Machitidu 20:1-38

  • Paulo ku Makedoniya kweniso ku Girisi (1-6)

  • Utiko wayuskika ku Trowa (7-12)

  • Atuwa ku Trowa aluta ku Mileto (13-16)

  • Paulo wakumana ndi ŵara a ku Efeso (17-38)

    • Kusambiza kunyumba ndi nyumba (20)

    • “Kupaska kuchitiska kuti munthu wakondwengi ukongwa” (35)

20  Chivulupi chati chamala, Paulo wangudanisa akusambira. Iyu wanguŵachiska, pavuli paki wangulayirana nawu ndipu wangwamba ulendu waki wakuluta ku Makedoniya.  Wati waluta muvigaŵa venivo, wangukamba vinthu vinandi vakuchiska ŵanthu a kweniko ndipu wangufika ku Girisi.  Kwenuku wangujaku myezi yitatu, kweni wanguŵanaŵana kuwere ku Makedoniya pakuti Ayuda angumunozge chiŵembu we pafupi kwenda ulendu wapanyanja kuluta ku Siriya.  Iyu wangulutiya limoza ndi Sopatara mwana waku Puro wa ku Bereya, Arisitako ndi Sekundo a ku Tesalonika, Gayo wa ku Debe, Timote, kweniso Tukiko ndi Tirofimo akutuliya muchigaŵa cha Asia.  Ŵanthu ŵenaŵa angudanjiyapu ndipu atilindizganga ku Trowa.  Kweni mazuŵa nga Viŵandi Vambula Chakutupisa ngati ngamala, tingwenda ulendu wapanyanja kutuwa ku Filipi ndipu pati pajumpha pafufupi mazuŵa ngankhondi, tingufika ku Trowa ko ŵenga. Kweniko tingujaku mazuŵa 7.  Pa zuŵa lakwamba la Sabata yo, tati tawungana kuti tiryi chakurya, Paulo wangwamba kukambiskana nawu pakuti wanyamukanga zuŵa lamawa laki. Ndipu wangulongoro kwa nyengu yitali mpaka pakati pa usiku.  Sonu muchipinda chamuchanya cho tinguwunganamu, mwenga vakumbulikiya vinandiku.  Paulo wachilutirizga kulongoro, mnyamata munyaki yo wadanikanga kuti Utiko wanguja pawindu ndipu tulu tingumuko. Sonu wati wagona ukongwa, wanguwa pasi kutuwa panyumba yachitatu yakuyerekana ndipu angumuto wafwa. 10  Kweni Paulo wangusikiya pasi, wangujiponya pa mnyamata yo ndi kumuvumbatiya ndipu wangukamba kuti: “Lekani kuliya chifukwa ngwamoyu.” 11  Pavuli paki wanguluta so munyumba yamuchanya ndipu wangwamba kumenya chiŵandi ndi kurya. Iyu wangulutirizga kukambiskana nawu kwa nyengu yitali mpaka mlenji ndipu pavuli paki wangusoka. 12  Sonu mnyamata yo, angumunyamuwa wamoyu ndipu angupembuzgika ukongwa. 13  Sonu tingudanjiyapu kuluta kunyanja ko kwenga sitima. Tingwenda ulendu wapanyanja kuluta ku Aso kweniko takhumbanga kuchito Paulo chifukwa wati watikambiya venivi, iyu wakhumbanga kuluta kweniko wapasi. 14  Sonu wati watisaniya ku Aso, wangukwera nasi ndipu tinguluta ku Mitulene. 15  Tati tayenda ulendu wapanyanja, mawa laki tingufika ku Kiyo. Kweni tati tatuwa kwenuku, mawa laki tingufika ku Samo. Ndipu mawa laki so tingufika ku Mileto. 16  Paulo wakhumbanga kwenda ulendu wapamaji kuti ku Efeso wajumphiriyeku ŵaka ndi chilatu chakuti waleki kumaliya nyengu muchigaŵa cha Asia, pakuti wathaŵiriyanga ku Yerusalemu kuti asani wangafiska wakasaniriki pa Phwandu la Pentekositi. 17  Kweni we ku Mileto, wangutuma uthenga ku Efeso ndipu wangudana ŵara a mpingu. 18  Ŵati ŵaza kwaku iyu wanguŵakambiya kuti: “Muziŵa umampha mo ndachitiyanga namwi kutuliya pa zuŵa lakwamba lo ndingufika muchigaŵa cha Asia. 19  Ndateŵetiyanga Ambuya nge kapolu mwakujiyuyuwa ukongwa. Ndachitanga venivi ndi masozi kweniso mayeseru ngo ngandiwiyanga chifukwa cha viŵembu vo Ayuda angundinozge. 20  Muziŵa so kuti ndinguleka cha kukukambiyani vinthu vakukuwovyani pamwenga kukusambizani pakweru kweniso kunyumba ndi nyumba. 21  Kweni ndingupereka ukaboni mwakukwana kwa Ayuda ndi Agiriki kuti alapi ndi kung’anamukiya kwaku Chiuta ndipuso kuti aje ndi chivwanu mwa Ambuya Yesu. 22  Kweni sonu awonani! mwakuchichizgika ndi mzimu ndiluta ku Yerusalemu chinanga kuti ndiziŵa cha vo vakundichitikiya kweniko. 23  Kweni chinthu chimoza cho ndiziŵa ntchakuti mumatawuni ngakupambanapambana, mzimu wakupaturika utindilongo ukaboni mwakuwerezawereza kuti kumangika kweniso masuzgu vitindilindizga. 24  Chinanga kuti vingaŵa viyo, umoyu wangu nditiwuwona nge kanthu cha.* Kweni chija cho ndikhumba nkhumaliza ulendu wangu kweniso uteŵeti wo ndikulonde kwa Ambuya Yesu, kuti ndipereki ukaboni mwakukwana wa uthenga wamampha wa wezi ukulu waku Chiuta. 25  “Ndipu sonu awonani! ndiziŵa kuti mosi yimwi ndikukupharazgiyani Ufumu, mwazakuchiwona so cha chisku changu. 26  Sonu msanawale ndakudanani kuti muje akaboni ŵangu kuti ndilivi mulandu wa ndopa za munthu weyosi. 27  Pakuti ndinguleka cha kukukambiyani khumbu losi laku Chiuta. 28  Jiphweriyeni mwaŵeni ndipuso phweriyani mskambu wosi wa mbereri, chifukwa mzimu wakupaturika wakuŵikani kuti muje akuwonere mskambu wo, kuti muliski mpingu waku Chiuta wo wakuwugula ndi ndopa za Mwana waki. 29  Ndiziŵa kuti asani ndatuwapu ini, mphumphi zakukandirizga zazamusere pakati pinu ndipu zazakuwuchitiya nkhaza mskambu wa mbereri. 30  Ndipuso pakati pinu pazamuyuka ŵanthu ndipu azamukwamba kukamba vinthu vakulandizga kuti apatuskiyi akusambira kwaku yiwu. 31  “Mwaviyo, jani masu ndipu ziŵani kuti kwa vyaka vitatu ndinguleka cha kulunguchizga weyosi waku yimwi ndipu ndachitanga venivi ndi masozi. 32  Ndipu sonu nditikuperekani kwaku Chiuta ndipuso ku mazu ngaki nga wezi ukulu, mazu ngo ngangakuzengani ndi kukupaskani chihara pakati pa akupaturika wosi. 33  Ndingukhumbira cha siliva, golidi pamwenga chakuvwala cha munthu weyosi. 34  Yimwi mwaŵeni muziŵa kuti ndagwiranga ntchitu ndi manja ngangu kuti ndisaniyengi vinthu vo ndakhumbikanga kweniso va ŵanthu wo ndayendanga nawu. 35  Ndakulongoni mu vinthu vosi kuti mwakugwira ntchitu mwaphamphu viyo, mutenere kovya ambula nthazi ndipuso mukumbukengi mazu ngo Ambuya Yesu angukamba ŵija kuti: ‘Kupaska kuchitiska kuti munthu wakondwengi ukongwa kuluska kulonde.’” 36  Wati wakamba venivi, wangujikama limoza ndi wosi ndipu wangupemphera. 37  Ŵanthu wosi angwamba kuliya ukongwa, anguvumbatiya Paulo* ndipuso angumufyofyontha mwachanju, 38  chifukwa anguchita chitima ukongwa ndi mazu ngo wangukamba ngakuti azakuchiwona so cha chisku chaki. Pavuli paki angumuperekeza ku sitima.

Mazu Ngam'mphata

Pamwenga kuti, “nge wambula kuzirwa kwaku ini.”
Mazu ngaki chayingu, “angubalamatiya mukhosi mwaku Paulo.”