Chivumbuzi 9:1-21

  • Mbata yachinkhondi (1-11)

  • Soka lakwamba lajumphapu, nganyaki ngaŵi ngatuza (12)

  • Mbata ya 6 (13-21)

9  Mungelu wachinkhondi wangumba mbata yaki. Ndinguwona nyenyezi yo yingumbotoke pacharu chapasi kutuwa kuchanya, ndipu yingupaskika* ki wapakhomu lachizenji.  Iyu yingujula* khomu la chizenji ndipu josi lingukwera kutuwa pakhomu lo, nge josi la mung’anju yikulu. Lumwi ndi mphepu vinguchita mdima chifukwa cha josi lo latuwanga pakhomu pa chizenji cho.  Mujosi lo mungutuwa azombi wo angusere mucharu, ndipu angupaskika mazaza ngakuyanana ndi mazaza nga vipiriri vapacharu chapasi.  Angukambirika kuti angananganga cha vakume vapacharu, pamwenga vakume vakubiliŵira pamwenga vimiti, kweni anangi ŵanthu ŵija wo alivi chidindu chaku Chiuta pavisku vawu.  Ndipu azombi wo anguzomerezeka cha kubaya ŵanthu wo, kweni anguzomezereka kuti aŵatombozgi kwa myezi yinkhondi, ndipuso kuti aŵatombozgi nge mo chipiriri chitombozge asani chaluma munthu.  Mu mazuŵa ngeningo, ŵanthu azamupenja nyifwa kweni azakuyisaniya cha, azamukhumbisiska kuti afwi, kweni nyifwa yazakuŵathaŵa.  Azombi wo awonekanga nge mahachi ngo nganozgeke nkhondu; pamitu yawu penga tinthu takuwoneka nge tivisoti tagolidi, ndipu visku vawu vawonekanga nge visku va ŵanthu,  ŵenga ndi sisi nge la ŵanthu anthukazi. Minyu ngawu ngenga nge nga nkharamu,  ndipu ŵenga ndi vapachifuŵa nge vapachifuŵa vachisulu. Chiwawa cha mapapa ngawu chenga nge cha magaleta ngo ngatchimbiriya kunkhondu, ngo ngatendeseka ndi mahachi. 10  Ŵe so ndi michiya yo ye ndi maliwozga; ndipu kumichiya yawu ndiku kwe mazaza ngakupweteke ŵanthu kwa myezi yinkhondi. 11  Azombi yaŵa ŵe ndi fumu yeniyo ndi mungelu wa chizenji. Muchiheberi zina laki ndi Abadoni,* kweni Muchigiriki zina laki ndi Apoliyoni.* 12  Soka lakwamba lajumphapu. Awonani! Masoka nganyaki ngaŵi ngatuza pavuli pa vinthu venivi. 13  Mungelu wa 6 wangumba mbata yaki. Ndipu ndinguvwa mazu ngamoza ngakutuliya mumasengwi nga pamalu ngakuperekiyapu sembi ngagolidi,* ngo ngenga panthazi paku Chiuta. 14  Mazu ngo, ngakambiyanga mungelu wa 6 mweniyo wenga ndi mbata kuti: “Fwatuwa angelu anayi wo amangika kumsinji ukulu wa Yufurate.” 15  Ndipu angelu anayi wo anozgekereskeke ora, zuŵa, mwezi kweniso chaka, angufwatulika kuti abayi chimoza mwa vigaŵa vitatu va ŵanthu. 16  Chiŵerengeru cha asilikali a pamahachi a gulu lankhondu chenga 200 miliyoni; chenichi ndichu chiŵerengeru chawu cho ndinguvwa. 17  Ndipu mu chiwona cho, mahachi ndi akukwerapu ndinguviwona viyo: Anguvwala vapachifuŵa viyera nge motu, vamtundu wa bulu nge mwa wa hayasifi kweniso vantcheti nge sulufule, ndipu mitu ya mahachi yawonekanga nge mitu ya nkharamu ndipuso mumulomu mwa mahachi ngo mwatuwanga motu, josi ndi sulufule. 18  Ndipu chimoza mwa vigaŵa vitatu va ŵanthu, chingubayika ndi milili yitatu iyi, motu, josi ndi sulufule vo vatuwanga mumulomu mwawu. 19  Pakuti mazaza nga mahachi yanga nge mumulomu mwawu ndipuso ku michiya yawu, chifukwa michiya yawu ye nge njoka ndipu ye ndi mitu. Michiya yeniyi ndiyu ngapweteke ŵanthu. 20  Kweni ŵanthu anyaki wosi wo anguleka kubayika ndi milili yeniyi, angulapa cha ntchitu ziheni za manja ngawu; anguleka cha kusopa viŵanda ndi angoza agolidi, asiliva, amkuŵa, amwa ndipuso achimiti, ŵeniwo angawona cha, angavwa cha ndipuso angayenda cha. 21  Ndipuso angulapa cha ntchitu zawu za kubaya ŵanthu, pamwenga za kuchita vamizimu, za kuchita malusu ngaheni ngakugonana* kweniso unkhungu wawu.

Mazu Ngam'mphata

Pamwenga kuti, “wangupaskika.”
Pamwenga kuti, “wangujula.”
Kung’anamuwa kuti, “Pharanyiku.”
Kung’anamuwa kuti, “Wakuchitiska Pharanyiku.”
Pamwenga kuti, “mumasengwi nga jotcheru lagolidi.”
Mu Chigiriki, por·neiʹa. Wonani Mazu ngo Ngakonkhoskeka.