Mariko 6:1-56

  • Yesu atimukana kumuzi kwawu (1-6)

  • Akusambira 12 apaskika ulongozgi wa mu uteŵeti (7-13)

  • Nyifwa yaku Yohane Mubatizi (14-29)

  • Yesu waryisa anthulumi 5,000 (30-44)

  • Yesu watenda pamaji (45-52)

  • Yesu wachizga ŵanthu ku Genesareti (53-56)

6  Wati watuwa kweniko, wanguza kumuzi kwaki ndipu akusambira ŵaki angumulondo.  Pa zuŵa la Sabata, wangwamba kusambiza musinagogi ndipu ŵanthu anandi wo amuvwisiyanga anguzizwa ukongwa ndipu afumbanga kuti: “Kumbi munthu uyu wakutuwa navu pani vinthu ivi? Ndipu ntchifukwa wuli wakupaskika zeru zenizi, kweniso ntchifukwa wuli wachita vakuziziswa vaviyo?  Asi uyu ndi kalipentala, mwana waku Mariya kweniso avurwa ŵaki ndi Yakobe, Yosefi, Yudasi ndi Simoni? Asi azichi ŵaki tija nawu kwenikunu?” Mwaviyo, yiwu angwamba kuguŵa chifukwa chaku iyu.  Kweni Yesu wanguŵakambiya kuti: “Mchimi watumbikika kwekosi kupatuwaku kwawu, pakati pa abali ŵaki kweniso mubanja laki.”  Sonu iyu wanguchita chakuziziswa chechosi cha kwenuku, kweni wanguŵika ŵaka manja ngaki pa ŵanthu amanavi wo atamanga ndipu wanguŵachizga.  Iyu wanguzizwa ukongwa kuwona kuti ŵengavi chivwanu. Ndipu wanguluta kuchisambiza mumizi yosi yakuzunguliya.  Sonu wangudana akusambira ŵaki 12 ndipu wangwamba kuŵatuma ŵaŵiŵaŵi ndipu wanguŵapaska mazaza kuti akatuzgengi mizimu yiheni.  Ndipuso wanguŵalamula kuti angapinganga chechosi cha pa ulendu wo kupatuwaku nthonga. Wanguŵakambiya kuti angapinganga viŵandi cha, kwali ndi thumba la chakurya cha pa ulendu pamwenga ndalama* muvikwama vawu vandalama,  wanguŵakambiya so kuti avwali sapatu, kweni angavwalanga malaya ngaŵi* cha. 10  Kweniso iyu wanguŵakambiya kuti: “Munyumba yeyosi yo mwamusere, mukaje mwenimo mpaka po mutuliyengeku kweniko. 11  Kwekosi ko akana kukulondiyani pamwenga kuvwisiya mazu nginu, phatani fuvu kumaphazi nginu muchituwaku, kuti uje ukaboni kwaku yiwu.” 12  Pavuli paki, anguluta kuchipharazga kuti ŵanthu alapi, 13  ndipu angutuzga viŵanda ndipuso angupaka mafuta ŵanthu anandi wo atamanga ndi kuŵachizga. 14  Sonu Fumu Herodi yinguvwa venivi, chifukwa zina laku Yesu lingutchuka ukongwa ndipu ŵanthu akambanga kuti: “Yohane Mubatizi wayuskika ndichu chifukwa chaki we ndi nthazi zakuchitiya vakuziziswa.” 15  Kweni anyaki akambanga kuti: “Ndi Eliya.” Penipo anyaki akambanga kuti: “Ndi mchimi nge achimi a mu nyengu yakali.” 16  Kweni Herodi wati wavwa venivi, wangukamba kuti: “Yohane yo ndingumudumuwa mutu, wayuskika.” 17  Pakuti Herodi wangutuma ŵanthu kuti akamangi Yohane ndi kumuponya mujeri chifukwa chakuti Herodi wanguto Herodiya muwolu wa mku waki, Filipu. 18  Chifukwa Yohane wakambiyanga Herodi kuti: “Ntchambula kwenere kuti uto muwolu wa mku waku.” 19  Mwaviyo, Herodiya wangumusungiya vifukwa Yohane ndipu wakhumbanga kumubaya kweni watondekanga. 20  Venga viyo chifukwa chakuti Herodi wawopanga Yohane pakuti waziŵanga kuti iyu ndi munthu murunji kweniso wakupaturika, ndipu wamuvikiliyanga. Wachivwa vo Yohane wakambanga, zeru zamumaliyanga ndipu wasoŵanga chakuchita kweni walutirizganga kumuvwisiya mwakukondwa. 21  Kweni nyengu yamampha yingukwana pa zuŵa lakukondwere kuwa kwaku Herodi, po iyu wangunozga chakurya chamazulu kuti waryiyi limoza ndi nduna zaki, ŵara ŵa asilikali ndipuso ŵanthu akutchuka a mu Galileya. 22  Mwana munthukazi waku Herodiya wanguza ndipu wanguvina mwakuti Herodi ndi ŵanthu wo aryanga nayu* angukondwa. Fumu Herodi yingukambiya msungwana yo kuti: “Pempha chechosi cho ukhumba ndipu ndikupaskengi.” 23  Yinguchita kumulapizgiya kuti: “Chechosi cho ungandipempha ndikupaskengi, chinanga yingaŵa hafu ya ufumu wangu.” 24  Sonu wanguluta kuchifumba anyina kuti: “Kumbi nkhapemphenji?” Yiwu angumuka kuti: “Mutu waku Yohane Mubatizi.” 25  Nyengu yeniyo, wangutchimbiriya kwa fumu ndi kuyipempha kuti: “Ndikhumba kuti mundipaski mutu waku Yohane Mubatizi mumbali, sonu viyo.” 26  Chinanga kuti fumu yinguchita chitima ukongwa, kweni yingukhumba cha kuleka kuchita vo wangupempha chifukwa chakuti yinguchita kulapizga ndipuso chifukwa cha alendu ŵaki.* 27  Nyengu yeniyo, fumu yingutuma msilikali ndipu yingumulamula kuti wazi ndi mutu waku Yohane. Mwaviyo, iyu wanguluta ndi kuchidumuwa mutu waku Yohane mujeri, 28  ndipu wanguza nawu mumbali. Iyu wanguwupereka kwa msungwana ndipu msungwana yo wanguwupereka kwa anyina. 29  Akusambira aku Yohane ŵati avwa venivi, anguza ndi kutuzgapu thupi laki ndipu anguchiliŵika mumuwunda.* 30  Akutumika anguwungana kwaku Yesu ndipu angumukambiya vosi vo anguchita ndi kusambiza. 31  Iyu wanguŵakambiya kuti: “Zani kunu, tiyeni kwakutija kuti tikapumuwi kamanavi.” Chifukwa penga ŵanthu anandi wo azanga ndi kuluta mwakuti ŵengavi nyengu yakupumuliya ndipuso yakuryiya. 32  Mwaviyo, angukwera boti ndi kuluta kwakuŵija. 33  Kweni ŵanthu anguŵawona achiluta ndipu anandi anguziŵa. Mwaviyo angutchimbiya wapasi kutuwa mumatawuni ngosi ndipu yiwu ndiwu angwamba kufika. 34  Ŵati asika boti, Yesu wanguwona chigulu cha ŵanthu ndipu wanguŵalenge lisungu chifukwa ŵenga nge mbereri zambula mliska ndipu wangwamba kuŵasambiza vinthu vinandi. 35  Sonu chakumazulu akusambira ŵaki anguza kwaku iyu ndi kumukambiya kuti: “Malu nganu kuja ŵanthu cha ndipu nyengu nayu yamala. 36  Akambiyeni ŵanthu kuti aluti muvigaŵa kweniso mumizi yapafupi kuti akajiguliyi chakurya.” 37  Iyu wanguŵamuka kuti: “Yimwi ndimwi muŵapaski chakurya.” Ŵati avwa venivi angumufumba kuti: “Kumbi tiluti kuchigula chakurya cha ndalama zakukwana madinari 200 ndi kupaska ŵanthu kuti aryi?” 38  Iyu wanguŵafumba kuti: “Kumbi mwe ndi viŵandi vilinga? Lutani kawoneni!” Ŵati aviwona angukamba kuti: “Vilipu vinkhondi ndi somba ziŵi.” 39  Ndipu wangukambiya ŵanthu kuti aje pa uteka mumagulumagulu. 40  Mwaviyo, anguja mumagulu nga ŵanthu 100 ndipuso 50. 41  Wati wato viŵandi vinkhondi ndi somba ziŵi, wangulereska kuchanya ndi kupemphera. Pavuli paki wangumenya viŵandi vo ndi kwamba kupaska akusambira ŵaki kuti aŵiki mo munguja ŵanthu, ndipu wangugaŵiya so ŵanthu wosi somba ziŵi. 42  Mwaviyo, wosi angurya ndi kuguta, 43  ndipu anguyola vibanthu vakujaku vakuzaza masokola 12, kupatuwaku somba. 44  Wo angurya viŵandi ŵenga anthulumi 5,000. 45  Mwaliŵiliŵi, wangukambiya akusambira ŵaki kuti akweri boti, adanjiyepu ndi kuluta kusirya linyaki la nyanja, cha ku Betisayida, kweni iyu wangujaliya kuti wakambiyi ŵanthu kuti akengi. 46  Wati walayilana ndi ŵanthu wo, wanguluta kuphiri kuchipemphera. 47  Kuchifipa, boti lenga pakatikati pa nyanja kweni iyu wenga yija kumtunda. 48  Sonu wati wawona kuti asuzgika kuvuŵa chifukwa alutanga ko kwatuliyanga mphepu, mu ulinda wachinayi* wanguza kwaku yiwu wachiyenda panyanja kweni wawonekanga nge kuti wakhumba* kuŵajumpha. 49  Ŵati amuwona wachiyenda panyanja, akambanga kuti: “Ndi malotu kwali!” Ndipu angudaniriza. 50  Chifukwa wosi angumuwona ndipu angutimbanyizgika. Kweni nyengu yeniyo wanguŵakambiya kuti: “Khwimani mtima! Ndini, mungawopanga cha.” 51  Pavuli paki, iyu wangukwera muboti ndipu mphepu yingugowoka. Yiwu anguzizwa ukongwa chifukwa cha venivi, 52  pakuti anguziŵa cha vo viŵandi viya vang’anamuwanga, kweni mitima yawu yingulutirizga kuja yambula kuvwisa vinthu. 53  Ŵati afika kumtunda, anguza ku Genesareti ndipu angukocheza boti pafupi ndi likumba. 54  Kweni ŵati asika ŵaka boti, ŵanthu angumuziŵa. 55  Yiwu angutchimbiya mudera losi kuchikambiya anyawu ndipu ŵanthu wo atamanga angwamba kuŵanyamuwa pamachira ndi kuluta nawu ko anguvwa kuti ndiku Yesu wali. 56  Ndipu asani Yesu wasere mumuzi wewosi, mutawuni pamwenga muchigaŵa chechosi, ŵanthu aŵikanga wo atamanga mumisika ndipu amuŵeyeriyanga kuti akoku ŵaka mphonji ya laya laki lakubwalu. Ndipu wosi wo ayikonga, achiranga.

Mazu Ngam'mphata

Mazu ngaki chayingu, “mkuŵa”
Pamwenga kuti, “laya linyaki.”
Pamwenga kuti, “wo ayegemiyanga nayu pathebulu.”
Pamwenga kuti, “ŵanthu wo anguyegeme pathebulu.”
Pamwenga kuti, “mumuwunda wachikumbusu.”
Kwamba cha mu ma 3 koloku matandakucha mpaka cha mu ma 6 koloku mlenji.
Pamwenga kuti, “kweni wanguja kamanavi.”