubwalu, akhumba kulongoro namwi.” 48  Iyu wangumuka munthu yo wamukambiyanga venivi kuti: “Kumbi ama mbayani ndipu avurwa ŵangu mbayani?” 49  Wangunyoloska janja laki ndi kulongo akusambira ŵaki, ndipu wangukamba kuti: “Yaŵa ndiwu ama ndi avurwa ŵangu! 50  Chifukwa munthu weyosi yo wachita khumbu la Ada wo ŵe kuchanya, mweniyo ndiyu mvurwa wangu, mku wangu, mzichi wangu kweniso ama.”

Mazu Ngam'mphata

Wonani Mazu ngo Ngakonkhoskeka.
Pamwenga kuti, “wakupunduka.”
Pamwenga kuti, “mweniyo wakondwesa umoyu wangu.”
Zina linyaki laku Satana.
Pamwenga kuti, “akusambira.”
Pamwenga kuti, “mu nyengu yinu kweniso yo yituza.” Wonani Mazu ngo Ngakonkhoskeka.
Pamwenga kuti, “wambula kugomezgeka.”