Mariko 3:1-35

  • Munthu wakufwa janja wachizgika (1-6)

  • Chigulu chikulu cha ŵanthu che mumphepeti mwa nyanja (7-12)

  • Akutumika 12 (13-19)

  • Kunyoza mzimu (20-30)

  • Anyina aku Yesu ndi avurwa ŵaki (31-35)

3  Yesu wangusere so musinagogi ndipu mwenimo mwenga munthu wakufwa* janja.  Sonu Afarisi amulereseskanga kuti awoni asani wachizgengi munthu yo pa zuŵa la Sabata ndi chilatu chakuti amumbi mulandu.  Iyu wangukambiya munthu wakufwa* janja yo kuti: “Soka, iza pakati yapa.”  Pavuli paki wanguŵafumba kuti: “Kumbi chakwenere kuchita pa Sabata ndi nichi? Kuchita chamampha pamwenga kupweteka, kutaska umoyu pamwenga kubaya?” Kweni yiwu anguja ŵaka cheti.  Wati waŵalereseska mwakukwiya, wanguchita chitima ukongwa chifukwa cha kunonopa kwa mitima yawu, ndipu wangukambiya munthu yo kuti: “Nyoloska janja laku.” Iyu wangulinyoloska ndipu linguweriyamu.  Venivi vati vachitika, Afarisi angutuliya kubwalu ndipu nyengu yeniyo angwamba kupangana ndi gulu laku Herodi kuti abayi Yesu.  Kweni Yesu ndi akusambira ŵaki angutuwaku ndi kuluta kunyanja, ndipu chigulu chikulu cha ŵanthu akutuliya ku Galileya ndi ku Yudeya chingumulondo.  Chigulu cha ŵanthu akutuliya ku Yerusalemu, ku Idumiya, kusirya linyaki la Yorodani, ndipuso muvigaŵa vakuzunguliya Turo ndi Sidoni, nawu so angumulondo chifukwa ŵanthu wo anguvwa vinthu vinandi vo Yesu wachitanga.  Ndipu iyu wangukambiya akusambira ŵaki kuti anozge limu kaboti kakuti wakweremu kuti chigulu cha ŵanthu chileki kumufinyikiza. 10  Chifukwa chakuti wanguchizga ŵanthu anandi, ŵanthu wosi wo ŵenga ndi matenda ngakulungakulu akhumukiyanga kwaku iyu kuti amukwaski. 11  Chinanga ndi mizimu yiheni, asani yamuwona ŵaka yawanga pasi panthazi paki ndi kudaniriza kuti: “Ndimwi Mwana waku Chiuta!” 12  Kweni kanandi wayikanizanga mwanthazi kuti yingamusumuwanga cha. 13  Yesu wangukwera paphiri ndi kudana wosi wo wakhumbanga ndipu anguza kwaku iyu. 14  Wangupanga* gulu la ŵanthu 12, wo wanguŵadana so kuti akutumika kuti ayendengi nayu kweniso kuti waŵatumengi kuchipharazga 15  ndipuso wanguŵapaska mazaza kuti atuzgengi viŵanda. 16  Mugulu la ŵanthu 12 ŵenaŵa mwenga Simoni yo wangumupaska so zina lakuti Peturo, 17  Yakobe mwana waku Zebediya, Yohane mvurwa waku Yakobe (anganya yaŵa wanguŵapaska so zina lakuti Bowanajesi, lo ling’anamuwa kuti “Ŵana a Limphezi”), 18  Andireya, Filipu, Batolomeyu, Mateyu, Tomasi, Yakobe mwana waku Alifeyu, Tadeyu, Simoni Kananiya,* 19  ndipuso Yudasi wa ku Keriyoti yo wanguzimupereka. Pavuli paki wangusere munyumba, 20  ndipu chigulu cha ŵanthu chinguwungana so, mwakuti ŵengavi nyengu yakuryiya. 21  Kweni abali ŵaki ŵati avwa venivi, anguluta kuchimuko, chifukwa akambanga kuti: “Wazunguliya mutu.” 22  Alembi wo angutuwa ku Yerusalemu nawu akambanga so kuti: “We ndi Belezebule,* ndipu watuzga viŵanda mu nthazi ya mura wa viŵanda.” 23  Sonu wati waŵadana wanguŵakambiya mwantharika kuti: “Vingachitika wuli kuti Satana watuzgi Satana? 24  Asani ufumu ugaŵikana, ndikuti ufumu wo ukhongi cha; 25  ndipu asani nyumba yigaŵikana, ndikuti nyumba yo yikhongi cha. 26  Ndipuso asani Satana wajiyukiya kweniso wagaŵikana, wakhongi cha kweni wamaliyengi penipo. 27  Kukamba uneneska, palivi munthu yo wangasere munyumba ya munthu wanthazi kuti wamubiyi katundu kwambula kumumanga dankha munthu wanthazi yo. Pijapija asani wangamumanga ndipu wangalonda nyumba yaki. 28  Nditikuneneskiyani kuti ŵanthu azamugowokereka maubudi ngosi ngo angachita, kwali ngangaŵa ngamtundu wuli, kweniso kwali anganyoza mwamtundu wuli. 29  Kweni munthu weyosi yo wanyoza mzimu wakupaturika wazamugowokerekapu cha, kweni we ndi ubudi wambula kumala.” 30  Wangukamba viyo chifukwa akambanga kuti: “We ndi mzimu uheni.” 31  Sonu anyina ndi avurwa ŵaki anguza ndi kuma pabwalu ndipu angutuma munthu munyaki kuti wakamudani. 32  Chifukwa chakuti penga ŵanthu anandi wo angumuzunguliya, angumukambiya kuti: “Awonani! Anyinamwi ndi avurwa ŵinu ŵe pabwalu atikupenjani.” 33  Kweni Yesu wanguŵamuka kuti: “Ama ndi avurwa ŵangu mbayani?” 34  Pavuli paki wangulereska ŵanthu wo anguja mwakumuzunguliya ndi kuŵakambiya kuti: “Mwaŵawona ama ndi avurwa ŵangu! 35  Munthu weyosi yo wachita khumbu laku Chiuta ndiyu mvurwa wangu, mku wangu, mzichi wangu kweniso ama.”

Mazu Ngam'mphata

Pamwenga kuti, “wakupunduka.”
Pamwenga kuti, “wakupunduka.”
Pamwenga kuti, “Wangusankha.”
Pamwenga kuti, “Simoni munthu waphamphu.”
Zina linyaki laku Satana.