Machitidu 1:1-26

  • Mazu kwaku Teyofilo (1-5)

  • Akaboni mpaka kukumaliya kwa charu chapasi (6-8)

  • Yesu wakwera kuchanya (9-11)

  • Akusambira awungana pamoza mwakukoliyana (12-14)

  • Matiyasi wasankhika kuti wasere mumalu mwaku Yudasi (15-26)

1  Yimwi a Teyofilo, mu nkhani yakwamba, ndikulemba vinthu vosi vakukwaskana ndi vo Yesu wangwamba kuchita ndi kusambiza,  mpaka pa zuŵa lo wangutoleke kuchanya, wati wamaliza kupereka ulongozgi kuziya mu mzimu wakupaturika kwa akutumika wo wangusankha.  Pavuli pa masuzgu ngo wangukumana nangu, wangujilongo kwaku yiwu wamoyu, mwa maukaboni nganandi ngakusimikizika. Yiwu angumuwona kwa mazuŵa 40, ndipu wakambanga vakukwaskana ndi Ufumu waku Chiuta.  Pa nyengu yo wangukumana nawu, wanguŵalamula kuti: “Mungatuwangamu cha mu Yerusalemu, kweni lutirizgani kulindizga cho Ada akulayizga, cho mukuvwa kwaku ini.  Pakuti mbuneneska kuti Yohane wabatizanga ndi maji, kweni yimwi mubatizikengi ndi mzimu wakupaturika pambula kuswera yapa.”  Sonu ŵati awungana, angumufumba kuti: “Ambuya, kumbi muweziyengi ufumu kwa Ayisirayeli sonu?”  Iyu wanguŵakambiya kuti: “Nkhwaku yimwi cha kuziŵa nyengu ndi mazuŵa ngakuŵikika ngo Ada aŵika mu muwusu wawu.  Kweni mwazamulonde nthazi po mzimu wakupaturika wazamukuza paku yimwi ndipu mwazamuja akaboni ŵangu mu Yerusalemu, mu Yudeya mosi ndi mu Samariya mpaka kukumaliya kwa charu chapasi.”  Wati wakamba vinthu venivi, wangunyamulikiya muchanya yiwu achilereska ndipu mtambu ungumubisa mwakuti angumuwona so cha. 10  Iyu wachiluta kuchanya, yiwu alereseskanga kuchanya ndipu mwamabuchibuchi, ŵanthu ŵaŵi wo anguvwala malaya ngatuŵa anguma pafupi nawu. 11  Ŵanthu wo, angukamba kuti: “Mwaŵanthu a ku Galileya yimwi, ntchifukwa wuli mwama ndi kulereska kuchanya? Yesu mwenuyu yo watoleka kwaku yimwi kuluta kuchanya, wazamukuza so mu nthowa yakuyanana ŵaka nge mo mwamuwone wachiluta kuchanya.” 12  Pavuli paki, anguwere ku Yerusalemu kutuwa kuphiri lo ladanikanga kuti Phiri la Maolivi, lo le pafupi ndi Yerusalemu, mtunda wakuyanana ndi wo munthu wazomerezekanga kwenda pa zuŵa la sabata. 13  Ŵati afika ku Yerusalemu, anguluta muchipinda chamuchanya mo ajanga. Mwenimo mwenga Peturo, Yohane, Yakobe, Andireya, Filipu, Tomasi, Batolomeyu, Mateyu, Yakobe mwana waku Alifeyu, Simoni yo wadanika kuti waphamphu ndipuso Yudasi mwana waku Yakobe. 14  Pakuŵa ndi chilatu chimoza, wosi yaŵa apempheranga mwaphamphu. Ŵenga limoza ndi anthukazi anyaki, Mariya nyina waku Yesu ndi avurwa aku Yesu. 15  Mu mazuŵa ngeningo, Peturo wanguma pakati pa abali (ŵanthu wosi ŵengapu pafufupi 120) ndipu wangukamba kuti: 16  “Mwaŵanthu, abali ŵangu, penga pakwenere kuti lemba lifiskiki lo mzimu wakupaturika ungukamba mwa uchimi kuporote mwaku Davidi, vakukwaskana ndi Yudasi yo wangulongozga ŵanthu wo angumanga Yesu. 17  Chifukwa wenga yumoza waku isi ndipu wateŵetiyanga nasi limoza. 18  (Ndipu munthu mwenuyu wakugula munda ndi malipiru ngambula urunji kweniso wanguwa kapingizgori, liŵavu laki linguphumuka* ndipu vamukati mwaki vingukhutuka. 19  Nkhani yeniyi yinguziŵika ku ŵanthu wosi akuja mu Yerusalemu, mwakuti munda wo, mu chineneru chawu anguwudana kuti Akedama, kung’anamuwa kuti, “Munda wa Ndopa.”) 20  Pakuti vikulembeka mubuku la Masalimo kuti, ‘Malu ngaki ngakujapu ngaje mahami, ndipu pamalu po, pangajanga so munthu cha’ ndipuso kuti, ‘Udindu waki nge wakuwonere, utoleki ndi munthu munyaki.’ 21  Mwaviyo mphakwenere kuti pa anthulumi wo ayendanga nasi pa nyengu yosi yo Ambuya Yesu agwiranga ntchitu zawu* pakati pidu, 22  kwambiya po Yohane wanguŵabatiziya mpaka pa zuŵa lo angutoleke kuchanya kutuwa pakati pidu, yumoza wa ŵanthu ŵenaŵa waje kaboni wa kuyuskika kwaki, limoza ndi isi.” 23  Sonu yiwu angusachizga ŵanthu ŵaŵi, Yosefi yo wadanikanga kuti Barasaba, yo wadanikanga so kuti Yusito ndi Matiyasi. 24  Pavuli paki, yiwu angupemphera kuti: “Yimwi Yehova, muziŵa mitima ya ŵanthu wosi, tilongoni munthu yo mwasankha pakati pa ŵanthu ŵaŵi yaŵa, 25  kuti wato uteŵeti uwu ndipuso malu yanga nga wakutumika ngo Yudasi wakungaleka ndi kwende nthowa yaki.” 26  Sonu anguchita mayeri paku yiwu, ndipu mayeri ngo nganguwiya Matiyasi. Mwaviyo wangusazgika* pa gulu la akutumika 11.

Mazu Ngam'mphata

Pamwenga kuti, “wanguphumuka pakati.”
Mazu ngaki chayingu, “aserenga ndi kutuwa.”
Kung’anamuwa kuti amuwonanga nge mo awoniyanga akutumika anyaki 11.