Chivumbuzi 17:1-18

  • Kuyeruzga “Babiloni Mukulu” (1-18)

    • Huli likulu laja pachinyama chakofya chiyera ukongwa (1-3)

    • Chinyama cho ‘chengaku, kweni palivi ndipuso chituwengi muchizenji’ (8)

    • Masengwi 10 ngazamuchita nkhondu ndi Mwanawambereri (12-14)

    • Masengwi 10 ngatinkhengi huli (16, 17)

17  Yumoza mwa angelu 7 wo ŵenga ndi mbali 7, wanguza ndi kundikambiya kuti: “Iza kunu, ndikulongongi cheruzgu cha huli likulu, lo laja pamaji nganandi,  lenilo mafumu nga charu chapasi nganguchita nalu malusu ngaheni ngakugonana.* Ndipuso ŵanthu wo aja pacharu chapasi, anguloŵe ndi vinyu wa malusu ngaki ngaheni ngakugonana.”*  Ndipu mu nthazi ya mzimu, wangunditole kuchipululu. Ndipu ndinguwona munthukazi yo wanguja pachinyama chakofya chiyera ukongwa, cho chenga chakuzaza ndi mazina ngakunyoza kweniso cho chenga ndi mitu 7 ndipuso masengwi 10.  Munthukazi yo, wanguvwala vakuvwala vamtundu wa pepo kweniso viyera ukongwa, ndipu wangudyoŵeka ndi golidi, mya yakuzirwa ndipuso ngali.* Iyu wenga ndi kapu yagolidi kujanja laki, yakuzaza vinthu vaunyakazi kweniso ukazuzi wa malusu ngaki ngaheni ngakugonana.*  Pachisku chaki pangulembeka zina lachisisi lakuti: “Babiloni Mukulu, nyinawu wa mahuli kweniso wa vinthu vaunyakazi va mucharu.”  Ndipu ndinguwona kuti munthukazi mwenuyu wanguloŵe ndi ndopa za akupaturika ndipuso ndi ndopa za akaboni aku Yesu. Ndati ndamuwona, ndinguzizwa ukongwa.  Sonu mungelu wangundikambiya kuti: “Ntchifukwa wuli unguzizwa? Ndikukambiyengi chisisi cha munthukazi yo ndipuso cha chinyama chakofya cho chamupinga, cho che ndi mitu 7 kweniso masengwi 10:  Chinyama chakofya cho unguwona, chengaku, kweni palivi ndipuso chaja kamanavi kutuwa muchizenji, ndipu chiluta ku pharanyiku. Ŵanthu akuja mucharu, ŵeniwo mazina ngawu ngakulembeka cha mumpukutu waumoyu kutuliya po charu chikujalikiskikiya, azamuzizwa asani aziwona mo chinyama chakofya chinguŵiyaku, kweni palivi ndipuso chiŵengepu.  “Yapa pakhumbika kuwamu ndipuso zeru: Mitu 7 yimiya mapiri 7 ngo munthukazi waja pachanya paki. 10  Ndipu pe mafumu 7: Ngankhondi ngawa, umoza ulipu, unyaki wechendazi ndipu asani waza, utenere kujapu kwa kanyengu kamanavi. 11  Ndipu chinyama chakofya cho chengapu kweni palivi, chimiya fumu ya 8. Kweni yituliya mu mafumu 7 ndipu yilutengi ku pharanyiku. 12  “Masengwi 10 ngo unguwona ngamiya mafumu 10 ngo ngechendalonde ufumu wawu, kweni yingu limoza ndi chinyama chakofya alonde mazaza nge mafumu kwa ora limoza. 13  Masengwi ngenanga nge ndi maŵanaŵanu ngamoza ndipu ngapereka nthazi zaki kweniso mazaza ngaki ku chinyama chakofya. 14  Masengwi ngenanga ngazamuchita nkhondu ndi Mwanawambereri, kweni chifukwa chakuti Mwanawambereri ndi Mbuya wa ambuya ndipuso Fumu ya mafumu, wazakungathereska. Ndipuso ŵeniwo we nawu limoza wo akudanika, akusankhika kweniso wo mbakugomezgeka, nawu azamuthereske nayu limoza.” 15  Iyu wangundikambiya kuti: “Maji ngo wawona, ngeningo huli lajapu, ngamiya ŵanthu akupambanapambana, chigulu cha ŵanthu, mitundu ndipuso malilimi.* 16  Ndipu masengwi 10 ngo unguwona ndipuso chinyama chakofya, vazamutinkha huli lo, ndipu vazakulibwanganduwa ndi kulisiya nkhuli. Vazamukurya mnofu waki ndi kuliwotche limu ndi motu. 17  Pakuti Chiuta waŵika venivi mumitima yawu kuti ngachiti khumbu laki, kuti ngafiski maŵanaŵanu ngawu ngamoza mwakupereka ufumu wawu ku chinyama chakofya mpaka po mazu ngaku Chiuta ngafiskikiya. 18  Ndipu munthukazi yo unguwona wamiya tawuni yikulu yo yichita ufumu pa mafumu nga charu.”

Mazu Ngam'mphata

Wonani Mazu ngo Ngakonkhoskeka.
Malusu ngaheni ngakugonana. Mu Chigiriki, por·neiʹa. Wonani Mazu ngo Ngakonkhoskeka.
Wonani mazu ngamumphata pa Mateyu 7:6.
Malusu ngaheni ngakugonana. Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “vineneru.”