Aroma 7:1-25

  • Kufwatulika ku Dangu (1-6)

  • Ubudi uziŵika chifukwa cha Dangu (7-12)

  • Kulimbana ndi ubudi (13-25)

7  Kumbi vingaŵa kuti muziŵa cha abali (pakuti ndikambiya ŵanthu wo aziŵa dangu) kuti Dangu* le ndi mazaza pa munthu pa nyengu yosi yo we ndi umoyu?  Mwakuyeruzgiyapu, munthukazi wakuyirwa ngwakumangika ku mulumu waki pa nyengu yo mulumu waki ngwamoyu; kweni asani mulumu waki wafwa, ngwakufwatuka ku dangu la mulumu waki.  Sonu asani watorana ndi munthulumi munyaki pa nyengu yo mulumu waki ngwamoyu, ndikuti waŵengi wachigololu. Kweni asani mulumu waki wafwa, ngwakufwatuka ku dangu ndipu waŵengi wachigololu cha asani watorana ndi munthulumi munyaki.  Abali ŵangu, namwi so mukufwatulika ku Dangu* chifukwa cha liŵavu laku Khristu, kuti muje a munthu munyaki, mweniyo wakuyuskika ku nyifwa kuti tipasi vipasu vaku Chiuta.  Pa nyengu yo tajanga mwakukoliyana ndi makhumbiru nga liŵavu,* makhumbiru nga ubudi ngo ngaziŵika chifukwa cha Dangu* ngagwiranga ntchitu mumaliŵavu ngidu kuti ngapasi vipasu vakulongozge ku nyifwa.  Kweni sonu tafwatulika ku Dangu* chifukwa tafwa ku chinthu cho chatimanganga, kuti tije akapolu mu nthowa yakali cha ya marangu ngakuchita kulembeka, kweni mu nthowa yifya mwakuwovyeka ndi mzimu.  Sonu tingakambanji? Kumbi Dangu* ndilu ubudi? Awa! Kukamba uneneska, pakaŵengevi Dangu* ndatingi ndiwuziŵengi cha ubudi. Mwakuyeruzgiyapu, ndatingi ndikuziŵengi cha kukhumbira mwasanji* asani Dangu* linguleka kukamba kuti: “Ungakhumbiranga mwasanji cha.”*  Kweni chifukwa cha dangu, ubudi ukusaniya mpata wakundichitiska kuti ndikhumbirengi chinthu chechosi mwasanji,* pakuti pakaŵengevi dangu mphanyi ubudi ngwakufwa.  Dangu* lechendaŵeku ndenga wamoyu, kweni dangu ili lati laza, ubudi nawu unguja so wamoyu, kweni ini ndingufwa. 10  Ndipu ndingusaniya kuti dangu lo lakhumbikanga kuti lilongozge ku umoyu, ndilu lilongozge ku nyifwa. 11  Pakuti ubudi wati wasaniya mpata chifukwa cha dangu, ungundinyengere ndi kundibaya kuporote mu dangu. 12  Mwaviyo, Dangu* pakulija ndakupaturika ndipu vo vikulembeka mu dangu lo, vakupaturika, vaurunji ndipuso vamampha. 13  Mwaviyo, kumbi chinthu cho ntchamampha ndichu chachitiska nyifwa yangu? Awa! Kweni ubudi ndiwu wachitiska, kuti uziŵiki kuti yiwu ndiwu wachitiska nyifwa yangu kuporote mu chinthu chamampha. Ve viyo kuti kuziya mu dangu, ubudi uziŵiki ukongwa kuti ndi ubudi. 14  Pakuti tiziŵa kuti Dangu* ndakutuliya kwaku Chiuta, kweni ini nde waliŵavu ndipu ndikugulisika ku ubudi. 15  Pakuti ndivwisisa cha cho ndichita. Chifukwa cho ndikhumba kuchita ndichu ndichita cha, kweni cho nditinkha ndichu ndichita. 16  Kweni asani ndichita cho ndileka kukhumba, ndizomereza kuti Dangu* ndamampha. 17  Yo watichichita ndini so cha, kweni mbubudi wo we mwaku ini. 18  Pakuti ndiziŵa kuti mwaku ini, kung’anamuwa kuti muliŵavu mwangu, mulivi kamampha. Chifukwa ndikhumbisiska kuchita cho ntchamampha, kweni ndifiska cha kuchichita. 19  Pakuti chamampha cho ndikhumba kuchita ndichu ndichita cha, kweni chiheni cho ndileka kukhumba ndichu ndichita. 20  Sonu asani cho ndichita ndichu ndikhumba cha, ndikuti nditichichita ndini cha, kweni ubudi wo we mwaku ini ndiwu utichichita. 21  Sonu ini ndasaniya dangu ili lakuti: Asani ndikhumba kuchita cho ntchamampha, chiheni chija mwaku ini. 22  Mumtima mwangu ndikondwa ukongwa chifukwa cha dangu laku Chiuta, 23  Kweni muliŵavu mwangu* ndiwonamu so dangu linyaki lo lilimbana ndi dangu la maŵanaŵanu ngangu, ndipu litindilongozge ku ukapolu wa dangu la ubudi lo le muliŵavu mwangu.* 24  Ndamunthu wakusuzgika ini! Ndiyani yo wanditaskengi ku liŵavu lo litufwa nyifwa yeniyi? 25  Wawongeki Chiuta kuporote mwa Ambuyafwi Yesu Khristu! Mwaviyo, mumaŵanaŵanu mwangu, ini ndamweni nde kapolu wa dangu laku Chiuta, kweni muliŵavu mwangu, nde kapolu wa dangu la ubudi.

Mazu Ngam'mphata

Wonani Mazu ngo Ngakonkhoskeka.
Wonani Mazu ngo Ngakonkhoskeka.
Mazu ngaki chayingu, “viŵalu vidu.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “kuwunukiya.”
Wonani Mazu ngo Ngakonkhoskeka.
Pamwenga kuti, “Ungawunukiyanga cha.”
Pamwenga kuti, “kuti ndiwunukiyengi chinthu chechosi.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Mazu ngaki chayingu, “muviŵalu vangu.”
Mazu ngaki chayingu, “muviŵalu vangu.”