Mariko 1:1-45

  • Yohane Mubatizi wapharazga (1-8)

  • Ubatizu waku Yesu (9-11)

  • Yesu wayeseka ndi Satana (12, 13)

  • Yesu watamba kupharazga ku Galileya (14, 15)

  • Kudanika kwa akusambira akwamba (16-20)

  • Mzimu uheni utuzgika (21-28)

  • Yesu wachizga ŵanthu anandi ku Kaperenao (29-34)

  • Yesu wapemphera kwakuyija (35-39)

  • Wamakhati wachizgika (40-45)

1  Kwamba kwa uthenga wamampha wakukamba vaku Yesu Khristu, Mwana waku Chiuta:  Nge mo vikulembeke mu uchimi waku Yesaya kuti: “(Awona! Nditumiza muthenga wangu panthazi paku,* yo wazakukunozge nthowa.)  Mazu nga munthu yo wadaniriza muchipululu kuti: ‘Nozgani nthowa yaku Yehova! Nyoloskani misewu yaki.’”  Yohane Mubatizi wenga muchipululu ndipu wapharazganga ubatizu nge chisimikizu cha kulapa kuti maubudi ngagowokereki.  Ŵanthu wosi a muchigaŵa cha Yudeya ndi wosi akuja mu Yerusalemu alutanga kwaku iyu ndipu waŵabatizanga* mu Msinji wa Yorodani kweniso asumuwanga maubudi ngawu pakweru.  Yohane wavwalanga chakuvwala chaweya wa ngamila kweniso lamba wachikopa muchiwunu. Waryanga azombi ndi uchi.  Ndipu iyu wapharazganga kuti: “Yo watuza pavuli pangu ngwanthazi kuluska ini, ndipu nde wakwenere cha kukotama ndi kufwatuwa nthambu za sapatu zaki.  Ini nditikubatizani ndi maji, kweni iyu wazakukubatizani ndi mzimu wakupaturika.”  Mu mazuŵa ngeningo, Yesu wangutuwa ku Nazareti wa ku Galileya ndipu wangubatizika ndi Yohane mumsinji wa Yorodani. 10  Wati wazuwuka mumaji, nyengu yeniyo, wanguwona kuchanya kuchijulika ndipu mzimu wakupaturika ungusikiya paku iyu nge nkhunda. 11  Ndipu kuchanya kungutuwa mazu ngakuti: “Yiwi ndiwi Mwana wangu, mweniyo nditanja; utindikondwesa.” 12  Ndipu nyengu yeniyo mzimu ungumuchitiska kuti waluti kuchipululu. 13  Sonu iyu wanguja muchipululu kwa mazuŵa 40, wachiyeseka ndi Satana. Kweniko kwenga so vinyama vamudondu, kweni angelu amuwovyanga. 14  Sonu Yohane wati wamangika, Yesu wanguluta ku Galileya kuchipharazga uthenga wamampha waku Chiuta. 15  Iyu wapharazganga kuti: “Nyengu yakuŵikika yakwana, ndipu Ufumu waku Chiuta we pafupi. Lapani, ndipu jani ndi chivwanu mu uthenga wamampha.” 16  Wachiyenda mumphepeti mwa Nyanja ya Galileya, wanguwona Simoni ndi mvurwa waki Andireya achiponya mikwawu yawu munyanja, chifukwa ŵenga alovi. 17  Sonu Yesu wanguŵakambiya kuti: “Ndilondoni, ndipu ndikusambuskeningi alovi a ŵanthu.” 18  Nyengu yeniyo, angujowo mikwawu yawu ndipu angumulondo. 19  Ŵati ayendapu kamanavi, wanguwona Yakobe mwana waku Zebediya ndi mvurwa waki Yohane. Yiwu ŵenga muboti lawu, atandanga mikwawu yawu, 20  ndipu wanguŵadana nyengu yeniyo. Yiwu angusiya awisewu muboti limoza ndi ŵanthu antchitu ndipu angumulondo. 21  Ndipu anguluta ku Kaperenao. Zuŵa la Sabata lati layamba ŵaka, Yesu wangusere musinagogi* ndi kwamba kusambiza. 22  Ŵanthu anguzizwa ndi mo wasambiziyanga, chifukwa waŵasambizanga nge alembi cha, kweni nge munthu waudindu. 23  Pa nyengu yeniyo, musinagogi mwenga munthu munyaki yo wenga ndi mzimu uheni ndipu munthu yo wangudaniriza kuti: 24  “Takunangiyaninji Yesu wa ku Nazareti? Kumbi mwaziya kuzitinanga? Nditikuziŵani umampha kuti ndimwi Wakupaturika waku Chiuta!” 25  Kweni Yesu wanguchenya mzimu wo kuti: “Ja cheti, tuwamu mwaku iyu!” 26  Sonu mzimu uheni ungumuponya pasi munthu yo, ndipu wangwamba kunyutuka ndi kudaniriza ukongwa, pavuli paki ungutuwamu. 27  Ŵanthu wosi anguzizwa ndipu angwamba kukambiskana ŵijaŵija kuti: “Ntchinthu wuli chachitika? Ntchisambizu chifya! Chinanga ndi mizimu yiheni watiyilamula mwamazaza ndipu yitimuvwiya.” 28  Ndipu nkhani yaki yinguwanda liŵi muvigaŵa vosi va ku Galileya. 29  Vati vaŵa viyo, angutuwamu musinagogi ndi kuluta kunyumba kwaku Simoni ndi Andireya ndipu ŵenga limoza ndi Yakobe kweniso Yohane. 30  Sonu apongozi aku Simoni angugona chifukwa angufunda muliŵavu,* ndipu nyengu yeniyo yiwu angukambiya Yesu kuti ama wo atama. 31  Wati waluta pafupi, wanguŵako pajanja ndikuŵayuska. Kufunda muliŵavu kungumaliya penipo, ndipu angwamba kuŵabikiya. 32  Ndi mazulu lumwi lati lasere, ŵanthu angwamba kuza kwaku iyu ndi ŵanthu wosi wo atamanga kweniso wo ŵenga ndi viŵanda. 33  Ndipu ŵanthu wosi a mutawuni yo anguwungana pakhomu lo. 34  Mwaviyo, wanguchizga ŵanthu anandi wo atamanga matenda ngakupambanapambana kweniso wangutuzga viŵanda vinandi ndipu wanguvizomereza cha kuti vilongoro, chifukwa vamuziŵanga kuti ndi Khristu.* 35  Ndi mlenjilenji kweche kamdima, wanguyuka ndi kutuliya kubwalu ndipu wanguluta kwakuyija. We kweniko wangwamba kupemphera. 36  Kweni Simoni ndi ŵanthu wo wenga nawu angwamba kumupenjapenja. 37  Ŵati amusaniya angumukambiya kuti: “Ŵanthu wosi atikupenjani.” 38  Kweni wanguŵakambiya kuti: “Tiyeni tiluti kunyaki, mumatawuni ngapafupi kuti nkhapharazgi so kweniko, chifukwa chenichi ndichu ndikuziya.” 39  Ndipu wanguluta kuchipharazga mumasinagogi ngawu mu Galileya mosi ndipuso watuzganga viŵanda. 40  Kweniko kunguza so munthu wamakhati, wangugwada ndi kumuŵeyere kuti: “Asani mukhumba, munganditowesa.” 41  Iyu wanguchita chitima, ndipu wangutambasuwa janja laki ndi kumukwaska, ndipu wangumukambiya kuti: “Ndikhumba! Towa.” 42  Nyengu yeniyo, makhati ngaki ngangumala ndipu wangutowa. 43  Pavuli paki, wangumukambiya kuti wakengi ndipu wangumukaniza mwanthazi 44  kuti: “Uwonesesi kuti ungakambiyanga weyosi cha, kweni luta kajilongo ku wasembi ndi kupereka vinthu vakulongo kuti watoweseka nge mo Dangu* laku Mozesi likambiya, kuti uje ukaboni kwaku yiwu.” 45  Kweni munthu yo wati waluta, wangwamba kukambakamba nkhani iyi ndipu yinguwanda ukongwa, mwakuti Yesu watondekanga kuseremu mwakufwatuka mutawuni yeyosi, kweni wajanga kubwalu kwakuyija. Chinanga kuti venga viyo, ŵanthu akutuliya muvigaŵa vosi azanga mbwenu kwaku iyu.

Mazu Ngam'mphata

Mazu ngaki chayingu, “panthazi pa chisku chaku.”
Pamwenga kuti, “waŵabizanga.”
Malu ngo Ayuda awungananga kuti apempheri ndi kuŵerenga Malemba.
Pamwenga kuti, “angutama maleliya.”
Panyaki kuti, “vamuziŵanga kuti iyu ndiyani.”
Wonani Mazu ngo Ngakonkhoskeka.