Chivumbuzi 18:1-24

  • Kuwa kwa “Babiloni Mukulu” (1-8)

    • “Mwaŵanthu ŵangu, tuwaniku kwaku iyu” (4)

  • Kuliya chifukwa cha kuwa kwa Babiloni (9-19)

  • Likondwa kuchanya chifukwa cha kuwa kwa Babiloni (20)

  • Babiloni waponyekengi munyanja nge chimwa (21-24)

18  Pavuli paki ndinguwona mungelu munyaki wachisika kutuliya kuchanya. Iyu wenga ndi mazaza ngakulu, ndipu charu chapasi chinguŵala chifukwa cha unkhankhu waki.  Iyu wangudaniriza mwanthazi kuti: “Wawa! Babiloni Mukulu wawa, ndipu wasambuka malu ngakujamu viŵanda, malu ngakubisamaku mizimu yosi yaunyakazi,* vinthu vosi vaunyakazi ndipuso viyuni vosi vakutinkhika!  Pakuti chifukwa cha vinyu wa khumbiru laki la* malusu ngaheni ngakugonana, mitundu yosi yaloŵe ndi vinyu mwenuyu, ndipu mafumu nga pacharu chapasi ngachita nayu malusu ngaheni ngakugonana* ndipuso amalonda* a pacharu chapasi akhupuka kutuliya mu nthazi ya chuma chaki cho wakusaniya mwambula soni.”  Ndipu ndinguvwa mazu nganyaki kutuliya kuchanya kuti: “Mwaŵanthu ŵangu, tuwaniku kwaku iyu, asani mukhumba cha kusangana nayu maubudi ngaki, ndipuso asani mukhumba cha kuti mulondiyeku yinyaki mwa milili yaki.  Chifukwa maubudi ngaki ngawunjikana mpaka kuchanya, ndipu Chiuta wakumbuka ntchitu zaki zambula urunji.*  Mumuweze nge mo wanguchitiya ndi anyaki, muweziyeni maulendu ngaŵi vinthu vo wachita; vo wasazga mukapu, nayu mumusazgiyi maulendu ngaŵi.  Nge mo wajikankhuskiyanga yija kweniso mo wajaliyanga ndi chuma chaki mwambula soni, namwi so mumutombozgi ndi kumuliza mwakuyanana. Pakuti mumtima mwaki wakamba kuti: ‘Ini ndaja nge fumukazi, nde choko cha, ndipu ndazamuliyapu cha.’  Ndichu chifukwa chaki mu zuŵa limoza, milili yaki yizengi, ndipu milili yaki ndi iyi: nyifwa, kuliya ndipuso nja. Kweniso wazamuwotcheke limu ndi motu, chifukwa Yehova Chiuta yo watimuyeruzga, ngwanthazi.  “Ndipu mafumu nga pacharu chapasi ngo nganguchita nayu malusu ngaheni ngakugonana* ndi kuryiya nayu limoza chuma chaki cho wachisaniyanga mwambula soni, azakumuliya ndi kujipuma pachifuŵa achiwona josi la kufya kwaki. 10  Yiwu azamukuma patali chifukwa cha mantha achiwona kutombozgeka kwaki ndipu azamukamba kuti: ‘Kotu ama, kotu ama, yiwi Babiloni tawuni yikulu kweniso yakukho, pakuti cheruzgu chaku chafika mu ora limoza!’ 11  “Ndipuso amalonda apacharu chapasi atenje ndi kumuliya, pakuti palivi so munthu yo wangagula katundu wawu yosi, 12  katundu wawu yosi wagolidi, wasiliva, mya yakuzirwa, ngali,* vakuvwala vamampha ukongwa, vakuvwala vamtundu wa pepo, vakuvwala vasiliki, vakuvwala viyera ukongwa; ndipuso chinthu chechosi chakupangika kutuliya ku vimiti vakununkhira, mtundu wewosi wa chinthu chakupangika kutuliya ku munyanga wa njovu ndipuso vinthu vakutuliya ku vimiti vakuzirwa, mkuŵa, chisulu ndipuso mabo, 13  sinamoni, vakununkhirisiya vakutuliya ku India, vakununkhira, mafuta ngakununkhira, libani, vinyu, mafuta nga maolivi, ufwa wamampha, tirigu, ng’ombi, mbereri, mahachi, ngolu, akapolu ndipuso maumoyu nga ŵanthu. 14  Kukamba uneneska, vipasu vamampha vo wakhumbanga vatuwaku kwaku yiwi, ndipu vinthu vosi vakunowa kweniso vamampha vamala mwaku yiwi, visanirika so cha. 15  “Amalonda wo agulisanga vinthu venivi, azamukuma patali chifukwa cha mantha achiwona kutombozgeka kwaki ndipu azakumutenje ndi kumuliya. 16  Yiwu azamukamba kuti: ‘Kotu ama, kotu ama, tawuni yikulu, yakuvwalikika vakuvwala vamampha ukongwa, vakuvwala vamtundu wa pepo ndipuso viyera ukongwa, yakudyoŵeka ndi vakutowese vagolidi, mya yakuzirwa ndi ngali,* 17  chifukwa chuma chinandi chenichi chanangika mu ora limoza!’ “Ndipu wakuwonere sitima weyosi, wakwenda panyanja weyosi, akugwira ntchitu musitima, ndipuso ŵanthu wo pa umoyu wawu wosi athemba nyanja, anguma patali 18  ndipu adanirizanga achiwona josi la kufya kwaki ndi kukamba kuti: ‘Ndi tawuni niyi yakuyanana ndi tawuni yikulu?’ 19  Yiwu ajidiliyanga fuvu kumutu kwawu achidaniriza, kutenje ndi kuliya ndipu angukamba kuti: ‘Kotu ama, kotu ama, tawuni yikulu, yeniyo yinguchitiska kuti ŵanthu wosi wo ŵenga ndi masitima panyanja akhupuki chifukwa cha chuma chaki, pakuti wabwangandulika mu ora limoza!’ 20  “Kuchanya ko, kondwani chifukwa chaku iyu, ndipuso yimwi akupaturika, akutumika ndi achimi, namwi so viyo. Pakuti Chiuta wapereka cheruzgu chaki paku iyu chifukwa chaku yimwi!” 21  Ndipu mungelu wanthazi wangunyamuwa chimwa change chimwa chikulu chakupere, wanguchiponya munyanja ndi kukamba kuti: “Viyo ndimu tawuni yikulu ya Babiloni yazamuponyeke pasi liŵiliŵi, ndipu munthukazi yo wazamusanirika so cha. 22  Ndipu mazu nga akumba wo atumba mwakugwiriskiya ntchitu bangu, nga akumba anyaki, nga akumba fyoliru ndipuso nga akumba mbata, ngazamuvwika so cha mwaku yiwi. Munthu walusu la vakupangapanga weyosi wazamusanirika so cha mwaku yiwi, kweniso chiwawa cha mwa wakupere, chazamuvwika so cha mwaku yiwi. 23  Ukweru wa nyali wazamuŵala so cha mwaku yiwi, ndipu mazu nga munthulumi mweneku wa nthengwa ndi nga mwali, ngazamuvwika so cha mwaku yiwi; pakuti amalonda ŵaku ŵenga ŵanthu akuzirwa ukongwa mucharu ndipuso malusu ngaku ngakuchita vamizimu, ngangulandizga mitundu yosi. 24  Kukamba uneneska, mwaku iyu mungusanirika ndopa za achimi, za akupaturika ndipuso za ŵanthu wosi wo akubayika pacharu chapasi.”

Mazu Ngam'mphata

Panyaki kuti, “mvuchi waunyakazi; kututa kwaunyakazi; mazu ngakukambirika ngaunyakazi.”
Pamwenga kuti, “ukali waki wa.”
Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “amalonda akwendakwenda.”
Pamwenga kuti, “wakumbuka milandu yaki.”
Wonani Mazu ngo Ngakonkhoskeka.
Wonani mazu ngamumphata pa Mateyu 7:6.
Wonani mazu ngamumphata pa Mateyu 7:6.