Akolose 3:1-25

  • Umunthu wakali ndi umunthu wufya (1-17)

    • Chitiskani viŵalu va liŵavu kuja vakufwa (5)

    • Chanju chitovya kuti ŵanthu akoliyanengi ukongwa (14)

  • Ulongozgi ku mabanja ngachikhristu (18-25)

3  Sonu asani mukuyuskika limoza ndi Khristu, lutirizgani kupenja vinthu vakuchanya, ko Khristu wakujalikika kujanja lamaryi laku Chiuta.  Ŵikani maŵanaŵanu nginu pa vinthu vakuchanya, pa vinthu vapacharu chapasi cha.  Pakuti mukufwa ndipu umoyu winu wabisika mwaku Khristu mwakukoliyana ndi Chiuta.  Asani Khristu mweniyo mbumoyu widu waziwoneke, ndikuti namwi so mwazamuwoneke limoza ndi iyu mu unkhankhu.  Mwaviyo, chitiskani viŵalu va liŵavu linu vo ve pacharu chapasi kuja vakufwa ku malusu ngaheni ngakugonana,* ukazuzi, khumbiru liheni lakugonana, kukhumbira vinthu viheni ndipuso mbunu, yo nkhusopa ngoza.  Ukali waku Chiuta utuza chifukwa cha vinthu venivi.  Ndimu so namwi mwachitiyanga* mu umoyu winu wakali.  Kweni sonu muvitayi kutali ndi yimwi vinthu nge: ukali, kukwiya, viheni, mazu ngaheni, ndipuso pamulomu pinu pangatuwanga nkhani zakutuka cha.  Mungapusikananga cha. Zuwani umunthu* wakali limoza ndi ntchitu zaki, 10  ndipu vwalani umunthu wufya, wo chifukwa cha kuziŵa vinthu mwauneneska uja wufya mwakukoliyana ndi chikozgu chaku Yo wakuwulenga. 11  Mu umunthu wufya mulivi Mgiriki pamwenga Myuda, wakudumulika pamwenga wambula kudumulika, mulendu, Msukuti,* kapolu, pamwenga mwanangwa; kweni Khristu ndiyu vinthu vosi, ndipuso mu vinthu vosi. 12  Pakuti mwe akusankhika aku Chiuta, akupaturika ndipuso akwanjiwa, vwalani chanju chikulu, lisungu, kujiyuyuwa, kuzika ndi kuzizipizga. 13  Lutirizgani kuzizipizgiyana kweniso kugowokiyana ndi mtima wosi chinanga munyaki wangaŵa ndi chifukwa chakudandawuliya vakukwaskana ndi munyaki. Nge mo Yehova wakukugowokiyani ndi mtima wosi, namwi so muchitengi viyo. 14  Kusazgiyapu pa vosi ivi, vwalani chanju pakuti ndichu chitovya kuti ŵanthu akoliyanengi ukongwa. 15  Kweniso, chimangu chaku Khristu chiwusi mumitima yinu, pakuti mukudanikiya ku chimangu chenichi mu liŵavu limoza. Ndipu longoni kuti muwonga. 16  Mazu ngaku Khristu ngazaziki mwaku yimwi ndipuso muje ndi zeru zosi. Lutirizgani kusambizana ndi kuchiskana* mwa masalimo, sumu zakuthamika Chiuta, sumu zauzimu zakumbika mwakuwonga, kweniso muchimbiya Yehova mumitima yinu. 17  Chechosi cho muchita, mu mazu kweniso mu ntchitu, muchichitengi mu zina la Ambuya Yesu, muchiwonga Chiuta Ada kuporote mwaku iyu. 18  Mwaŵanthukazi, jithereskeni kwa alumu ŵinu, pakuti venivi ndivu vakwenere pa masu pa Ambuya. 19  Mwaŵanthulumi, lutirizgani kwanja awolu ŵinu, ndipu mungaŵakwiyiyanga ukongwa cha.* 20  Mwaŵana, muvwiyengi apapi ŵinu mu vinthu vosi, pakuti venivi vikondwesa Ambuya. 21  Yimwi ada, mungakwiyisanga ŵana ŵinu cha, kuti aleki kuguŵa.* 22  Yimwi akapolu, muvwiyengi ambuyamwi akuliŵavu, ndipu mungachitanga venivi pa nyengu yo atikuwonani pe cha pakukhumba kukondwesa ŵanthu, kweni muchitengi ndi mtima wosi muchiwopa Yehova. 23  Chechosi cho muchita, muchichitengi ndi mtima wosi nge kuti muchitiya Yehova, ŵanthu cha, 24  pakuti muziŵa kuti mwazamulonde chihara nge mphotu kutuliya kwaku Yehova. Teŵetiyani Ambuya Khristu, nge akapolu. 25  Kukamba uneneska, munthu yo wachita viheni wazamulipirika chifukwa cha viheni vo wachita, ndipu palivi kwanjiya.

Mazu Ngam'mphata

Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “mwayendiyanga.”
Mazu ngaki chayingu, “munthu.”
Mazu ngakuti “Msukuti,” ngang’anamuwa munthu wakumaliyapu.
Pamwenga kuti, “kulunguchizgana.”
Pamwenga kuti, “mungaŵakalipiyanga ukongwa cha.”
Pamwenga kuti, “kugongowa.”