Aroma 2:1-29

  • Cheruzgu cha Ayuda ndi Agiriki (1-16)

    • Mo njuŵi yigwiriya ntchitu (14, 15)

  • Ayuda ndipuso Dangu (17-24)

  • Kudumulika mumtima (25-29)

2  Mwaviyo, wamunthu yiwi, kwali ndiwi yani, asani uyeruzga munyaku ulivi pakugwenthe; chifukwa asani uyeruzga munyaku, utijisuska wamweni pakuti vo uyeruzga munyaku ndivu so yiwi uchita.  Tiziŵa kuti cheruzgu chaku Chiuta chikoliyana ndi uneneska ndipu chisuskana ndi wo achita vaviyo.  Kweni wamunthu yiwi, kumbi uŵanaŵana kuti wazamuthaŵa cheruzgu chaku Chiuta, pakuti uyeruzga wo achita vinthu venivi, penipo nawi uchita so vinthu vaviyo?  Pamwenga kumbi uyuyuwa ukulu wa lisungu laki, kulekerezga ndi kuzikira kwaki, chifukwa uleka kuziŵa kuti Chiuta mwalisungu laki wakhumba kukuwovya kuti ulapi?  Kweni mwakukoliyana ndi kuleka kuvwa kwaku kweniso mtima waku wambula kulapa, utijisungiya ukali. Chiuta wazamuvumbuwa ukali waki pa zuŵa la cheruzgu chaki chaurunji.  Ndipu weyosi wazakumuweze mwakukoliyana ndi ntchitu zaki:  umoyu wamuyaya ku ŵanthu wo apenja unkhankhu, ulemu, kweniso liŵavu lo lingavunda cha chifukwa cha kuzizipizga kwawu pakuchita ntchitu zamampha.  Kweni ŵanthu amphindanu ndipuso wo aleka kuvwiya uneneska, kweni achita vinthu vambula urunji, azamulonde cheruzgu ndi ukali.  Kwazamukuŵa masuzgu ndi urwirwi ku munthu weyosi yo wachita vinthu viheni, pakwamba ku Myuda pavuli paki, ku Mgiriki. 10  Kweni munthu weyosi yo wachita vinthu vamampha, wazamulonde unkhankhu, ulemu ndi chimangu, pakwamba Myuda, pavuli paki, Mgiriki. 11  Chifukwa Chiuta watanjiya cha. 12  Chifukwa ŵanthu wosi wo achita ubudi kwambula dangu, azamukufwa so kwambula dangu; kweni wo achita ubudi penipo aziŵa dangu, azamuyeruzgika ndi dangu. 13  Pakuti ŵanthu wo atuvwa ŵaka dangu mbarunji cha pa masu paku Chiuta, kweni wo achita va mu dangu, wazakuŵakamba kuti mbarunji. 14  Pakuti ŵanthu amitundu yinyaki wo alivi dangu achita ŵaka vinthu va mu dangu. Ŵanthu ŵenaŵa chinanga kuti alivi dangu, kweni alongo kuti ŵe ndi dangu mukati mwawu. 15  Yiwu mbanthu wo alongo kuti fundu za mu dangu zikulembeka mumitima yawu ndipu njuŵi yawu yitiŵachitiya ukaboni kweniso maŵanaŵanu ngawu ngatiŵasuska pamwenga kuŵazomereza. 16  Venivi vazamuchitika pa zuŵa lo Chiuta kuporote mwaku Khristu Yesu, wazamuyeruzga vinthu vo ŵanthu achita mwakubisa, mwakukoliyana ndi uthenga wamampha wo ndipharazga. 17  Sonu asani ndiwi Myuda ndipu uthemba dangu kweniso umalika chifukwa chaku Chiuta, 18  ndipuso uziŵa khumbu laki ndi kuzomereza vinthu vamampha pakuti usambizika* va mu Dangu,* 19  ndipu usimikiza kuti ndiwi mulongozgi wa achibulumutiya, ndiwi ukweru wa ŵanthu wo ŵe mu mdima, 20  wakulunguchizga ŵanthu akuchita vambula kwenere, msambizi wa ŵana anamana, kweniso wakuziŵa vinthu ndi uneneska wa mu Dangu.* 21  Kumbi yiwi wakusambiza munyaku, utijisambiza cha wamweni? Yiwi wakupharazga kuti, “Ungabanga cha,” kumbi nawi utuba? 22  Yiwi ukamba kuti, “Ungachitanga chigololu cha,” kumbi nawi uchita chigololu? Yiwi utinkha kusopa angoza, kumbi utuba va munyumba zakusopiyamu angoza? 23  Yiwi umalika chifukwa cha dangu, kumbi uyuyuwa Chiuta mwakuleka kuvwiya Dangu?* 24  Pakuti vikulembeka kuti: “Ŵanthu amitundu yinyaki anyoza zina laku Chiuta chifukwa chaku yimwi.” 25  Pakuti kudumulika nkhwaphindu asani uvwiya dangu, kweni asani uleka kuvwiya dangu, ndikuti kudumulika kwaku kuyanana ŵaka ndi kuleka kudumulika. 26  Asi asani munthu wambula kudumulika walondo fundu zaurunji za mu Dangu,* ndikuti waja nge ngwakudumulika chinanga kuti ngwambula kudumulika? 27  Ndipu munthu wambula kudumulika mwakuliŵavu, wazamulondo Dangu* ndipu wazakukuyeruzga yiwi wambula kuvwiya dangu, chinanga kuti yiwi uvwiya marangu ngakulembeka ndipuso ukudumulika. 28  Chifukwa kuti munthu waje Myuda chayiyu vithemba mo wawoneke kubwalu cha, ndipuso kudumulika kwaki kuthemba kudumulika liŵavu cha. 29  Kweni Myuda chayiyu ndi yo ndi Myuda mukati ndipuso yo wakudumulika mumtima, mwakugwiriskiya ntchitu marangu ngakulembeka cha, kweni mwa mzimu. Munthu waviyo walumbika ndi ŵanthu cha, kweni ndi Chiuta.

Mazu Ngam'mphata

Pamwenga kuti, “usambizika mwapamulomu.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Wonani Mazu ngo Ngakonkhoskeka.