Chivumbuzi 8:1-13

  • Chidindu cha 7 chilamaturika (1-6)

  • Kumba mbata zinayi zakwamba (7-12)

  • Kupharazgika kwa masoka ngatatu (13)

8  Wati walamatuwa chidindu cha 7, kuchanya kwenga yii! kwa pafufupi hafu ya ora.  Pavuli paki, ndinguwona angelu 7 ama pa masu paku Chiuta, ndipu angupaskika mbata 7.  Mungelu munyaki wangukoleze chiyaŵi chagolidi chakuwotchiyamu vakununkhira, wanguza ndi kuma pamalu ngakuperekiyapu sembi, ndipu wangupaskika vakununkhira vinandi kuti wavipereki sembi limoza ndi mapempheru nga akupaturika wosi. Iyu wanguvipereke pamalu ngakuperekiyapu sembi ngagolidi ngo ngenga panthazi pa mpandu waufumu.  Josi la vakununkhira lakutuliya mujanja la mungelu, limoza ndi mapempheru nga akupaturika, vingukwera pa masu paku Chiuta.  Kweni nyengu yeniyo, mungelu wanguto chiyaŵi chakuwotchiyamu vakununkhira ndi kuzazamu unyaki mwa motu wa pamalu ngakuperekiyapu sembi, ndipu wanguchiponya pacharu chapasi. Ndipu kungugululusa, kunguvwika mazu kweniso kungung’anima limphezi ndipuso kunguchita chidilirisi.  Ndipu angelu 7 wo ŵenga ndi mbata 7, angunozgeka kumba mbata zo.  Mungelu wakwamba wangumba mbata yaki. Kwenga matalala ndi motu vakusazgana ndi ndopa ndipu vinguponyeka pacharu chapasi. Chimoza mwa vigaŵa vitatu va charu, chinguwotcheka, chimoza mwa vigaŵa vitatu va vimiti, chinguwotcheka, ndipuso vakume vosi vakubiriŵira, vinguwotcheka.  Mungelu wachiŵi wangumba mbata yaki. Ndipu chinthu chinyaki chikulu change phiri likulu lakukole motu, chinguponyeka munyanja. Chimoza mwa vigaŵa vitatu va nyanja chingusambuka ndopa;  ndipu chimoza mwa vigaŵa vitatu va vinthu vamoyu va munyanja, chingufwa, ndipuso chimoza mwa vigaŵa vitatu va masitima, chingusweka. 10  Mungelu wachitatu wangumba mbata yaki. Ndipu nyenyezi yikulu yakukole nge nyali, yingumbotoka kutuliya kuchanya, yinguwa pa chimoza mwa vigaŵa vitatu va misinji ndipuso pa akasupi a maji. 11  Nyenyezi yo, yidanika kuti Kamiti Kakuŵaŵa. Chimoza mwa vigaŵa vitatu va maji chinguŵaŵa, ndipu ŵanthu anandi angufwa chifukwa cha maji ngo, pakuti ngangusambuka ngakuŵaŵa. 12  Mungelu wachinayi wangumba mbata yaki. Chimoza mwa vigaŵa vitatu va lumwi, chimoza mwa vigaŵa vitatu va mwezi ndipuso chimoza mwa vigaŵa vitatu va nyenyezi, vingupumika, kuti chimoza mwa vigaŵa vawu vitatu chichiti mdima ndipuso kuti chigaŵa chimoza cha vigaŵa vitatu va msana chileki kulonde ukweru, usiku nawu so viyo. 13  Ndipu ndinguwona ndi kuvwa nkhwazi yo yaphululukanga mude yichikamba mwakudaniriza kuti: “Soka, soka, soka kwaku wo aja pacharu chapasi chifukwa cha mazu nga mbata zakujaku za angelu atatu wo ŵe pafupi kumba mbata zawu!”

Mazu Ngam'mphata