Chivumbuzi 3:1-22

  • Uthenga ku mpingu wa ku Sade (1-6), wa ku Filadefiya (7-13), wa ku Lawodikaya (14-22)

3  “Mungelu wa mpingu wa ku Sade umulembe kuti: Vinthu ivi ndivu wakamba yo we ndi mizimu 7 yaku Chiuta kweniso nyenyezi 7: ‘Ndiziŵa ntchitu zaku, kuti we ndi mbiri yakuti we wamoyu, penipo ndiwi wakufwa.  Ja masu ndipu chitiska vinthu vakujaku vo ve pafupi kufwa kuti vije vanthazi, chifukwa ndasaniya kuti ntchitu zaku zachitika mwakukwana* cha pa masu paku Chiuta wangu.  Mwaviyo, lutirizga kukumbuka mo ungulonde ndi mo unguvwiya, ndipu lutirizga kuvisunga kweniso ulapi. Nadi panu, asani waleka kuja masu, ndizengi nge munkhungu, ndipu wazakuliziŵa cha chinanga nkhamanavi ora lenilo ndiziyengi kwaku yiwi.  “‘Kweni we ndi ŵanthu amanavi* mu Sade wo akufipiska cha malaya ngawu, ndipu azamukwenda ndi ini avwala malaya ngatuŵa, chifukwa mbakwenere.  Mwaviyo, yo wapunda, wazamuvwalikika malaya ngatuŵa, ndipu ndazamusisita cha zina laki mubuku laumoyu, kweni ndazamuzomereza zina laki pa masu pa Ada ndi pa masu pa angelu.  Yo we ndi gutu wavwi vo mzimu ukambiya mipingu.’  “Mungelu wa mpingu wa ku Filadefiya umulembe kuti: Vinthu ivi ndivu wakamba yo ngwakupaturika, yo ndi muneneska, yo we ndi ki waku Davidi, mweniyo wajula kuti paŵevi wakujala, ndipuso mweniyo wajala kuti paŵevi wakujula:  ‘Ndiziŵa ntchitu zaku. Awona! Ndakujuliya khomu pa masu paku, lo palivi yo wangajala. Ndipu ndiziŵa kuti we ndi nthazi zimanavi, ndipuso kuti ungusunga mazu ngangu kweniso ungulongo kuti we wakugomezgeka ku zina langu.  Awona! Ŵanthu akutuliya musinagogi waku Satana wo akamba kuti Mbayuda, penipo Mbayuda cha, kweni apusika, ndiŵachitiskengi kuza kwaku yiwi ndipu agwadengi pamaphazi ngaku,* ndipuso ndiŵachitiskengi kuti aziŵi kuti ndakuyanja. 10  Chifukwa ungusunga mazu ngakukwaskana ndi kukunthiyapu* kwangu, ndazakukusunga mu ora lakuyeseka, lenilo lituza pacharu chosi chapasi, kuziyesa ŵanthu wo aja pacharu chapasi. 11  Ndituza liŵi, lutirizga kukoleska vo wenavu, kuti paŵevi munthu wakuphanga chisoti* chaku. 12  “‘Yo wapunda, ndazakumuchitiska kuja chipilala munyumba yakusopiyamu yaku Chiuta wangu, ndipu wazamutuwamu so cha, ndipuso paku iyu ndazamulembapu zina laku Chiuta wangu ndi zina la tawuni yaku Chiuta wangu, Yerusalemu Mufya yo wasika kutuwa kuchanya kwaku Chiuta wangu, ndipuso zina langu lifya. 13  Yo we ndi gutu wavwi vo mzimu ukambiya mipingu.’ 14  “Mungelu wa mpingu wa ku Lawodikaya umulembe kuti: Vinthu ivi ndivu wakamba Ame, kaboni wakugomezgeka kweniso muneneska, wakwamba mu chilengedu chaku Chiuta: 15  ‘Ndiziwa ntchitu zaku kuti we wakuzizira cha pamwenga wakotcha. Mphanyi wenga wakuzizira pamwenga wakotcha. 16  Sonu pakuti ndiwi wakuluputuka, ndipu we wakotcha cha pamwenga wakuzizira, ndikuwukuwengi mumulomu mwangu. 17  Chifukwa chakuti ukamba kuti, “Nde wakukhupuka, ndasaniya chuma chinandi ndipu ndikhumbika chinthu chechosi cha,” kweni uziŵa cha kuti ndiwi wakusuzgika, wakuchitiska lisungu, mukavu, wachibulumutiya ndipuso wankhuli, 18  nditikulunguchizga kuti uguli kwaku ini golidi wakuyengetulika ndi motu kuti ukhupuki, uguli so malaya ngatuŵa kuti uvwali, ndi chilatu chakuti uleki kuchita soni asani ungawoneka kuti we nkhuli, ndipuso uguli munkhwala wakupaka mumasu mwaku kuti uyambi kuwona. 19  “‘Ŵanthu wosi wo nditiŵayanja, nditiŵachenya kweniso kuŵalanga. Mwaviyo, chita phamphu ndipuso ulapi. 20  Awona! Ndama pakhomu ndipu ndigong’oska. Weyosi yo wavwa mazu ngangu ndi kujula khomu, ndazamusere munyumba yaki ndi kuryiya nayu limoza chakurya chamazulu. 21  Yo wapunda, ndazakumuzomereza kuja nayu limoza pampandu wangu waufumu, nge mo nani ndingupundiya ndi kujaliya limoza ndi Ada pampandu wawu waufumu. 22  Yo we ndi gutu wavwi vo mzimu ukambiya mipingu.’”

Mazu Ngam'mphata

Pamwenga kuti, “zamalizika.”
Mazu ngaki chayingu, “mazina ngamanavi.”
Pamwenga kuti, “akusindamiyengi.”
Panyaki kuti, “ungulondo chakuwoniyapu cha kukunthiyapu.”
Chisoti ichi, ndi mphotu yo ŵanthu alonde pa maphara.