Luka 23:1-56

  • Yesu pamasu paku Pilato ndipuso Herodi (1-25)

  • Yesu ndi ŵanthu ŵaŵi akuchita viheni apayikika pavimiti (26-43)

    • “Wazamuja ndi ini mu Paradayisu.” (43)

  • Nyifwa yaku Yesu (44-49)

  • Yesu waŵikika (50-56)

23  Sonu chigulu chosi cha ŵanthu chingusoka ndi kuluta nayu kwaku Pilato.  Pavuli paki, angwamba kumumba mulandu kuti: “Munthu uyu, tamusaniya kuti watimbanyizga charu chidu, wakaniza ŵanthu kupereka msonkhu kwaku Kayisara ndipuso wakamba kuti iyu ndi Khristu fumu.”  Sonu Pilato wangumufumba kuti: “Kumbi ndiwi Fumu ya Ayuda?” Yesu wangumuka kuti: “Mwakamba mwija.”  Pavuli paki Pilato wangukambiya ŵara ŵa asembi kweniso chigulu cha ŵanthu kuti: “Munthu uyu ndamusaniya ndi mulandu cha.”  Kweni yiwu angulutirizga kukamba kuti: “Watimbanyizga ŵanthu mwakusambiza ku Yudeya kosi, kwambiya ku Galileya mpaka kunu.”  Pilato wati wavwa venivi, wangufumba kuti waziŵi asani munthu yo ndi Mgalileya.  Wati waziŵa kuti wenga wa muchigaŵa chakuwusika ndi Herodi, wangumutumiza kwaku Herodi, mweniyo so wenga ku Yerusalemu mu mazuŵa ngo.  Herodi wati wawona Yesu wangukondwa ukongwa, chifukwa kwa nyengu yitali wapenjanga kuwona Yesu, pakuti wanguvwa vinandi vakukwaskana ndi iyu, ndipu wakhazanga kuwona chisimikizu cho wangachita.  Sonu wangumufumba kwa nyengu yitali, kweni wamukanga kanthu cha. 10  Kweni ŵara ŵa asembi ndi alembi anguma ndi kungangamiya kuti amumbi mbwenu mulandu. 11  Pavuli paki Herodi pamoza ndi asilikali, angumuyuyuwa ndipuso angumuchitiya chipongu mwakumuvwalika malaya ngakudula ndipu angumuweze kwaku Pilato. 12  Herodi ndi Pilato anguja pa ubwezi pa zuŵa lenilo, chinanga kuti kuvuli kosi atinkhananga. 13  Pavuli paki, Pilato wanguwunganiska ŵara ŵa asembi, alongozgi kweniso ŵanthu. 14  Iyu wanguŵakambiya kuti: “Munguza ndi munthu uyu kwaku ini kuti wachitiska kuti ŵanthu agaruki. Awonani! ndamufumba pa masu pinu, kweni ndasaniya ukaboni wewosi cha pa milandu yo mutimumba. 15  Ndipu Herodi nayu wamusaniya ndi mulandu cha, ndichu chifukwa chaki wamuweze so kwaku isi. Ndipu awonani! munthu uyu wachita chechosi cha chakuti wabayikiyi. 16  Mwaviyo, ndimulangengi ŵaka, pavuli paki ndimufwatuwengi.” 17  *—— 18  Kweni chigulu chosi cha ŵanthu chingudaniriza kuti: “Mumalani nayu mweniyo,* ndipu mutifwatuliyi Baraba!” 19  (Munthu uyu wanguponyeka mujeri pa mulandu wa kuyukiya boma wo unguchitika mutawuni yo ndipuso mulandu wa kubaya munthu.) 20  Pilato wangulongoro so nawu mwakukweza mazu, chifukwa wakhumbanga kufwatuwa Yesu. 21  Yiwu angwamba kudaniriza kuti: “Wapayikiki pachimiti! Wapayikiki pachimiti!”* 22  Wanguŵafumba kachitatu kuti: “Chifukwa wuli? Wananganji? Ndachisaniya cha chifukwa chakuti wabayikiyi. Mwaviyo ndimulangengi ŵaka, pavuli paki ndimufwatuwengi.” 23  Ŵati avwa venivi, angwamba kumuchichizga mwakudaniriza ukongwa kuti Yesu wabayiki* ndipu mazu ngawu nganguŵa nganthazi ukongwa. 24  Sonu Pilato wanguyeruzga mwakukoliyana ndi vo akhumbanga. 25  Wanguŵafwatuliya munthu yo akhumbanga, yo wanguponyeka mujeri chifukwa cha mulandu wakuyukiya boma kweniso kubaya munthu, kweni wangupereka Yesu kuti vo akhumbanga vifiskiki. 26  Sonu achiluta nayu, anguko Simoni wa ku Kureni yo watuwanga mumuzi, ndipu angumupingiza chimiti chakutombozgekiyapu* kuti wayendengi nachu muvuli mwaku Yesu. 27  Chigulu chikulu cha ŵanthu chamulondonga, kusazgapu anthukazi wo ajipumanga pachifuŵa chifukwa cha chitima ndi kumuliriya. 28  Yesu wangung’anamukiya ko kwenga anthukazi wo ndi kukamba kuti: “Mwaŵana anthukazi aku Yerusalemu, lekani kuliriya ini, kweni mujiliriyi mwaŵeni ndi ŵana ŵinu. 29  Pakuti ngatuza mazuŵa ngo ŵanthu azamukamba kuti, ‘Mbakutumbikika anthukazi achumba kweniso wo ŵechendabalepu ndi wo maŵe ngawu ngechendawonkhesepu!’ 30  Pavuli paki azamuyamba kukambiya mapiri kuti, ‘Tiwiyeni!’ kweniso mitunthu kuti, ‘Tibenekeriyeni!’ 31  Asani achita venivi chimiti cheche chiŵisi, kwe wuli asani chazimira?” 32  Ŵanthu anyaki ŵaŵi akuchita vinthu viheni, nawu so akanga nawu kuchibayika limoza ndi Yesu. 33  Ŵati afika pamalu ngo ngadanika kuti Bwaza, angumukhoma pachimiti limoza ndi ŵanthu akuchita viheni, munyaki kujanja laki lamaryi ndipu munyaki kujanja laki lamazge. 34  Kweni Yesu wangukamba kuti: “Ada agowokiyeni chifukwa aziŵa cha vo achita.” Ndipuso yiwu anguchita mayeri kuti agaŵani malaya ngaki. 35  Ŵanthu amanga ndi kumulereska. Kweni alongozgi amung’olanga ndipu akambanga kuti: “Anyaki waŵataskanga, wajitaski yija asani nadi ndi Khristu waku Chiuta, Wakusankhika.” 36  Asilikali nawu amuchitiyanga chipongu, anguza ndi kumupaska vinyu wakunthyanthyama 37  ndipu angukamba kuti: “Asani ndiwi Fumu ya Ayuda, jitaski.” 38  Pachanya paki angulembapu chikwangwani chakuti: “Iyi ndi Fumu ya Ayuda.” 39  Pavuli paki, yumoza wa ŵanthu wo achitanga vinthu viheni yo wangupayikika penipo wangukamba mwakunyoza kuti: “Asi ndiwi Khristu? Jitaski ndipu nasi so utitaski!” 40  Wakuchita vinthu viheni yumoza wanguchenya munyaki kuti: “Utimuwopa cha Chiuta chifukwa chakuti walonde cheruzgu chakuyanana ndi munthu uyu? 41  Ndipu isi mphakwenere kuti venivi vitichitikiyi, chifukwa tilangika mwakukoliyana ndi vo tikuchita, kweni munthu uyu wakunangapu chechosi cha.” 42  Pavuli paki wangukamba kuti: “Yesu, uzindikumbuki asani wazisere mu Ufumu waku.” 43  Ndipu iyu wangumukambiya kuti: “Nditikukambiya msanawale, wazamuja ndi ini mu Paradayisu.” 44  Sonu mwenga mu ora la 6,* ndipu mucharu chosi munguchita mdima mpaka kufika mu ora la 9,* 45  chifukwa lumwi linguchita mdima. Pavuli paki ketani ya munyumba yakusopiyamu yinguperuka pakati kutuwa pachanya mpaka pasi. 46  Ndipu Yesu wangudaniriza ukongwa kuti: “Ada, ndipereka mzimu* wangu mu manja mwinu.” Wati wakamba venivi, wangumalizika.* 47  Mura wa asilikali wati wawona vo vinguchitika, wanguthamika Chiuta ndipu wangukamba kuti: “Munthu uyu wenga murunji nadi.” 48  Sonu chigulu chosi cha ŵanthu cho chinguza kuziwona vo vachitikanga, chinguwere kunyumba chichijipuma pachifuŵa chati chawona vo vinguchitika. 49  Ndipu ŵanthu wosi wo amuziŵanga anguma chapataliku. Anthukazi wo angumulondo kutuwa ku Galileya, nawu so ŵenga penipo ndipu anguwona vinthu venivi. 50  Sonu penga munthu yo wadanikanga kuti Yosefi, mweniyo wenga wa mu Mphara Yikulu ya Milandu,* yo wenga munthu wamampha kweniso murunji. 51  (Munthu uyu wanguzomerezaku cha chiŵembu chawu ndi vakuchita vawu.) Iyu wenga wa ku Arimatiya, tawuni ya ku Yudeya, ndipu walindizganga Ufumu waku Chiuta. 52  Yosefi wanguluta kwaku Pilato kuchipempha thupi laku Yesu. 53  Ndipu wangumusiska pachimiti, wangumukulunga musalu yamampha ndi kumuŵika mumuwunda* wo ungujobeka mujalawi, wo munthu weyosi wenga wechendaŵikikemu. 54  Sonu lenga Zuŵa Lakunozgeke ndipu zuŵa la Sabata lenga pafupi kwamba. 55  Kweni anthukazi wo amulondonga kutuliya ku Galileya, nawu anguluta kumuwunda* kuchiwuwona ndipuso kuchiwona mo amuŵikiya. 56  Pavuli paki anguweku ndipu anguluta kuchinozga vakununkhirisiya ndipuso mafuta ngakununkhira. Kweni pa zuŵa la Sabata angupumuwa mwakukoliyana ndi dangu.

Mazu Ngam'mphata

Wonani mazu ngamumphata pa Mateyu 17:21.
Mazu ngaki chayingu, “Mumutuzgepu mweniyo.”
Pamwenga kuti, “Wabayikiyi pachimiti! Wabayikiyi pachimiti!”
Pamwenga kuti, “wabayikiyi pachimiti.”
Wonani Mazu ngo Ngakonkhoskeka.
Cha mu ma 12 koloku msana.
Cha mu ma 3 koloku mazulu.
Pamwenga kuti, “umoyu.”
Pamwenga kuti, “wangututa kakumaliya.”
Pamwenga kuti, “khoti likulu la Ayuda.”
Pamwenga kuti, “mumuwunda wachikumbusu.”
Pamwenga kuti, “kumuwunda wachikumbusu.”