Aroma 14:1-23

  • Mungayeruzgananga cha (1-12)

  • Mungaguŵiskanga anyinu cha (13-18)

  • Londoni chimangu kweniso mukoliyanengi (19-23)

14  Mulondiyeni munthu wachivwanu chakulopwa. Kweni mungamuyeruzganga cha pa vo muŵanaŵana mwakupambana.*  Munthu munyaki we ndi chivwanu chakuti wangarya chechosi, kweni yo we ndi chivwanu chakulopwa waturya mphangwi pe.  Yo waturya, waleki kunyoza yo waleka kurya, yo waleka kurya waleki kuyeruzga yo waturya, pakuti walondereka ndi Chiuta.  Ndiwi yani yiwi kuti uyeruzgi mteŵeti wa mweni? Iyu watuma pamwenga kuwa pa masu pa mbuyaki. Kukamba uneneska, wazamukuma chifukwa Yehova wangamumika.  Munthu munyaki wawona kuti zuŵa linyaki liluska linyaki, penipo munyaki wawona kuti zuŵa linyaki liyanana ndi mazuŵa nganyaki ngosi. Weyosi pakuyija wasimikizi mumtima mwaki.  Yo wasunga zuŵa, watilisunga kuti watumbiki Yehova, yo waturya, waturya kuti watumbiki Yehova chifukwa wawonga Chiuta. Yo waleka kurya, waleka kurya kuti watumbiki Yehova, ndipu nayu wawonga Chiuta.  Kukamba uneneska, palivi weyosi waku isi yo waja ndi umoyu kuti wajitumbiki mweneku, ndipu palivi yo watufwa kuti wajitumbiki mweneku.  Chifukwa asani te amoyu, tijaliya Yehova, ndipu asani tafwa, tafwiya Yehova. Kwali te amoyu pamwenga tafwa, te aku Yehova.  Ndichu chifukwa chaki Khristu wangufwa ndi kuja so wamoyu, kuti waje Mbuya wa akufwa ndi amoyu. 10  Kweni ntchifukwa wuli uyeruzga mubali waku? Pamwenga ntchifukwa wuli uyuyuwa mubali waku? Pakuti tosi tazamukuma panthazi pa mpandu wakuyeruzgiyapu milandu waku Chiuta. 11  Chifukwa kukulembeka kuti: “Yehova watiti, ‘Nge mo ini ndiliri wamoyu,’ ‘gongonu la munthu weyosi lazakundijikamiya ndipu lilimi la munthu weyosi lazamuzomereza pakweru pa masu paku Chiuta.’” 12  Mwaviyo, weyosi waku isi, wazamumuka yija kwaku Chiuta. 13  Yipu tingayeruzgananga so cha, kweni mumalu mwaki tisimikizi mtima kuti tingamuŵikiyanga cha mubali chakumuguŵiska pamwenga chakumuwisa. 14  Ndiziŵa kweniso ndisimikiza mwa Ambuya Yesu kuti palivi chinthu chakufipiskika mwaku ichu chija, kweni asani munthu munyaki wawona kuti chinthu chinyaki ntchakufipiskika, ndikuti kwaku iyu ntchakufipiskika. 15  Chifukwa asani mubali waku waguŵa chifukwa cha chakurya cho uturya, ndikuti yiwi waleka kwenda mwakukoliyana ndi chanju. Leka kunanga munthu yo Khristu wakumufwiya, chifukwa cha chakurya chaku. 16  Mwaviyo, lekani kuzomereza kuti vinthu vamampha vo muchita, vikambikengi kuti viheni. 17  Pakuti Ufumu waku Chiuta nkhurya pamwenga kumwa cha, kweni mburunji, chimangu ndipuso likondwa, vo vituza chifukwa cha mzimu wakupaturika. 18  Chifukwa munthu weyosi yo wateŵete Khristu nge kapolu mu nthowa yeniyi, wazomerezeka kwaku Chiuta ndipuso ŵanthu akondwa nayu. 19  Mwaviyo, tiyeni tilondo vinthu vo vitovya kuti paŵi chimangu ndipuso vinthu vakuzengana. 20  Lekani kubwanganduwa ntchitu yaku Chiuta chifukwa cha chakurya. Kukamba uneneska, vinthu vosi vakutowa, kweni mbumampha cha kuti munthu waryi asani viguŵiska ŵanthu anyaki. 21  Mbumampha cha kurya nyama pamwenga kumwa vinyu pamwenga kuchita chinthu chechosi cho chiguŵiska mubali waku. 22  Chivwanu cho we nachu, chije chaku yiwi wija pa masu paku Chiuta. Ngwakutumbikika munthu yo waleka kujiyeruzga mweneku pa vinthu vo wasankha. 23  Kweni asani wakayika, ndikuti wasuskika kali asani waturya, pakuti waturya chifukwa cha chivwanu cha. Kukamba uneneska, chinthu chechosi cho chichitika kwambula chivwanu, mbubudi.

Mazu Ngam'mphata

Panyaki kuti, “pa vo wakayikiya mumtima mwaki.”