Luka 8:1-56

  • Anthukazi atende limoza ndi Yesu (1-3)

  • Ntharika ya wakumija (4-8)

  • Chifukwa cho Yesu wagwiriskiyanga ntchitu ntharika (9, 10)

  • Wakonkhoska ntharika ya wakumija (11-15)

  • Nyali atiyibenekere cha (16-18)

  • Anyina ndi avurwa aku Yesu (19-21)

  • Yesu wakanizga chimphepu (22-25)

  • Yesu watuma viŵanda mu nkhumba (26-39)

  • Mwana munthukazi waku Yairo; Munthukazi wako laya lakubwalu laku Yesu (40-56)

8  Wati wajapu kamanavi, Yesu wangwamba kwenda tawuni ndi tawuni kweniso muzi ndi muzi kupharazga ndi kumemeza uthenga wamampha wa Ufumu waku Chiuta. Iyu wenga limoza ndi akutumika 12,  kweniso wenga ndi anthukazi anyaki wo wanguŵatuzga mizimu yiheni ndi kuŵachizga matenda. Penga: Mariya yo wadanikanga kuti Mmagadala yo wangutuzgika viŵanda 7;  Jowana muwolu waku Chuza yo wenga kapitawu waku Herodi; Suzana kweniso anthukazi anyaki anandi. Wosi ŵenaŵa aŵateŵetiyanga ndi chuma chawu.  Sonu chigulu cha ŵanthu chati chawungana limoza ndi ŵanthu wo azanga kwaku Yesu kutuwa mumatawuni ngakupambanapambana, wangwamba kulongoro mwakugwiriskiya ntchitu ntharika ndipu wanguti:  “Wakumija mbewu wanguluta kuchimija mbewu yaki. Wachimija, mbewu yinyaki yinguwa mumphepeti mwa msewu ndipu yingukandika kweniso tiyuni to taphululukanga muchanya tinguza ndi kurya.  Yinyaki yinguwa pajalawi ndipu yati yabuka yingumila chifukwa pengavi mtika.  Mbewu yinyaki yinguwa muminga ndipu yingufinyikizika ndi minga yo yakuliyanga nayu limoza.  Kweni yinyaki yinguwa padongu lamampha, ndipu yati yakuwa yingupasa vipasu 100.” Wati wakamba venivi wangudaniriza kuti: “Yo we ndi makutu kuti wavwi, wavwi.”  Kweni akusambira ŵaki angumufumba vo ntharika iyi ying’anamuwa. 10  Iyu wanguŵakambiya kuti: “Yimwi mwapaskika mwaŵi wakuvwisa visisi vakupaturika va Ufumu waku Chiuta. Kweni ku ŵanthu anyaki wosi, vinthu vosi vikambika mwantharika, kuti chinanga kuti awona, kuwona kwawu nkhwaŵaka, chinanga kuti atuvwa, awamu cha. 11  Sonu ntharika iyi ying’anamuwa ivi: Mbewu, ndi mazu ngaku Chiuta. 12  Mbewu yo yinguwa mumphepeti mwa msewu, mbanthu wo atuvwa mazu ndipu Dyaboli watuza ndi kutuzgamu mazu ngo mumitima yawu, kuti aleki kugomezga ndi kutaskika. 13  Mbewu yo yingumijika pajalawi, mbanthu wo atuvwa mazu ndipu atingalonde mwalikondwa kweni aŵavi misisi. Atingagomezga kwa kanyengu kamanavi, kweni asani ateseka aleka kugomezga. 14  Mbewu yo yinguwa muminga, mbanthu wo atuvwa mazu kweni atimbanyizgika ndi vakufipiska mtima, chuma kweniso vakukondwesa va umoyu wunu. Yiwu afinyikizikiya limu ndipu apasa chipasu chechosi cha chamampha. 15  Penipo mbewu yo yinguwa padongu lamampha, mbanthu wo asani avwa mazu ndi mtima wamampha ukongwa, atingasunga ndipu apasa vipasu mwakukunthiyapu. 16  “Palivi munthu yo wabusa nyali ndi kuyibenekere ndi chiyaŵi pamwenga kuyiŵika kusi kwa bedi, kweni watiyiŵika pachakuŵikapu nyali kuti ŵanthu wosi wo asere munyumba awoni ukweru. 17  Pakuti palivi chinthu chakubisika cho chazamuleka kuwoneka, kweniso palivi chinthu chakubisika umampha cho chazamuleka kuziŵika ndipuso cho chazamuleka kuvumbulika. 18  Mwaviyo muvwisiyengi mwakuphwere, chifukwa weyosi yo wenavu, wapaskikengi vinandi ndipu yo walivi, walondekengi chinanga ndi vo waŵanaŵana kuti wenavu.” 19  Anyina ndi avurwa ŵaki anguza kwaku iyu, ndipu angutondeka kufika pafupi nayu chifukwa cha chigulu cha ŵanthu. 20  Sonu ŵanthu angumukambiya kuti: “Anyinamwi ndi avurwa ŵinu ama kubwalu, akhumba kuwonana namwi.” 21  Yesu wanguŵamuka kuti: “Ama ndi avurwa ŵangu ndi yaŵa, wo atuvwa mazu ngaku Chiuta ndi kungachita.” 22  Zuŵa linyaki, iyu ndi akusambira ŵaki angukwera boti ndipu wanguŵakambiya kuti: “Tiyeni tiyambukiyi kusirya linyaki la nyanja.” Ndipu angwambapu ulendu wo. 23  Kweni achiluta, Yesu wangugona. Ndipu pa nyanja pangwamba chimphepu, boti lawu lingwamba kuzaza maji ndipu linguja kamanavi kubira. 24  Sonu anguluta kuchimuyuska ndipu angukamba kuti: “Msambizi, Msambizi, titufwa!” Ŵati amuyuska, wanguchenya mphepu ndi mayiŵa ndipu vinguleka kweniso nyanja yingugona. 25  Pavuli paki, iyu wanguŵafumba kuti: “Ntchifukwa wuli mulivi chivwanu?” Kweni yiwu anguchita mantha ndipuso anguzizwa ukongwa. Yiwu akambiskananga kuti: “Ndi munthu wamtundu wuli uyu? Chifukwa iyu walamula chinanga ndi mphepu kweniso maji ndipu vitimuvwiya.” 26  Ndipu angusikiya mumphepeti mwa nyanja kuchigaŵa cha Agerasa, kusirya linyaki la Galileya. 27  Yesu wati wafika kumtunda, munthu munyaki wakweniko yo wenga ndi mizimu yiheni wangukumana nayu. Kwa nyengu yitali wajanga ŵaka kwambula kuvwala ndipuso wajanga munyumba cha, kweni mumiwunda.* 28  Wati wawona Yesu, wangudaniriza ndi kuwa panthazi paki. Iyu wangudaniriza kuti: “Ndakunangiyaninji Yesu, Mwana waku Chiuta Wapachanya Limu? Nditikupemphani kuti munganditombozganga cha.” 29  (Chifukwa Yesu walamulanga mzimu uheni kuti utuwi mu munthu yo. Mzimu wo wamuyukiyanga kaŵikaŵi,* ndipu mwakuwerezawereza amumanganga ndi matcheni kweniso matangaza ndipuso amuŵikiyanga alonda. Kweni iyu wadomonga vo amumangiyanga ndipu mzimu wo wamuchitiskanga kuluta kwakuyija.) 30  Yesu wangumufumba kuti: “Zina laku ndiwi yani?” Iyu wanguti: “Ndini Mzinda,” pakuti viŵanda vinandi vingusere mwaku iyu. 31  Viŵanda vo vaŵeyeriyanga Yesu kuti waleki kuvilamula kuti viluti kuchizenji. 32  Sonu mskambu ukulu wa nkhumba waryanga paphiri, ndipu vingumuŵeyere kuti wavizomerezi kusere mu nkhumba zo ndipu Yesu wanguvizomereza. 33  Pavuli paki, viŵanda vo vingutuwa mu munthu yo, vingusere mu nkhumba ndipu mskambu wosi ungugodoboke kuchinkhwawu* mpaka munyanja ndipu zingubira. 34  Kweni aliska a nkhumba zo ŵati awona vo vinguchitika, anguthaŵa ndi kuchikamba mutawuni kweniso mumizi. 35  Ndipu ŵanthu anguluta kuchiwona vo vinguchitika. Anguza kwaku Yesu ndipu angusaniya kuti munthu yo wangutuzgika viŵanda, wavwala malaya, ngwazeru zaki kweniso waja kumaphazi ngaku Yesu, ndipu ŵanthu wo anguchita mantha ukongwa. 36  Ŵanthu wo anguwona, anguŵakonkhoske vo vinguchitika kuti munthu waviŵanda yo wachizgiki. 37  Sonu ŵanthu anandi akutuliya muvigaŵa vosi va Agerasa angupempha Yesu kuti watuweku chifukwa anguchita mantha ukongwa. Yesu wangukwera boti ndi kutuwaku. 38  Kweni munthu yo wangutuzgika viŵanda wapemphanga Yesu kuti walutiyi nayu limoza, kweni Yesu wangumukaniza ndipu wangumukambiya kuti: 39  “Lutanga kunyumba kwaku ndipu ukakambiyengi ŵanthu vo Chiuta wakuchitiya.” Mwaviyo wanguluta ndipu wakambiyanga ŵanthu mutawuni yosi vo Yesu wangumuchitiya. 40  Yesu wati wawere ku Galileya, chigulu cha ŵanthu chingumulonde umampha chifukwa ŵanthu wosi amulindizganga. 41  Kweni awonani! munthu munyaki yo wadanikanga kuti Yairo wanguza kwaku iyu. Iyu wenga mulongozgi wa sinagogi. Wanguwa pamaphazi ngaku Yesu ndipu wangwamba kumuŵeyere kuti walutiyi nayu limoza kunyumba yaki, 42  chifukwa mwana waki yumoza pe munthukazi wa vyaka pafufupi 12, wenga pafupi kufwa. Yesu wachiluta, chigulu cha ŵanthu chingundonde kweniko. 43  Sonu kwenga munthukazi munyaki yo watamanga nthenda yakusuluwa ndopa kwa vyaka 12, ndipu pengavi munthu yo wangufiska kumuchizga. 44  Wanguza kumsana kwaku Yesu ndi kuko mphonji za laya laki lakubwalu, ndipu nyengu yeniyo, ndopa zinguleka kusuluwa. 45  Yesu wangukamba kuti: “Ndiyani yo wandikwaska?” Ŵanthu wosi akananga ndipu Peturo wangukamba kuti: “Msambizi, mwe mukati mwa chigulu cha ŵanthu ndipuso atikufinyikizani.” 46  Kweni Yesu wangukamba kuti: “Munthu munyaki wandikwaska, chifukwa ndawona kuti nthazi zatuwa mwaku ini.” 47  Munthukazi yo wati wawona kuti waziŵika, wanguza uku wanjekeme ndipu wanguwa panthazi paku Yesu ndi kukamba pa masu pa ŵanthu wosi chifukwa cho wamukwaskiya, kweniso mo wachizgikiya mwaliŵi. 48  Kweni wangumukambiya kuti: “Mwana wangu, chivwanu chaku chakuchizga. Luta mu chimangu.” 49  Yesu weche kulongoro, munthu munyaki wa kunyumba kwa mulongozgi wa sinagogi wanguza ndi kukamba kuti: “Mwana winu wafwa, lekani kumusuzga Msambizi.” 50  Yesu wati wavwa venivi, wangukambiya Yairo kuti: “Ungawopanga cha, ja ŵaka ndi chivwanu, ndipu mwana waku wataskikengi.” 51  Wati wafika kunyumba, wanguzomereza cha kuti ŵanthu asere munyumba yo kupatuwaku Peturo, Yohane, Yakobe kweniso awisi ndi anyina a msungwana yo. 52  Kweni ŵanthu wosi amuliyanga ndi kujipuma pachifuŵa chifukwa cha chitima. Sonu Yesu wangukamba kuti: “Lekani kuliya, pakuti wafwa cha kweni wagona.” 53  Ŵati avwa venivi, angwamba kumuseka mwachipongu, chifukwa anguziŵa kuti wafwa. 54  Kweni Yesu wangumuko pajanja ndipu wangumudana kuti: “Wamwana, yuka!” 55  Ndipu mzimu waki unguweriyamu,* wanguyuka nyengu yeniyo ndipu Yesu wangulamula kuti amupaski chakurya. 56  Apapi ŵaki angukondwa ukongwa, kweni Yesu wanguŵakambiya kuti angakambiyanga munthu weyosi cha vo vachitika.

Mazu Ngam'mphata

Pamwenga kuti, “mumiwunda yachikumbusu.”
Panyaki kuti, “Asani mzimu wo wamuyukiya wamutayanga liŵi cha.”
Pamwenga kuti, “kwakupongomoka.”
Pamwenga kuti, “nthazi ya umoyu waki yinguweriyamu.”