Aroma 4:1-25

  • Abrahamu wangukambika kuti ndi murunji chifukwa cha chivwanu (1-12)

    • Abrahamu ndi wisewu wa ŵanthu wo ŵe ndi chivwanu (11)

  • Wangulonde layizgu chifukwa cha chivwanu (13-25)

4  Asani ve viyo, kumbi tingakamba kuti mpapi widu wakali Abrahamu wanguyanduwanji?  Mwakuyeruzgiyapu, asani Abrahamu wangukambika kuti ndi murunji chifukwa cha ntchitu, watingi wajengi ndi chifukwa chakumalikiya, kweni kwaku Chiuta cha.  Kumbi lemba likambanji? “Abrahamu wenga ndi chivwanu mwaku Yehova ndipu Chiuta wanguwona kuti vo wanguchita wenga urunji.”  Sonu ku munthu yo wagwira ntchitu, malipiru ngaki ngaja wezi ukulu cha, kweni ntchinthu cho wakhumbikanga kulonde.*  Kweni ku munthu yo wagwira ntchitu cha, mweniyo wavwana mwaku Yo wakamba munthu wambula kopa Chiuta kuti ndi murunji, Chiuta watimuwona kuti ndi murunji chifukwa cha chivwanu chaki.  Nge mo Davidi nayu wangukambiya vakukwaskana ndi vitumbiku va munthu yo Chiuta watimuwona kuti ndi murunji pade pa ntchitu kuti:  “Mbakutumbikika wo ntchitu zawu zakususkana ndi marangu zagowokereka kweniso wo maubudi ngawu ngawundika.*  Ngwakutumbikika munthu yo maubudi ngaki Yehova wazakungakumbukapu cha.”  Kumbi vitumbiku venivi, viluta ku ŵanthu akudumulika pe, pamwenga viluta so ku ŵanthu ambula kudumulika? Pakuti tititi: “Chivwanu chaku Abrahamu chinguchitiska kuti Chiuta wawonengi kuti vo wanguchita wenga urunji.” 10  Kumbi wangumuwona pa nyengu niyi kuti wenga murunji? Pa nyengu yo wenga wakudumulika pamwenga po wenga wambula kudumulika? Mphanyengu yo wenga wambula kudumulika. 11  Ndipu wangulonde chisimikizu cha kudumulika nge chidindu chaurunji chifukwa cha chivwanu cho wenga nachu wechendadumuliki, kuti waje wisewu wa ŵanthu wosi ambula kudumulika wo ŵe ndi chivwanu, kuti Chiuta waŵawoni kuti mbarunji. 12  Ndipuso kuti waje wisi wa mphapu yakudumulika, wisewu wa ŵanthu akungangamiya dangu la kudumulika kweniso wisewu wa ŵanthu wo atichilondo umampha chivwanu cho wusefwi Abrahamu wenga nachu wechendadumuliki. 13  Pakuti ndi dangu cha lo linguchitiska Abrahamu pamwenga mphapu* yaki kulonde layizgu lakuti wazamuhara charu, kweni urunji chifukwa cha chivwanu. 14  Pakuti asani wo angangamiya dangu ndiwu azamuhara, mbwenu kuja ndi chivwanu nkhwambula phindu ndipu layizgu lo lamala ntchitu. 15  Kukamba uneneska, Dangu* lichitiska kuti ukali waku Chiuta uwoneki, kweni po palivi dangu palivi ubudi. 16  Layizgu likuperekeka chifukwa cha chivwanu kuti uje wezi ukulu, kuti layizgu lenili lije lakusimikizika ku mphapu* yaki yosi, kwaku wo angangamiya Dangu,* kweniso kwaku wo angangamiya chivwanu chaku Abrahamu, ada aku tosi. 17  (Venivi ve nge mo vikulembeke kuti: “Ndakusankha kuti uje wisewu wa mitundu yinandi ya ŵanthu.”) Venivi ndivu Chiuta mweniyo Abrahamu wanguja ndi chivwanu mwaku iyu wanguwona. Yo wayuska ŵanthu akufwa ndipuso wakamba vinthu vo palivi nge kuti vilipu.* 18  Iyu wenga ndi chilindizga kweniso chivwanu kuti wazamuja wisewu wa mitundu yinandi ya ŵanthu chinanga kuti venivi vawonekanga nge kuti vingachitika cha. Iyu wagomezganga venivi chifukwa cha vo vingukambika kuti: “Viyo ndimu yazamujaliya mphapu* yaku.” 19  Chinanga kuti chivwanu chaki chingudeweyezeka cha, kweni iyu wawonanga liŵavu laki nge kuti ndakufwa (pakuti wenga ndi vyaka pafufupi 100) ndipuso kuti chibalilu chaku Sara chenga chakufwa.* 20  Kweni chifukwa cha layizgu laku Chiuta chivwanu chaki chingudeweyezeka cha, kweni chinguja chanthazi ndipu wakankhuskanga Chiuta 21  ndipuso wasimikizanga ndi mtima wosi kuti Chiuta watondekengi cha kufiska vo wangumulayizga. 22  Mwaviyo, “Chiuta wanguwona kuti vo wanguchita wenga urunji.” 23  Kweni mazu ngakuti “wangumuwona” ngangulembeke iyu pe cha, 24  kweni ngakulembeke so isi, taŵanthu wo wazakutiwona kuti te arunji chifukwa cha kugomezga mwaku Iyu yo wakuyuska Yesu, Ambuyafwi ku nyifwa. 25  Yesu wakuperekeka chifukwa cha maubudi ngidu ndipuso wakuyuskika kuti Chiuta watiwoni kuti te arunji.

Mazu Ngam'mphata

Pamwenga kuti, “kweni ndi ngongoli.”
Pamwenga kuti, “ngagowokereka.”
Mazu ngaki chayingu, “mbewu.”
Wonani Mazu ngo Ngakonkhoskeka.
Mazu ngaki chayingu, “mbewu.”
Wonani Mazu ngo Ngakonkhoskeka.
Panyaki kuti, “ndipuso wachitiska kuti vinthu vo kulivi, viŵeku.”
Mazu ngaki chayingu, “mbewu.”
Pamwenga kuti, “kuti Sara wenga chumba.”