Machitidu 27:1-44

  • Paulo watenda ulendu wapanyanja kuluta ku Roma (1-12)

  • Sitima yisuzgika ndi chimphepu (13-38)

  • Sitima yisweka (39-44)

27  Sonu ŵati atikambiya kuti tiluti ku Itale, angupereka Paulo ndi akayidi anyaki mu manja mwaku Juliyasi mura wa asilikali, wa mugulu la asilikali la Ogasito.  Tingukwera sitima yakutuliya ku Adiramutiyo yo yenga pafupi kusoka kuluta mumadowoku ngamumphepeti mwa chigaŵa cha Asia. Sonu tingusoka ndipu Arisitako wa ku Tesalonika muchigaŵa cha Makedoniya wenga nasi limoza.  Mawa laki tingufika ku Sidoni ndipu Juliyasi wamuchitiyanga vinthu mwalisungu Paulo, kweniso wangumuzomereza kuluta kwa anyaki kuti akamuwovyengi.  Tati tatuwa kwenuku, tingwenda panyanja mumphepeti mwa chilwa* cha Kupuro mwenimo mphepu yazikangaku, chifukwa mphepu yo yenga panyanja yatitutuzgiyanga kuvuli.  Pavuli paki tingwenda mukati mwa nyanja cha ku Kilikiya ndi Pamfuliya ndipu tingufika padowoku la Mira ku Lukiya.  Kwenuku, mura wa asilikali wangusaniya sitima yakutuliya ku Alekizandiriya yo yalutanga ku Itale ndipu wangutikweza yeniyo.  Tati tayenda kamanakamana kwa mazuŵa nganandiku, tingufika ku Kinido mwakusuzgikiya. Chifukwa chakuti mphepu yingutitondekesa kuluta ko talutanga, tingwende kufupi ndi ku Salimone mumphepeti mwa chilwa* cha Kirete mwenimo mphepu yazikangaku.  Tati tayenda mwakusuzgikiya mumphepeti mwa chilwa* chenichi, tingufika pamalu ngo ngadanika kuti Jiti Lamampha, lo lenga pafupi ndi tawuni ya Laseya.  Sonu pangujumpha nyengu yitaliku ndipu kwenda pamaji kwenga kwakofya pa nyengu iyi, chifukwa nyengu yakufunga ya Zuŵa Lakubenekere Maubudi nayu ndipu yamala kali. Mwaviyo Paulo wanguŵatcheŵeska 10  kuti: “Mwaŵanthu ndiwona kuti ulendu uwu unangisengi ndipuso kutayisa katundu ndi sitima pe cha, kweni utayisengi so maumoyu ngidu.” 11  Kweni mura wa asilikali wanguvwiya wakwendesa sitima ndipuso mweneku wasitima, mumalu mwakuvwiya vo Paulo wakambanga. 12  Pakuti pajiti ili penga pamampha cha kujapu mu chipwepwi, ŵanthu anandi angukamba kuti tituweku kuti akawoni asani ku Fonikisi kungaŵa kwamampha kujaku mu chipwepwi. Fonikisi ndi jiti la pachilwa* cha Kirete lo likulazga kumpotu cha kuvuma ndipuso kumwera cha kuvuma. 13  Mphepu yakutuliya kumwera yati yayamba kugowoka, anguŵanaŵana kuti vo akhumbanga vifiskikengi ndipu anguzuwuwa ndondowa ndi kwamba kwenda mumphepeti mwa chilwa* cha Kirete kufupi ndi kumutunda. 14  Kweni pati pajumpha kanyengu kamanavi, chimphepu chanthazi chakutuliya kuvuma* chingwamba kututuzgiya kuvuli sitima yo. 15  Pakuti mphepu yenga yikulu, sitima yasuzgikanga ukongwa kwenda mwakuti yingutondeka kuluta ko kwatuwanga mphepu. Mwaviyo tinguyileka ndipu tapingikanga ŵaka nayu. 16  Pavuli paki tingwamba kwenda mumphepeti mwa kachilwa* kanyaki ko kadanika kuti Kauda mwenimo mphepu yazikangaku, kweni kaboti* ko angukamangiriya kuvuli kwa sitima katondekanga kwenda umampha. 17  Ŵati akakweza musitima angukamangiriya ndi vingwi ndipu chifukwa chakuti awopanga kusere pachipari cha ku Suriti,* angusiska vingwi va thanga ndipu tapingikanga ŵaka nayu. 18  Mawa laki, angwamba kutaya katundu kuti sitima yipepukeku chifukwa chakuti mphepu yatitutuzganga mwanthazi. 19  Pa zuŵa lachitatu, angwamba kutaya ŵija vinthu vakumangiya sitima. 20  Lumwi ndi nyenyezi vinguleka kuwoneka kwa mazuŵa nganandi ndipu mphepu yanthazi yatitutuzganga ukongwa, mwakuti maŵanaŵanu ngosi ngakuti tingapona ngangwamba kumala. 21  Ŵati aja kwambula kurya kwa mazuŵa nganandi, Paulo wangusoka pakati pawu ndi kukamba kuti: “Mwaŵanthu, asani munguvwiya ulongozgi wangu kuti tileki kunyamuka ulendu wapanyanja kutuwa ku Kirete, mphanyi vinthu vanangika viyo cha ndi kutayika. 22  Kweni chinanga kuti ve viyo, nditikukambiyani kuti mukhwimi mtima, chifukwa palivi chinanga njumoza waku yimwi yo wafwengi, sitima pe ndiyu yiswekengi. 23  Usiku wunu mungelu waku Chiuta yo nditimusopa kweniso yo nditimuchitiya uteŵeti wakupaturika, wanguma pafupi nani 24  ndipu wangundikambiya kuti: ‘Ungawopanga cha Paulo. Utenere kuchiwoneke pa masu paku Kayisara ndipu awona! Chiuta wakutaskengi limoza ndi ŵanthu wo we nawu musitima.’ 25  Mwaviyo khwimani mtima mwaŵanthu, chifukwa ndigomezga Chiuta kuti vinthu vichitikengi ndendende nge mo mungelu wandikambiya. 26  Kweni sitima yamusweka pachilwa chinyaki.” 27  Sonu pa usiku wa 14 tichisewasewa ŵaka pa Nyanja ya Adiriya, pakati pa usiku akwendesa sitima angwamba kuŵanaŵana kuti te pafupi kufika ku mtunda. 28  Ŵati apima angusaniya kuti pe mamita pafufupi 36* kufika pasi. Ŵati alutiriyaku kamanavi angupima so ndipu angusaniya kuti pe mamita pafufupi 27* kufika pasi. 29  Chifukwa cha kopa kumwantha mya, anguponya ndondowa zinayi zakuvuli ndipu akhumbisiskanga kuti mphanyi kungucha. 30  Kweni akwendesa sitima akhumbanga kuthaŵamu, ndipu asisiyanga kaboti mumaji achipusikiziya kuti akhumba kuchiponya ndondowa zakunthazi. 31  Paulo wangukambiya mura wa asilikali ndi asilikali kuti: “Asani ŵanthu yaŵa aleka kuja munu musitima, muponengi cha.” 32  Sonu asilikali angudumuwa vingwi vakumangiya kaboti ndipu angukaleka kuti kakengi. 33  Sonu chakumatandakucha, Paulo wanguŵachiska wosi kuti aryi. Iyu wanguŵakambiya kuti: “Msanawale ndi zuŵa la nambala 14 kulindizga kuti kuwengenji, ndipu mwaja kwambula kurya chechosi. 34  Sonu nditikuchiskani kuti muryeku chakurya. Venivi viwovyengi kuti vikuyendiyeni umampha, chifukwa chinanga ndi sisi limoza la kumutu kwa munthu weyosi waku yimwi linangikengi cha.” 35  Wati wakamba venivi, wanguto chiŵandi, wanguwonga kwaku Chiuta pa masu paku wosi, wangumenya ndi kwamba kurya. 36  Mwaviyo wosi anguchiskika ndipu nawu angwamba kurya. 37  Musitima iyi tengamu taŵanthu 276. 38  Ŵati arya chakurya chakukwana ndi kuguta, angwamba kutaya munyanja tirigu yo wenga musitima kuti yipepukeku. 39  Kwati kwacha anguziŵaku cha ko tenga, kweni anguwona dowoku la mchenga ndipu anguŵanaŵana kuti asani angafiska akayikochezi penipo sitima. 40  Sonu angudumuwa ndondowa ndipu zinguwiya munyanja ndipu pa nyengu yeniyo angufwatuwa so vingwi va nkhafu. Sonu ŵati akweze muchanya thanga lakunthazi, angulazga kulikumba. 41  Ŵati asere muchipali cho chenga po pakumananga mayiŵa, angusere mumchenga ndipu sitima yinguphata kunthazi mwakuti yayendanga cha. Sitima yo yingwamba kuvikitika kuvuli chifukwa cha mayiŵa. 42  Venivi vati vachitika, asilikali akhumbanga kubaya akayidi kuti paŵevi yumoza wakuti wasambiri ndi kuthaŵa. 43  Kweni mura wa asilikali wakhumbisiskanga kuti Paulo wakamufikisi umampha ndipu wanguŵakaniza kuti angaŵabayanga cha. Iyu wangulamula kuti wosi wo aziŵanga kusambira, andwikiyi munyanja kuti ndiwu akayambi kufika kumutunda 44  ndipu anyaki wosi alondongi muvuli, anyaki pamathabwa penipo anyaki pa vibanthu va sitima yo. Mwaviyo wosi angufika umampha kumutunda.

Mazu Ngam'mphata

Anyaki akamba kuti, “chilumba.”
Anyaki akamba kuti, “chilumba.”
Anyaki akamba kuti, “chilumba.”
Anyaki akamba kuti, “chilumba.”
Anyaki akamba kuti, “chilumba.”
Mphepu iyi yadanikanga kuti Yurakulo.
Anyaki akamba kuti, “chilumba.”
Kaboti ko ŵanthu ataskikiyangamu pa ngozi.
Wonani Mazu ngo Ngakonkhoskeka.
Mafatomu 20 (mafiti 120).
Mafatomu 15 (mafiti 90).