Mariko 9:1-50

  • Yesu wasambuka (1-13)

  • Mnyamata wa mzimu uheni wachizgika (14-29)

    • Ku munthu yo we ndi chivwanu, vinthu vosi vichitika (23)

  • Nyifwa yaku Yesu yikambikiya limu so (30-32)

  • Akusambira asuskana kuti mura ndiyani (33-37)

  • Weyosi yo waleka kususkana nasi, we kuchigaŵa chidu (38-41)

  • Chakuguŵiska (42-48)

  • “Jani ndi mche mwaku mwaŵeni” (49, 50)

9  Yesu wangulutirizga kuŵakambiya kuti: “Nditikuneneskiyani kuti pe anyaki wo ama panu, wo afwengi cha mpaka po awone dankha Ufumu waku Chiuta wo waza kali ndi nthazi.”  Pati pajumpha mazuŵa 6, Yesu wanguto Peturo, Yakobe ndi Yohane ndipu wanguluta nawu paphiri litali kwakuŵija. Iyu wangusambuka yiwu achilereska.  Malaya ngaki ngakubwalu ngangwamba kugabuka, ndipu ngangutowa ukongwa kuluska mo munthu weyosi pacharu chapasi wangatowese vakuvwala.  Yiwu anguwona so kuti pe Mozesi ndi Eliya wo akambiskananga ndi Yesu.  Pavuli paki, Peturo wangukambiya Yesu kuti: “Rabi, mwachita umampha kuza nasi kunu. Sonu wuli tijinthi mahema ngatatu panu? Limoza linu, limoza laku Mozesi ndipu linyaki laku Eliya.”  Peturo waziŵanga cha vo wangachita chifukwa ŵenga ndi mantha ukongwa.  Sonu kunguchita mtambu wo unguŵabenekere ndipu mumtambu wo mungutuwa mazu ngakuti: “Uyu ndi Mwana wangu, mweniyo nditimuyanja. Muvwiyeni.”  Ndipu nyengu yeniyo, ŵati alereskalereska anguwonapu munthu weyosi cha, kweni penga Yesu pe.  Achisika muphiri, Yesu wangukaniza akusambira ŵaki kuti angakambiyanga munthu weyosi cha mpaka po Mwana wa munthu wazamuyuskikiya. 10  Yiwu angusunga mazu ngenanga mumtima,* kweni akambiskananga vo kuyuka kwaki ku nyifwa kung’anamuwa. 11  Yiwu angufumba Yesu kuti: “Ntchifukwa wuli alembi akamba kuti Eliya watenere kuza dankha?” 12  Iyu wanguŵamuka kuti: “Eliya watenere nadi kuza dankha ndipu wazamuweziyapu vinthu vosi. Kweni nanga ntchifukwa wuli malemba ngakamba kuti Mwana wa munthu watenere kukumana ndi masuzgu nganandi ndipuso kuti azakumuchitiya vinthu vachipongu? 13  Kweni nditikukambiyani kuti Eliya wakuza, ndipu angumuchitiya vinthu viheni vosi vo akhumbanga nge mo vikulembeke vakukwaskana ndi iyu.” 14  Ŵati afika ko kwenga akusambira ŵaki anyaki, anguwona chigulu cha ŵanthu cho chenga pafupi ndi yiwu, ndipu penga so alembi wo asuskananga ndi akusambira wo. 15  Chigulu chosi cha ŵanthu chati chawona ŵaka Yesu, chinguzizwa ndipu chingumutchimbiriya kuti chikamutawuzgi. 16  Sonu Yesu wanguŵafumba kuti: “Kumbi mususkananji nawu?” 17  Ndipu yumoza wa ŵanthu wo, wangumuka kuti: “Msambizi, ndinguza ndi mwana wangu kwaku yimwi, chifukwa we ndi mzimu uheni wo utimutondekesa kulongoro. 18  Asani wamuyukiya, utimuponya pasi, watuwa phovu kumulomu, wakekechuwa minyu ndipuso utimumala nthazi. Ndingupempha akusambira ŵinu kuti awutuzgi, kweni atondeka.” 19  Pakumuka, Yesu wanguŵakambiya kuti: “Hate! mugonezi wambula chivwanu uwu! Kumbi ndilutirizgengi kuŵa namwi mpaka zuŵanji? Kumbi ndikunthiyengepu namwi mpaka zuŵanji? Zani nayu kunu.” 20  Sonu mnyamata yo anguza nayu kwaku Yesu, ndipu mzimu wo wati wamuwona ŵaka, nyengu yeniyo unguwisa mwana yo pasi, ndipu wangwamba kunyutuka. Wati wawa pasi, wangukunkhulukakunkhuluka ndi kutuwa phovu kumulomu. 21  Pavuli paki, Yesu wangufumba awisi kuti: “Kumbi venivi vikwamba zuŵanji kumuchitikiya?” Yiwu angumuka kuti: “Kutuliya pa unamana waki. 22  Ndipu kanandi utimuwisa pamotu kweniso mumaji kuti wafwi. Kweni asani mungafiska, tichitiyeni lisungu, tiwovyeni chondi.” 23  Yesu wangumukambiya kuti: “Ntchifukwa wuli ukamba kuti, ‘Asani mungafiska?’ Ku munthu yo we ndi chivwanu, vinthu vosi vichitika.” 24  Nyengu yeniyo, awisi a mwana yo angudaniriza kuti: “Chivwanu nde nachu! Ndiwovyeni kuti ndije ndi chivwanu chakukho!” 25  Sonu Yesu wati wawona kuti chigulu cha ŵanthu chikhumukiya kwaku iyu, wanguchenya mzimu uheni wo kuti: “Yiwi mzimu wakutondekesa kulongoro kweniso kuvwa, nditikulamula kuti tuwa mwaku iyu ndipu ungaserengamu so cha!” 26  Mwana yo wangudaniriza ndi kwamba kunyutuka, pavuli paki mzimu wo ungutuwamu mwaku iyu ndipu wanguja nge kuti wafwa mwakuti ŵanthu wosi akambanga kuti: “Wafwa!” 27  Kweni Yesu wangumuko pajanja ndi kumusoska ndipu wangusoka. 28  Sonu Yesu wati wasere munyumba, akusambira ŵaki angumufumba kwakuŵija kuti: “Ntchifukwa wuli isi tatondeka kutuzga mzimu uheni wuwa?” 29  Iyu wanguŵamuka kuti: “Mzimu wa mtundu uwu utuzgika ndi pempheru pe.” 30  Sonu angutuwaku kwenuku ndipu angupitiya ku Galileya, kweni Yesu wangukhumba cha kuti munthu weyosi waziŵi ko iyu wenga. 31  Chifukwa wasambizanga ndi kukambiya akusambira ŵaki kuti: “Mwana wa munthu waperekekengi mu manja mwa ŵanthu, ndipu amubayengi kweni chinanga kuti amubayi, pa zuŵa lachitatu wayuskikengi.” 32  Yiwu anguvwisa cha vo wakambanga kweni awopanga kumufumba. 33  Pavuli paki, angufika ku Kaperenao. Sonu we munyumba wanguŵafumba kuti: “Kumbi mwasuskananganji munthowa?” 34  Yiwu anguja ŵaka cheti chifukwa munthowa asuskananga kuti mura ndi yani pakati pawu. 35  Sonu wanguja pasi ndi kudana akusambira ŵaki 12, ndipu wanguŵakambiya kuti: “Asani munthu wakhumba kuja wakwamba, watenere kuja wakumaliya paku wosi kweniso mteŵeti waku wosi.” 36  Ndipu wanguto kamwana ndi kukamika pakati pawu, wangukako paphewa ndipu wanguŵakambiya kuti: 37  “Weyosi yo walonde kamoza mwa tiŵana tange kamwana yaka chifukwa cha zina langu, walonde so ini. Ndipu weyosi yo walonde ini, walonde ini pe cha, kweni walonde so Yo wakundituma.” 38  Yohane wangukambiya Yesu kuti: “Msambizi, tawona munthu munyaki wachituzga viŵanda mu zina linu, sonu tamukaniza chifukwa we mugulu lidu cha.” 39  Kweni Yesu wangukamba kuti: “Mungamukanizanga cha chifukwa palivi munthu yo wachita vakuziziswa mu zina langu, yo wangakamba mwaliŵi chiheni chechosi chakukwaskana ndi ini. 40  Chifukwa weyosi yo waleka kususkana nasi, we kuchigaŵa chidu. 41  Ndipu weyosi yo watikupaskani kapu ya maji kuti mumwi chifukwa chakuti mwe aku Khristu, nditikuneneskiyani kuti wazakuyitayapu cha mphotu yaki. 42  Kweni weyosi yo waguŵiska kamoza mwa tiŵana teniti to te ndi chivwanu, vingaŵa umampha kumumangiliya mukhosi chimwa chikulu chakupere nge cho bulu waguza, ndi kumubizga munyanja. 43  “Asani janja laku litikuguŵiska, lidumuwi. Vingaŵa umampha kusere mu umoyu we wakupunduka, kuluska kuti uponyeki mu Gehena* we ndi manja ngosi ngaŵi, mo mwe motu wambula kuzimwika. 44  *—— 45  Ndipu asani phazi laku litikuguŵiska, lidumuwi. Vingaŵa umampha kusere mu umoyu we wakupunduka, kuluska kuchiponyeka mu Gehena* we ndi maphazi ngosi ngaŵi. 46  *—— 47  Ndipu asani jisu laku litikuguŵiska, litayi kutali. Vingaŵa umampha kusere mu Ufumu waku Chiuta we ndi jisu limoza, kuluska kuti uponyeki mu Gehena* we ndi masu ngosi ngaŵi, 48  ko mphorozi zitufwa cha ndipuso motu uzimwika cha. 49  “Chifukwa weyosi watenere kuwazika mche, wo we nge motu. 50  Mche ngwamampha kweni asani wasukuluka, kumbi kunowa kwaki kungaweriyamu so wuli? Jani ndi mche mwaku mwaŵeni ndipu jani mwachimangu ndi anyinu.”

Mazu Ngam'mphata

Panyaki kuti, “angusunga chisisi.”
Wonani Mazu ngo Ngakonkhoskeka.
Wonani mazu ngamumphata pa Mateyu 17:21.
Wonani Mazu ngo Ngakonkhoskeka.
Wonani mazu ngamumphata pa Mateyu 17:21.
Wonani Mazu ngo Ngakonkhoskeka.