Mariko 11:1-33

  • Yesu wasere mu Yerusalemu mwaunkhankhu (1-11)

  • Chimiti cha mkuyu chitembeka (12-14)

  • Yesu watowesa nyumba yakusopiyamu (15-18)

  • Kusambira ku chimiti cha mkuyu cho chingufota (19-26)

  • Mazaza ngaku Yesu ngasuskika (27-33)

11  Sonu ŵe pafupi kufika ku Yerusalemu, angufika pa Phiri la Maolivi, po penga Betifage ndi Betaniya. Yesu wangutuma akusambira ŵaki ŵaŵi  ndipu wanguŵakambiya kuti: “Lutani mumuzi wo we panthazi po, ndipu mwamusaniya bulu yo amumangiriya, mweniyo chijaliyi munthu wechendakwerepu. Mukamufwatuwi ndi kuza nayu kunu.  Ndipu asani munthu munyaki wachikufumbani kuti: ‘Mutimufwatuliyanji bulu?’ mukakambi kuti: ‘Ambuya atimukhumba ndipu akuweziyeningi asani amaliza ŵaka kumugwiriskiya ntchitu.’”  Sonu yiwu anguluta, angusaniya bulu yo angumumangiriya pakhomu mumphepeti mwa msewu ndipu angumufwatuwa.  Kweni ŵanthu wo anguma penipo anguŵafumba kuti: “Ntchifukwa wuli mufwatuwa bulu?”  Yiwu anguŵakambiya nge mo Yesu wanguŵapangizgiya ndipu anguŵazomereza kuti akengi nayu.  Ŵati aza ndi bulu yo kwaku Yesu, angutandikapu malaya ngawu ngakubwalu ndipu iyu wangukwerapu.  Ŵanthu anyaki nawu angutandika malaya ngawu ngakubwalu mumsewu, penipo anyaki aphajuwanga vivwati mudondu.  Ndipu ŵanthu wo ayendanga panthazi paku Yesu kweniso wo azanga kuvuli kwaki adanirizanga kuti: “Mutaskeni chondi! Wakutumbikika ndiyu yo watuza mu zina laku Yehova! 10  Ngwakutumbikika Ufumu wo utuza wa awusefwi a Davidi! Mutaskeni chondi, yimwi mwe kuchanya!” 11  Sonu wangusere mu Yerusalemu, ndipu wanguluta munyumba yakusopiyamu ndi kulereskalereska vinthu vosi kweni chifukwa chakuti kungufipa, wanguluta ku Betaniya limoza ndi akusambira ŵaki 12. 12  Mawa laki, achituwa ku Betaniya, wanguvwa nja. 13  We patali, wanguwona chimiti cha mkuyu cho chenga ndi mani ndipu wanguluta kuchiwonamu kuti panyaki mwe vipasu. Kweni wati wafika pachimiti cho, wangusaniyamu chipasu chechosi cha kweni mani pe, chifukwa yenga nyengu ya mkuyu cha. 14  Sonu wangukamba kuti: “Munthu wangaziryangamu so chipasu chechosi cha mwaku yiwi.” Ndipu akusambira ŵaki avwanga vo wakambanga. 15  Sonu angufika ku Yerusalemu. Yesu wangusere munyumba yakusopiyamu, wangwamba kudikisa wo agulisanga ndi wo agulanga vinthu munyumba yakusopiyamu ndipu wangugudubuwa mathebulu nga akusintha ndalama kweniso mipandu ya akugulisa nkhunda. 16  Ndipu wanguzomereza cha kuti munthu yo wapinga katundu wajumphengi munyumba yakusopiyamu. 17  Iyu waŵasambizanga ndi kuŵakambiya kuti: “Asi Malemba ngatiti, ‘Nyumba yangu yazamudanika kuti nyumba yakupempheriyamu ŵanthu amitundu yosi’? Kweni yimwi mwayisambuska mphanji* ya ankhungu.” 18  Ŵara ŵa asembi ndi alembi anguvwa venivi ndipu chifukwa chakuti amuwopanga, angwamba kupenjapenja nthowa yakuti amubayiyi, pakuti chigulu cha ŵanthu chinguzizwa ndi mo wasambiziyanga. 19  Ndi mazulu angutuwamu mutawuni yo. 20  Kweni ndi mlenjilenji achijumpha, angusaniya kuti chimiti cha mkuyu chosi chafota ndi misisi viyo. 21  Peturo wangukumbuka chimiti cho ndipu wangukamba kuti: “Rabi, awonani! chimiti chiya mungutemba, chajifote!” 22  Yesu wanguŵakambiya kuti: “Jani ndi chivwanu mwaku Chiuta. 23  Nditikuneneskiyani kuti weyosi yo wangakambiya phiri ili kuti, ‘Soka panu, ukajiponyi munyanja,’ ndipu wakayika cha mumtima mwaki, kweni we ndi chivwanu kuti vo wakamba vichitikengi, vazakumuchitikiya nadi. 24  Ndichu chifukwa chaki nditikukambiyani kuti pa vinthu vosi vo mungapemphera ndi kupempha, jani ndi chivwanu chakuti mwavilonde kali, ndipu mwazamulonde nadi. 25  Ndipu asani mupemphera, mugowokiyengi dankha ŵanthu wo akunangiyani kuti Awusemwi akuchanya nawu akugowokiyeni maubudi nginu.” 26  *—— 27  Anguza so ku Yerusalemu. Wachiyenda munyumba yakusopiyamu, kunguza ŵara ŵa asembi, alembi ndi ŵara 28  ndipu angumufumba kuti: “Kumbi mazaza ngakuchitiya ivi utuwa nangu pani? Pamwenga ndiyani yo wakukupaska mazaza ngenanga?” 29  Yesu wanguŵakambiya kuti: “Ndikufumbeni fumbu limoza. Mundimuki dankha ndipu ndikukambiyeningi ko kutuwa mazaza ngo ndichitiya vinthu venivi. 30  Kumbi ubatizu waku Yohane ukutuliya nunkhu? Kuchanya pamwenga ku ŵanthu? Ndimukeni.” 31  Yiwu angwamba kukambiskana kuti: “Asani takamba kuti, ‘Ukutuliya kuchanya,’ wakambengi kuti, ‘Ntchifukwa wuli munguleka kumugomezga?’ 32  Sonu nanga tikambiyi dala kuti, ‘Ukutuliya ku ŵanthu’?” Yiwu awopanga gulu la ŵanthu, chifukwa gulu lo lawonanga kuti Yohane wenga mchimi. 33  Sonu yiwu angumuka Yesu kuti: “Tiziŵa cha.” Ndipu Yesu nayu wanguŵamuka kuti: “Nani ndikukambiyeningi cha ko kutuwa mazaza ngo ndichitiya ivi.”

Mazu Ngam'mphata

Wonani mazu ngamumphata pa Mateyu 8:20.
Wonani mazu ngamumphata pa Mateyu 17:21.