Luka 11:1-54

  • Mo tingapemphere (1-13)

    • Pempheru la Ambuya (2-4)

  • Kutuzga viŵanda mu nthazi yaku Chiuta (14-23)

  • Asani mzimu uheni wawere mu munthu (24-26)

  • Vitumbiku chayivu (27, 28)

  • Chisimikizu chaku Yona (29-32)

  • Nyali ya liŵavu (33-36)

  • Soka ŵanthu akusopa mwachinyengu (37-54)

11  Sonu Yesu wapempheranga pamalu nganyaki. Wati wamaliza, yumoza wa akusambira ŵaki wangumukambiya kuti: “Ambuya, tisambizeni kupemphera nge mo Yohane wakusambiziya akusambira ŵaki.”  Yesu wanguŵamuka kuti: “Asani mupemphera, mukambengi kuti: ‘Ada, zina linu lipaturiki.* Ufumu winu uzi.  Mutipaski chakurya chidu cha zuŵa ndi zuŵa, mwakukoliyana ndi vo tikhumbika zuŵa lelosi.  Mutigowoke maubudi ngidu pakuti nasi tigowoke ŵanthu wo atitinangiya.* Ndipu mungazomerezanga cha kuti titheri asani tiyeseka.’”*  Pavuli paki wanguŵakambiya kuti: “Tiyeruzgiyi kuti yumoza waku yimwi we ndi munyaki ndipu waluta kwaku iyu pakati pa usiku ndi kumupempha kuti, ‘Ayimwi, ndibwerekeniku viŵandi vitatu,  chifukwa sonu viyo kwaza munyangu kutuliya kutali ndipu ndilivi chakurya chakuti ndimupaski.’  Kweni iyu wamukiya munyumba kuti: ‘Leka kundisuzga ini. Ndajala kali chisasa, ndipu ini ndi ŵana ŵangu tagona kali. Ndingayuka cha kuti ndikupaski kanthu.’  Nditikuneneskiyani, chinanga kuti wangakhumba cha kuyuka kuti wamupaski kanthu nge mubwezi waki, kweni chifukwa cha kupempha mwachitatata wangayuka ndi kumupaska chechosi cho wakhumba.  Sonu nditikukambiyani kuti, lutirizgani kupempha ndipu mupaskikengi; lutirizgani kupenja ndipu musaniyengi; lutirizgani kugong’oska ndipu kukujulikiyeningi. 10  Pakuti weyosi yo wapempha walonde, weyosi yo wapenja wasaniya, ndipu weyosi yo wagong’oska wajulikiya. 11  Ndiyani waku yimwi yo asani mwana waki wangamupempha somba, wangamupaska njoka mumalu mwa somba? 12  Pamwenga asani wangamupempha zira, wangamupaska chipiriri? 13  Sonu, asani yimwi chinanga kuti mwe aheni muziŵa kupereka mphasu zamampha ku ŵana ŵinu, Awusemwi akuchanya angatondeka wuli kupereka mzimu wakupaturika ku ŵanthu wo atiŵapempha?” 14  Pavuli paki, Yesu wangutuzga chiŵanda cho chatondekesanga munthu kulongoro. Chiŵanda cho chati chatuwa, munthu yo wangwamba kulongoro ndipu chigulu cha ŵanthu chinguzizwa ukongwa. 15  Kweni ŵanthu anyaki angukamba kuti: “Watuzga viŵanda mu nthazi yaku Belezebule,* mura wa viŵanda.” 16  Ndipu ŵanthu anyaki, kuti amuyesi angwamba kumukambiya kuti waŵapaski chisimikizu chakutuliya kuchanya. 17  Wati waziŵa vo aŵanaŵananga, Yesu wanguŵakambiya kuti: “Ufumu wewosi wakugaŵikana ukho cha, ndipu nyumba yeyosi yakugaŵikana yituwa. 18  Mwakuyanana ŵaka, asani Satana nayu wagaŵikana, ufumu waki ungakho wuli? Pakuti mukamba kuti ndituzga viŵanda mu nthazi yaku Belezebule. 19  Asani ini ndituzga viŵanda mu nthazi yaku Belezebule, nanga ŵana* ŵinu ativituzga mu nthazi yaku yani? Ndichu chifukwa chaki azamuja ŵeruzgi ŵinu. 20  Kweni asani ndituzga viŵanda mu nthazi yaku* Chiuta, ndikuti Ufumu waku Chiuta wakubuchizgani nadi. 21  Asani munthu wanthazi, yo we ndi vidya vosi wavikiliya nyumba yaki, katundu waki yosi wavikilirika. 22  Kweni asani munthu munyaki wanthazi kuluska iyu waza ndipu wamuthereska, waphanga vidya vaki vosi vo wathembanga ndipu wagaŵana ndi anyaki vinthu vo waphanga. 23  Yo waleka kuŵa pamoza nani, wasuskana nani ndipu yo waleka kuwunjika nani, waparanya. 24  “Asani mzimu uheni watuwa mu munthu ujumpha mumalu ngambula maji kupenjapenja malu ngakupumuliyapu ndipu asani wangasaniya cha, ukamba kuti, ‘Ndiweriyengi kunyumba yangu ko ndikutuwa.’ 25  Ndipu asani wafika, usaniya nyumba yakupeyeka ndi kudyoŵeka. 26  Pavuli paki, uluta ndi kuchito mizimu yinyaki 7 yiheni ukongwa kuluska yiwu. Asani yasere, yija mwenimo. Ndipu munthu yo waja muheni ukongwa kuluska mo wenge kali.” 27  Sonu wachikamba vinthu venivi, munthukazi munyaki wangudaniriza kutuliya muchigulu cha ŵanthu kuti: “Ngwakutumbikika munthukazi yo nthumbu yaki yingukupingani ndipuso yo munguwonkha maŵe ngaki!” 28  Kweni Yesu wangukamba kuti: “Ndi viyo cha, kweni mbakutumbikika wo atuvwa mazu ngaku Chiuta ndi kungasunga!” 29  Chigulu cha ŵanthu chichiwungana pamoza, Yesu wangwamba kukamba kuti: “Mugonezi uwu ndi mugonezi uheni; upenja chisimikizu kweni palivi chisimikizu chinyaki cho upaskikengi kupatuwaku chisimikizu chaku Yona. 30  Nge mo Yona wangujaliya chisimikizu ku ŵanthu a ku Nineve, ndimu so Mwana wa munthu wajaliyengi chisimikizu ku mugonezi uwu. 31  Fumukazi yakutuliya kumwera yazamuyuskika pa nyengu ya cheruzgu limoza ndi ŵanthu a mugonezi uwu, ndipu yazakuŵasuska chifukwa yingutuwa kukumaliya kwa charu kuti yizivwi zeru zaku Solomoni. Kweni awonani! munthu munyaki wakuluska Solomoni we panu. 32  Ŵanthu a ku Nineve azamuyuka pa nyengu ya cheruzgu limoza ndi mugonezi uwu ndipu azakuwususka, chifukwa Yona wati waŵapharazgiya, angulapa. Kweni awonani! munthu munyaki wakuluska Yona we panu. 33  Asani munthu wabusa nyali, watiyibisa cha pamwenga kuyibenekere ndi sokola, kweni watiyiŵika pachakuŵikapu nyali kuti ŵanthu wosi wo asere munyumba awoni ukweru. 34  Nyali ya liŵavu ndi jisu. Asani jisu laku ndakulereska pa chinthu chimoza,* liŵavu laku losi liŵala.* Kweni asani jisu laku ndambunu,* liŵavu laku lichita mdima. 35  Mwaviyo, phwere kuti ukweru wo we mwaku yiwi ungaŵanga mdima cha. 36  Sonu asani liŵavu laku losi ndikweru kwambula chigaŵa chinyaki cha mdima, ndikuti losi lazamuŵala ukongwa nge mo nyali yitikupaskiya ukweru waki.” 37  Wati wamaliza kukamba venivi, Mfarisi munyaki wangumupempha kuti wakaryi nayu. Sonu wanguluta kuchirya. 38  Kweni Mfarisi yo, wanguzizwa wati wawona kuti Yesu wangusamba cha mumanja* wechendayambi kurya. 39  Kweni Ambuya angumukambiya kuti: “Sonu yimwi Afarisi musuka kubwalu kwa kapu ndi mbali kweni mukati mwinu mwazaza mbunu ndi vinthu viheni. 40  Ŵanthu ambula zeru yimwi! Asi yo wakupanga kubwalu ndiyu wakupanga so mukati? 41  Vinthu vakutuliya mukati ndivu muperekengi nge mphasu zalisungu* ndipu awonani! chechosi chakukwaskana ndi yimwi chazamukuŵa chakutowa. 42  Kweni soka yimwi Afarisi chifukwa mupereka vatchumi va minti ndi luwe kweniso va mbewu zosi zakumadimba.* Kweni muleke dala kuchita urunji kweniso kwanja Chiuta! Mwakhumbikanga nadi kuchita vinthu ivi, kweni mwakhumbikanga cha kuleka vinthu vinyaki ivi. 43  Soka Afarisi, chifukwa mutanja mipandu yakunthazi* mumasinagogi kweniso kuti ŵanthu akutawuzgeningi mwaulemu mumisika! 44  Soka kwaku yimwi, chifukwa mwe nge miwunda* yambula kuwoneka yo ŵanthu atendapu ŵaka kwambula kuziŵa kuti pe miwunda!” 45  Yumoza mwa ŵanthu akuziŵa Dangu* wangumumuka kuti: “Msambizi, vo mukamba po, munyoza so isi.” 46  Yesu wangukamba kuti: “Soka namwi so akuziŵa Dangu,* chifukwa muzitiska ŵaka ŵanthu ndi katundu muzitu, kweni yimwi mwaŵeni mutimukwaska cha ndi chikumbu chinu. 47  “Soka kwaku yimwi, chifukwa muzenga miwunda* ya achimi kweni apapi ŵinu akali ndiwu anguŵabaya! 48  Nditikuneneskiyani, mwe akaboni a vo apapi ŵinu akuchita, ndipu muzomerezana nawu, chifukwa yiwu akubaya achimi kweni yimwi muzenga miwunda yawu. 49  Ndichu chifukwa chaki zeru yaku Chiuta yikamba kuti: ‘Ndiŵatumiziyengi achimi ndi akutumika kweni anyaki aku yiwu azakuŵabaya ndi kuŵatombozga, 50  kuti ndopa za achimi wosi zo zikudilika kwamba pakujalikiskika kwa charu, zizikhumbiki kutuliya ku mugonezi uwu. 51  Kwambiya ndopa zaku Abelu mpaka ndopa zaku Zekariya yo wangubayikiya pakati pamalu ngakuperekiyapu sembi* ndi malu ngakupaturika.’* Nditikuneneskiyani kuti ndopa izi zazamukhumbika kutuliya ku mugonezi uwu. 52  “Soka yimwi akuziŵa Dangu,* chifukwa muphanga ŵanthu ki wakuziŵiya vinthu. Yimwi mwaŵeneku museremu cha, ndipu wo akhumba kuseremu nawu mutiŵakaniza!” 53  Sonu wati watuwa munyumba yo, alembi ndi Afarisi angwamba kumuwumbiliya ndi kumugundizga ndi mafumbu, 54  kuti amusaniriyi vifukwa pa vo wakambengi.

Mazu Ngam'mphata

Pamwenga kuti, “litoweseki.”
Mazu ngaki chayingu, “wo ŵe nasi ndi ngongoli.”
Mazu ngaki chayingu, “mungatitoliyanga ku mayeseru cha.”
Zina linyaki laku Satana.
Pamwenga kuti, “akusambira.”
Mazu ngaki chayingu, “ndi chikumbu chaku.”
Mazu ngaki chayingu, “ndipusu.”
Pamwenga kuti, “lingweruka ukongwa.”
Mazu ngaki chayingu, “ndiheni.”
Kung’anamuwa kuti, kusamba mwakulondo mudawuku.
Pamwenga kuti, “mphasu zakupaska akavu.” Wonani Mazu ngo Ngakonkhoskeka.
Pamwenga kuti, “vinthu vinyaki vakumadimba vakununkhirisiya dendi.”
Pamwenga kuti, “yakuzirwa.”
Pamwenga kuti, “miwunda yachikumbusu.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “miwunda yachikumbusu.”
Pamwenga kuti, “pajotcheru.”
Pamwenga kuti, “nyumba yakusopiyamu.”
Wonani Mazu ngo Ngakonkhoskeka.