Machitidu 9:1-43

  • Saulo wachiluta ku Damasiko (1-9)

  • Hananiya watumika kuti wakawovyi Saulo (10-19a)

  • Saulo wapharazga vakukwaskana ndi Yesu ku Damasiko (19b-25)

  • Saulo waluta ku Yerusalemu (26-31)

  • Peturo wachizga Eneya (32-35)

  • Dorika yo wenga wakupaska, wayuskika (36-43)

9  Kweni Saulo wangutuna cha pa nkhani yakuwofyeza ndi kubaya akusambira ŵa Ambuya ndipu wanguluta kwa wasembi mura.  Iyu wanguluta kuchipempha makalata ngakuluta nangu kumasinagogi nga ku Damasiko kuti wakako munthulumi pamwenga munthukazi weyosi yo wenga wa Nthowa Yeniyi, ndi kuza nayu ku Yerusalemu.  Sonu Saulo walutanga ku Damasiko ndipu we pafupi kufika kweniko, ukweru wakutuliya kuchanya unguŵala posi po wenga.  Iyu wanguwa pasi ndipu wanguvwa mazu ngakuti: “Saulo, Saulo, utinditombozgiyanji?”  Saulo wangufumba kuti: “Ndimwi ayani Ambuya?” Iyu wangumuka kuti: “Ndini Yesu yo utimutombozga.  Kweni soka, sere mutawuni ndipu wamukuvwa vo utenere kuchita.”  Sonu ŵanthu wo wenga nawu anguma ŵaka jo kusoŵa chakukamba. Yiwu avwanga nadi mazu, kweni awonanga munthu weyosi cha.  Sonu Saulo wanguyuka ndipu chinanga kuti walereskanga kweni wawonanga kanthu cha. Yiwu angumuko pajanja ndi kuluta nayu ku Damasiko.  Ndipu kwa mazuŵa ngatatu wawonanga chechosi cha, waryanga cha pamwenga kumwa. 10  Ku Damasiko kwenuku kwenga wakusambira yo wadanikanga kuti Hananiya ndipu Ambuya angulongoro nayu mu chiwona kuti: “Hananiya!” Iyu wangumuka kuti: “Ndini panu Ambuya.” 11  Ambuya angumukambiya kuti: “Soka, luta kumsewu wo udanika kuti Wakunyoloka, ndipu ukapenji munthu yo wadanika kuti Saulo wa ku Tariso. Iyu we munyumba yaku Yudasi ndipu wapemphera. 12  Mu chiwona, iyu wawona kuti kutuza munthu yo wadanika kuti Hananiya ndipu waŵika manja ngaki paku iyu kuti wayambi so kuwona.” 13  Kweni Hananiya wangumuka kuti: “Ambuya ndavwa ku ŵanthu anandi vakukwaskana ndi munthu mwenuyu kweniso viheni vosi vo wakuchitiya akupaturika ŵinu ku Yerusalemu. 14  Ndipu po waziya kunu wapaskika mazaza ndi ŵara ŵa asembi kuti wamangi* wosi wo adaniya pa zina linu.” 15  Kweni Ambuya angumukambiya kuti: “Luta! chifukwa munthu uyu ntchiyaŵi changu chakusankhika kuti chipingiyi zina langu ku ŵanthu amitundu yinyaki, ku mafumu ndipuso kwa Ayisirayeli. 16  Pakuti ndimulongongi umamphaumampha masuzgu nganandi ngo wakumanengi nangu chifukwa cha zina langu.” 17  Sonu Hananiya wanguluta ndi kusere munyumba ndipu wanguŵika manja ngaki paku iyu ndi kukamba kuti: “Saulo, mubali wangu, Ambuya Yesu wo akuwoneke munthowa uchiza kunu, andituma ndi chilatu chakuti uyambi so kuwona ndipuso kuti uzaziki ndi mzimu wakupaturika.” 18  Nyengu yeniyo, vinthu vo vawonekanga nge mamba vingumbotoka kutuwa mumasu mwaki ndipu wangwamba so kuwona. Pavuli paki wangusoka ndipu wangubatizika. 19  Iyu wangurya chakurya ndipu nthazi zinguweriyamu. Ndipuso wanguja limoza ndi akusambira kweniko ku Damasiko kwa mazuŵa nganandiku. 20  Nyengu yeniyo wangwamba kupharazga mumasinagogi vakukwaskana ndi Yesu, kuti mwenuyu ndi Mwana waku Chiuta. 21  Kweni ŵanthu wosi wo amuvwanga anguzizwa ukongwa ndipu akambanga kuti: “Asi munthu uyu ndi yuwa watombozganga ŵanthu wo adaniyanga pa zina ili ku Yerusalemu? Asi waza kunu kuti waŵamangi* ndi kuluta nawu kwa ŵara ŵa asembi?” 22  Kweni Saulo wangulutirizga kusaniya nthazi ndipu waziziswanga Ayuda wo ajanga ku Damasiko, chifukwa wakambanga mwakuvwika umampha fundu zakusimikiziya kuti mwenuyu ndi Khristu. 23  Sonu pati pajumpha mazuŵa nganandi, Ayuda angumunozge chiŵembu kuti amubayi. 24  Kweni Saulo wanguziŵa chiŵembu cho angumunozge. Amukhazanga so mwakuphwere ukongwa mumageti msana ndi usiku kuti amubayi. 25  Sonu akusambira ŵaki angumuto ndi usiku ndipu angumusisiya pasi mwakugwiriskiya ntchitu chiteti kuporote pachizenji cho chenga pampanda. 26  Wati wafika ku Yerusalemu wanguyesesa kuti wachitiyengi limoza vinthu ndi akusambira, kweni wosi amuwopanga chifukwa agomezganga cha kuti nayu ngwakusambira. 27  Sonu Baranaba ndiyu wangumuwovya ndipu wanguluta nayu kwa akutumika. Iyu wanguŵakonkhoske mo wanguwone Ambuya munthowa kweniso kuti angulongoro nayu. Wanguŵakonkhoske so mo wanguŵereŵete mwachiganga mu zina laku Yesu ku Damasiko. 28  Sonu wangulutirizga kuja nawu ndipu wayendanga* mwakufwatuka mu Yerusalemu ndipuso walongoronga mwachiganga mu zina la Ambuya. 29  Iyu wakambiskananga ndi kususkana ndi Ayuda wo aŵereŵetanga Chigiriki, kweni yiwu apenjanga kumubaya. 30  Abali ŵati aziŵa venivi, anguluta nayu ku Kayisareya ndipu pavuli paki angumutumiza ku Tariso. 31  Kukamba uneneska, mpingu wosi ku Yudeya, ku Galileya ndi ku Samariya wenga mu nyengu yachimangu ndipu ungulutirizga kukho. Ndipu mpingu wo ungulutirizga kukuwa chifukwa chakuti wawopanga Yehova ndipuso wachiskikanga ndi mzimu wakupaturika. 32  Sonu Peturo wachiyenda muchigaŵa chosi, wanguza so kwa akupaturika wo ajanga ku Luda. 33  Kwenuku wangusaniyaku munthu munyaki yo wadanikanga kuti Eneya. Munthu mwenuyu wangugona pabedi kwa vyaka 8, chifukwa wenga wakufwa viŵalu. 34  Peturo wangumukambiya kuti: “Eneya, Yesu Khristu watikuchizga. Yuka, nozga bedi laku.” Ndipu nyengu yeniyo wanguyuka. 35  Ndipu ŵanthu wosi wo ajanga ku Luda ndi ku Chidika cha Sharoni ŵati amuwona, angugomezga mwa Ambuya. 36  Sonu ku Yopa kwenga wakusambira yo wadanikanga kuti Tabita kung’anamuwa kuti “Dorika.”* Iyu wachitanga vinthu vamampha vinandi ndipuso waperekanga mphasu zalisungu zinandi. 37  Kweni mu mazuŵa ngeningo, munthukazi mwenuyu wangutama ndipu wangufwa. Sonu angusambika thupi laki ndipu anguligoneka muchipinda chamuchanya. 38  Pakuti Luda wenga pafupi ndi Yopa, akusambira ŵati avwa kuti Peturo we mutawuni ya Luda, angutuma anthulumi ŵaŵi kuti akamupemphi kuti: “Chondi muzi kunu mwaliŵi.” 39  Peturo wangusoke nawu limoza nyengu yeniyo. Ndipu wati wafika, anguluta nayu muchipinda chamuchanya ndipu vyoko vosi vinguza kwaku iyu, vichiliya ndi kulongo malaya ndi mikhanju yo* Dorika wangusona weche wamoyu. 40  Peturo wangutuzgiya ŵanthu wosi kubwalu ndipu wati wajikama, wangupemphera. Pavuli paki wangung’anamukiya ko kwenga thupi ndipu wangukamba kuti: “Tabita, yuka!” Iyu wangubenuwa masu ngaki ndipu wati wawona Peturo, wanguja uja. 41  Peturo wangumuko pajanja ndi kumusoska. Iyu wangudana akupaturika ndi vyoko ndipu wangumupereka wamoyu kwaku yiwu. 42  Nkhani yeniyi yinguwanda mu Yopa mosi ndipu ŵanthu anandi angugomezga mwa Ambuya. 43  Peturo wangulutirizga kuja ku Yopa kwa mazuŵa ndipu wajanga ndi Simoni wakunyukuta vikopa.

Mazu Ngam'mphata

Mazu ngaki chayingu, “wamangi simbi.”
Mazu ngaki chayingu, “kuti waŵamangi simbi.”
Mazu ngaki chayingu, “waserenga ndi kutuwa.”
Zina la Chigiriki lakuti Dorika liyanana ndi la Chiaramu lakuti Tabita, ndipu ngosi ngaŵi ngang’anamuwa kuti, “Mbaŵa.”
Pamwenga kuti, “malaya ngakubwalu ngo.”