Chivumbuzi 12:1-17

  • Munthukazi, mwana munthulumi, ndipuso chinjoka (1-6)

  • Mikayeli wachita nkhondu ndi chinjoka (7-12)

    • Chinjoka chiponyeka pacharu chapasi (9)

    • Dyaboli waziŵa kuti waja ndi kanyengu kamanavi (12)

  • Chinjoka chitombozga munthukazi (13-17)

12  Ndipu kuchanya kunguwoneka chakuziziswa: Munthukazi wanguvwala lumwi, kusi kwa maphazi ngaki kwenga mwezi, kumutu kwaki kwenga chisoti chaufumu cho chenga ndi nyenyezi 12,  kweniso wenga ndi nthumbu. Ndipu waliyanga chifukwa wavwanga urwirwi ndi kuŵaŵa kwa pa nyengu ya kubala.  Kunguwoneka so chakuziziswa chinyaki kuchanya. Awonani! Kunguwoneka chinjoka chikulu chiyera ukongwa nge motu, cha mitu 7, masengwi 10 ndipuso kumitu yaki kwenga visoti vaufumu 7.  Ndipu muchiya waki waguzanga chimoza mwa vigaŵa vitatu va nyenyezi zakuchanya. Chinguponya nyenyezi zo pacharu chapasi. Chinjoka cho chingulutirizga kuma pa masu pa munthukazi yo wenga pafupi kubala, kuti asani wabala, chimezi mwana waki.  Ndipu munthukazi yo, wangubala mwana munthulumi, mnyamata, yo wazamulongozga mitundu yosi ya ŵanthu ndi nthonga yachisulu. Ndipu mwana waki wangukwamphulikiya kwaku Chiuta kweniso kumpandu waki waufumu.  Munthukazi yo, wanguthaŵiya kuchipululu ko we ndi malu ngo Chiuta wakumunozge, ndipu kweniko ndiku achimuryisanga kwa mazuŵa 1,260.  Ndipu kuchanya kungubuka nkhondu: Mikayeli* limoza ndi angelu ŵaki anguchita nkhondu ndi chinjoka, ndipu chinjoka limoza ndi angelu ŵaki anguchita nkhondu  kweni angupunda cha,* ndipu malu ngawu ngangusanirika so cha kuchanya.  Mwaviyo, chinjoka chikulu chinguponyeka pasi, njoka yakali ukongwa yo yidanika kuti Dyaboli kweniso Satana, mweniyo walandizga charu chosi chapasi; wanguponyeka pacharu chapasi ndipu angelu ŵaki nawu anguponyeke nayu limoza. 10  Ndinguvwa mazu ngakudaniriza kutuliya kuchanya kuti: “Sonu utaski, nthazi, Ufumu waku Chiuta widu ndi mazaza ngaku Khristu waki, vafika, chifukwa waponyeka pasi wakumba mulandu abali ŵidu, mweniyo watiŵamba milandu yaboza pa masu paku Chiuta widu msana ndi usiku! 11  Yiwu angumuthereska chifukwa cha ndopa za Mwanawambereri ndipuso chifukwa cha mazu nga ukaboni wawu, kweniso ŵenga akunozgeka kupereka maumoyu ngawu, mpaka kufwa. 12  Pachifukwa chenichi, kondwani yimwi machanya ndi yimwi akuja mwenimo! Soka charu chapasi ndi nyanja, chifukwa Dyaboli wasikiya kwaku yimwi. Iyu we ndi ukali ukulu, pakuziŵa kuti waja ndi kanyengu kamanavi.” 13  Sonu chinjoka chati chawona kuti chaponyeka pacharu chapasi, chingutombozga munthukazi yo wangubala mwana munthulumi. 14  Kweni munthukazi uyu wangupaskika mapapa ngaŵi nga nkhwazi yikulu, kuti waphululukiyi kuchipululu kumalu ngaki, kweniko waryisikengi kwa nyengu, zinyengu ndipuso kwa hafu ya nyengu,* kutali ndi chinjoka. 15  Ndipu chinjoka cho chingufunya maji nge msinji kutuliya mumulomu mwaki, chingufunyiya muvuli mwa munthukazi yo kuti chimubizgi ndi msinji. 16  Kweni charu chinguwovya munthukazi yo, chingujula mulomu waki ndi kumeza msinji wo chinjoka chingufunya kutuliya mumulomu mwaki. 17  Sonu chinjoka chingumukwiyiya munthukazi yo ndipu chinguluta kuchichita nkhondu ndi akujaku a mphapu* yaki, wo asunga marangu ngaku Chiuta ndipuso wo agwira ntchitu yakupereka ukaboni wakukwaskana ndi Yesu.

Mazu Ngam'mphata

Kung’anamuwa kuti, “Ndiyani Wayanana ndi Chiuta.”
Panyaki kuti, “kweni [chinjoka] chinguthereskeka.”
Kung’anamuwa, nyengu zitatu ndi hafu.
Mazu ngaki chayingu, “mbewu.”