Luka 2:1-52

  • Kuwaku kwaku Yesu (1-7)

  • Angelu awoneke kwa aliska (8-20)

  • Kudumulika ndi kujitowesa (21-24)

  • Simiyoni wawona Khristu (25-35)

  • Ana wakamba vakukwaskana ndi mwana (36-38)

  • Kuwere ku Nazareti (39, 40)

  • Yesu we panyumba yakusopiyamu we ndi vyaka 12 (41-52)

2  Sonu mu mazuŵa ngeningo, Kayisara Ogasito wangujalikiska dangu lakuti ŵanthu wosi a pacharu chapasi akalembesi.  (Kulembesa kwakwamba kwenuku kunguchitika pa nyengu yo Kwiriniyo wenga nduna ya ku Siriya.)  Ŵanthu wosi anguluta kuchilembesa ndipu munthu weyosi wachilembesanga mutawuni yakwaki.  Yosefi nayu wangutuwa ku Galileya mutawuni ya Nazareti kuluta ku Yudeya, mutawuni yaku Davidi yo yidanika kuti Betelehemu, chifukwa wenga wa munyumba kweniso mubanja laku Davidi.  Yosefi wangulutiya limoza ndi Mariya yo wangutorana nayu nge mo wangumulayizgiya kuti wamutongi. Ndipu Mariya wenga pafupi kubala.  Pa nyengu yo ŵenga kweniko, nyengu yakuti wabali yingukwana.  Wangubala mwana munthulumi, mwana waki wakwamba, ndipu wangumuvunga musalu ndi kumugoneka muchakuryisiyamu viŵetu, chifukwa malu ngangumala munyumba ya alendu.  Muchigaŵa chenicho, mwenga so aliska wo ŵenga kudondu usiku kulinda miskambu yawu ya viŵetu.  Mwamabuchibuchi, mungelu waku Yehova wanguma panthazi pawu, unkhankhu waku Yehova unguŵala posi po anguja ndipu anguchita mantha ukongwa. 10  Kweni mungelu yo wanguŵakambiya kuti: “Mungachitanga mantha cha. Nditikukambiyani uthenga wamampha wa likondwa likulu lo ŵanthu wosi aŵengi nalu. 11  Chifukwa msanawale mutawuni yaku Davidi mwakuwiyani mtaski, yo ndi Khristu Ambuya. 12  Ndipu vo vakukuwovyani kuti mukamuziŵi ndi ivi: Mwamusaniya bonda yo amuvunga musalu ndipu amugoneka muchakuryisiyamu viŵetu.” 13  Mwamabuchibuchi, po penga mungelu yo panguwoneka so chigulu cha angelu cho chathamikanga Chiuta kuti: 14  “Unkhankhu kuchanya kwaku Chiuta ndipuso chimangu pacharu chapasi pakati pa ŵanthu wo Chiuta wakondwa nawu.” 15  Sonu angelu ŵati atuwapu ndi kuluta kuchanya, aliska wo angwamba kukambiskana kuti: “Tiyeni tiluti ku Betelehemu, tingatondekanga cha, tikawoni vo vachitika, vo Yehova watiziŵisa.” 16  Mwaviyo anguluta mwaliŵiliŵi ndipu angusaniya Mariya ndi Yosefi kweniso bonda wagona muchakuryisiyamu viŵetu. 17  Ŵati awona venivi, angukonkhoska vo anguvwa vakukwaskana ndi mwana yo. 18  Ndipu ŵanthu wosi wo anguvwa, anguzizwa ukongwa ndi vo aliska anguŵakambiya. 19  Kweni Mariya wangwamba kusunga mazu ngosi ngenanga ndi kuŵanaŵaniya mumtima mwaki vo ngang’anamuwanga. 20  Sonu aliska anguwere ko kwenga miskambu yawu, ndipu akankhuskanga Chiuta ndi kumuthamika chifukwa cha vosi vo anguvwa ndi kuwona, nge mo vingukambikiya kwaku yiwu. 21  Pati pajumpha mazuŵa 8, nyengu yakuti amudumuwi yingukwana ndipu angumudana zina lakuti Yesu lo mungelu wangumupaska Mariya wechendame nthumbu. 22  Kweniso yati yakwana nyengu yakujitowesa mwakukoliyana ndi Dangu* laku Mozesi, anguluta nayu ku Yerusalemu kuti akamupereki kwaku Yehova. 23  Yiwu anguchita ivi nge mo vikulembeke mu Dangu laku Yehova kuti: “Mwana munthulumi weyosi wakwamba watenere kuja wakupaturika kwaku Yehova.” 24  Yiwu angupereka sembi mwakukoliyana ndi vo Dangu* laku Yehova likamba kuti: “Muperekengi njiŵa* ziŵi pamwenga viwunda* viŵi.” 25  Ndipu awonani! mu Yerusalemu mwenga munthu munyaki yo wadanikanga kuti Simiyoni. Iyu wenga murunji ndipu wenga wakugomezgeka kwaku Chiuta ndipuso walindizganga kupembuzgika kwaku Isirayeli, ndipu mzimu wakupaturika wenga nayu. 26  Kweniso Chiuta wangumuvumbuliya mwa mzimu wakupaturika kuti wafwengi cha mpaka po waziwone Khristu waku Yehova. 27  Mwakulongozgeka ndi mzimu, Simiyoni wanguza kunyumba yakusopiyamu. Pa nyengu yo Yosefi ndi Mariya anguza ndi Yesu kuti azichiti mwakukoliyana ndi Dangu,* 28  Simiyoni wangunyamuwa mwana yo ndipu wanguthamika Chiuta kuti: 29  “Ambuya Fumu Yikulu, sonu mwazomereza kuti kapolu winu waluti muchimangu mwakukoliyana ndi vo mungukamba, 30  chifukwa masu ngangu ngawona nthowa yinu yakutaskiya, 31  yo mungunozga kuti ŵanthu wosi awoni 32  ukweru wakutuzgapu mdima wo ubulumutizga mitundu ya ŵanthu kweniso kuti awoni unkhankhu wa ŵanthu ŵinu, Ayisirayeli.” 33  Awisi ndi anyina angulutirizga kuzizwa ndi vinthu vo vakambikanga vakukwaskana ndi mwana yo. 34  Ndipuso Simiyoni wanguŵatumbika ndipu wangukambiya Mariya, nyina wa mwana yo kuti: “Awona! Mwana uyu wasankhika kuti Ayisirayeli anandi awi pasi ndi kuyuka so kweniso kuti chije chisimikizu cha kususkika, 35  ndi chilatu chakuti maŵanaŵanu nga mumitima ya ŵanthu anandi ngavumbuliki. (Kukamba uneneska, lipanga litali lazakukugwaza.)” 36  Sonu kwenga mchimi munthukazi zina laki Ana, mwana waku Fanuwelu wa fuku laku Ashere. Munthukazi mwenuyu wenga wakukota ndipu wanguja ndi mulumu waki kwa vyaka 7 pe kutuliya po angutoliyana.* 37  Iyu wenga choko, pa nyengu iyi wenga ndi vyaka 84. Wapambanga cha panyumba yakusopiyamu. Iyu wachitanga uteŵeti wakupaturika msana ndi usiku, wafunganga ndi kupereka mapempheru ngakuŵeyere. 38  Mu ora lenilo, Ana wanguza pafupi ndi yiwu ndipu wangwamba kuwonga Chiuta ndi kukamba vakukwaskana ndi mwana yo ku ŵanthu wosi wo alindizganga utaski wa Yerusalemu. 39  Sonu ŵati amaliza kuchita vinthu vosi mwakukoliyana ndi Dangu* laku Yehova, anguwere ku Galileya, kutawuni yakwawu ya Nazareti. 40  Ndipu mwana yo wangulutirizga kukuwa ndipu wenga ndi nthazi, zeru zinandi ndipuso Chiuta wangulutirizga kumuyanja. 41  Sonu apapi ŵaki anguziŵiliya kuluta ku Yerusalemu chaka chechosi kuchichita phwandu la Pasika. 42  Yesu wati wafika vyaka 12, anguluta so kuchichita phwandu nge mo achitiyanga nyengu zosi. 43  Mazuŵa nga phwandu ngati ngamala, achiwere kunyumba, mnyamata yo Yesu wangujaliya vuli ku Yerusalemu kweni apapi ŵaki anguziŵa cha. 44  Yiwu aŵanaŵananga kuti we mugulu la ŵanthu wo ayendiyanga nawu limoza, ndipu ŵati ayenda ulendu wa zuŵa limoza, angwamba kumupenjapenja kwa abali ŵawu kweniso kwa anyawu. 45  Kweni ŵati atondeka kumusaniya, anguwere ku Yerusalemu ndipu angumupenja ukongwa. 46  Sonu pati pajumpha mazuŵa ngatatu, angumusaniya munyumba yakusopiyamu waja pasi mukati mwa asambizi, waŵavwisiyanga ndi kuŵafumba mafumbu. 47  Kweni ŵanthu wosi wo amuvwisiyanga azizwanga ukongwa ndi zeru zaki kweniso mo wamukiyanga mafumbu. 48  Apapi ŵaki ŵati amuwona, anguzizwa ukongwa ndipu anyina angumukambiya kuti: “Wamwana, watisuzgiyanji viyo? Ini ndi awusu, tasuzgika ukongwa kukupenja.” 49  Kweni wanguŵamuka kuti: “Ntchifukwa wuli mutindipenja? Kumbi muziŵa cha kuti nditenere kuja munyumba ya Ada?” 50  Kweni anguwamu cha vo waŵakambiyanga. 51  Pavuli paki, wangusoka nawu ndi kuwere ku Nazareti ndipu wangulutirizga kujithereska kwaku yiwu.* Ndipuso anyina angulutirizga kusunga mwakuphwere mazu ngosi ngenanga mumtima mwawu. 52  Ndipu Yesu wakuwanga mu zeru ndi msinkhu ndipuso Chiuta ndi ŵanthu, amuyanjanga.

Mazu Ngam'mphata

Wonani Mazu ngo Ngakonkhoskeka.
Wonani Mazu ngo Ngakonkhoskeka.
Anyaki akamba kuti, “chikupi.”
Viwunda vo vikambika yapa mbana a nkhunda.
Wonani Mazu ngo Ngakonkhoskeka.
Mazu ngaki chayingu, “kutuliya pa umwali waki.”
Wonani Mazu ngo Ngakonkhoskeka.
Pamwenga kuti, “kuŵavwiya.”