Mariko 13:1-37

  • KUMALA KWA MUGONEZI (1-37)

    • Nkhondu, vidilirisi, nja (8)

    • Uthenga wamampha wazamupharazgika (10)

    • Chisuzgu chikulu (19)

    • Kuza kwa mwana wa munthu (26)

    • Ntharika ya chimiti cha mkuyu (28-31)

    • Lutirizgani kuja masu (32-37)

13  Wachituwa munyumba yakusopiyamu, wakusambira waki yumoza wangumukambiya kuti: “Msambizi, awonani kutowa kwa mya kweniso nyumba izi!”  Kweni Yesu wangumukambiya kuti: “Waziwona nyumba zikuluzikulu izi? Palivi mwa panu wo ulekekengi pachanya pa unyaki kwambula kuwisikiya pasi.”  Yesu wati waja pa Phiri la Maolivi mwakulereskana ndi nyumba yakusopiyamu, Peturo, Yakobe, Yohane ndi Andireya angumufumba pakuŵija kuti:  “Tikambiyeni, kumbi vinthu venivi vichitikengi zuŵanji, nanga chisimikizu chakuti vinthu vosi venivi ve pafupi kumala ntchinthu wuli?”  Yesu wanguŵakonkhoske kuti: “Tcheŵani kuti ŵanthu aleki kukulandizgani.  Ŵanthu anandi azengi mu zina langu ndi kukamba kuti, ‘Ndini Khristu,’ ndipu azamulandizga ŵanthu anandi.  Kweniso asani mwazivwa viwawa vankhondu ndi mbiri zankhondu, mungaziwopanga cha. Vinthu ivi vitenere kuchitika, kweni umaliru wazamuja kuti wechendazi.  “Pakuti mtundu wazamuyukiyana ndi mtundu unyaki, ufumu ndi ufumu unyaki; ndipu kwazamuchitika vidilirisi mumalu ngakupambanapambana ndipuso kwazamuja nja. Venivi vazamuja kwamba ŵaka kwa maurwirwi.  “Kweni yimwi tcheŵani. Ŵanthu azakukuperekani kumakhoti ndipu azakukukwechuwani mumasinagogi kweniso azakukumikani pa masu pa ŵaraŵara a boma ndi mafumu chifukwa cha zina langu kuti uje ukaboni kwaku yiwu. 10  Ndipuso uthenga wamampha utenere kupharazgika dankha ku mitundu yosi. 11  Asani akutoni kuti akakuperekeni, mungafipanga mtima cha kuti mwamukambanji; kweni vo mwamupaskika pa nyengu yeniyo, kakambeni venivo, chifukwa mwamukamba ndimwi cha kweni mzimu wakupaturika. 12  Kweniso, munthu wazamupereka mubali waki kuti wabayiki, wisi wazamupereka mwana waki ndipuso ŵana azamuyukiya apapi ŵawu ndi kuŵabayisa. 13  Ndipu ŵanthu wosi azakukutinkhani chifukwa cha zina langu. Kweni yo wazamukunthiyapu* mpaka pakumaliya ndiyu wazamutaskika. 14  “Mwaviyo, asani mwawona kuti chawuyu chakusakaza cho chingukambika ndi mchimi Daniyeli chama mumalu ngo chakhumbikanga cha kumamu (wakuŵerenga wawemu), ndikuti wo ŵe mu Yudeya, ayambi kuthaŵiya kumapiri. 15  Munthu yo we pachanya pa nyumba, waleki kusika pamwenga kusere munyumba yaki kuti wakatomu chinthu. 16  Ndipu munthu yo we kumunda waleki kuwere kuvuli kuti wakato laya laki lakubwalu. 17  Soka kwa anthukazi anthumbu kweniso wo azamuja kuti atonkhesa ŵana mu mazuŵa ngo! 18  Lutirizgani kupemphera kuti venivi vizileki kuchitika mu nyengu yachipwepwi; 19  chifukwa mazuŵa ngo ngazamuja mazuŵa nga chisuzgu chikulu chakuti chechendachitikepu kwamba po Chiuta wakulenge vinthu mpaka pa nyengu yo, ndipu chazamuchitikapu so cha. 20  Asani Yehova wanguleka kudumulizgaku mazuŵa, pengavi munthu yo watingi wazitaskikengi. Kweni chifukwa cha akusankhika wo iyu wasankha, wadumulizgaku mazuŵa yanga. 21  “Ndipu asani munthu munyaki wazakukukambiyani kuti, ‘Awonani! Khristu we kunu,’ pamwenga, ‘Awonani! We kuwa! mungazigomezganga cha. 22  Chifukwa ŵanthu akujidana kuti Khristu ndipuso achimi aboza azamubuka ndi kuchita visimikizu kweniso vakuziziswa kuti alandizgi ŵanthu, ndipu asani nkhwamachitika alandizgi chinanga mbakusankhika. 23  Kweni yimwi tcheŵani! Ndakukambiyani limu vinthu vosi. 24  “Kweni mu mazuŵa ngo, asani chisuzgu chikulu chazimala, lumwi lazamuchita mdima, mwezi wazamuŵala cha, 25  nyenyezi zazamumbotoka kutuwa kuchanya, ndipu nthazi ya vinthu vakuchanya yazamusukunyika. 26  Ndipu ŵanthu azamuwona Mwana wa munthu wachiza mu mitambu ndi nthazi zikulu ndipuso unkhankhu. 27  Pavuli paki wazamutuma angelu, ndipu azamuwunganiska akusankhika ŵaki kutuliya ku mphepu zosi zinayi, kwamba kuvigoti va charu chapasi mpaka kuvigoti va kuchanya. 28  “Sonu sambirani ku chimiti cha mkuyu: Asani mwawona ŵaka kuti mphanda zaki zachita liwondwi, muziŵa kuti chifuku che pafupi. 29  Mwakuyanana ŵaka, asani mwawona vinthu venivi vichichitika, ziŵani kuti we pakhomu chayipu. 30  Nditikuneneskiyani kuti mugonezi uwu umalengepu cha mpaka po vinthu vosi ivi vachitikiya. 31  Kuchanya ndi charu chapasi vimalengi, kweni mazu ngangu ngamalengepu cha. 32  “Kweni va zuŵa pamwenga ora laki, palivi munthu yo waziŵa, chinanga mbangelu kuchanya pamwenga Mwana, kweni Ada pe ndiwu aziŵa. 33  Tcheŵani ndipu lutirizgani kuja masu, chifukwa nyengu yakuŵikika mutiyiziŵa cha. 34  Venivi ve nge munthu yo walutanga ku ulendu ndipu wanguleka nyumba yaki ndi kupereka mazaza kwa akapolu ŵaki, weyosi wangumupaska ntchitu yaki, ndipu wangulamula mulonda wa pageti kuti walutirizgi kuja masu. 35  Mwaviyo, lutirizgani kuja masu chifukwa muziŵa cha nyengu yo mweneku wa nyumba waziyengi, kwali wazengi mazulu, kwali wazengi pakati pa usiku, kwali wazengi chiwumbu chechendatemi* pamwenga ndi mlenjilenji, 36  kuchitiya kuti asani waza mwakubuchizga, waleki kukusaniyani mwagona. 37  Kweni vo ndikambiya yimwi, ndikambiya wosi: Lutirizgani kuja masu.”

Mazu Ngam'mphata

Pamwenga kuti, “yo wakunthiyapu.”
Pamwenga kuti, “tambala wachikokolika.”