Akolose 2:1-23

  • Khristu, chisisi chakupaturika chaku Chiuta (1-5)

  • Phweriyani ndi ŵanthu akunyenga (6-15)

  • Chayivu ve mwaku Khristu (16-23)

2  Pakuti ndikhumba kuti muziŵi nkhondu yo nde nayu chifukwa chaku yimwi, chifukwa cha ŵanthu a ku Lawodikaya kweniso chifukwa cha ŵanthu wosi wo ŵechendandiwonepu.*  Ve viyo kuti mitima yawu yipembuzgiki, kuti aje akukoliyana mu chanju ndipuso kuti aŵi ndi chuma chosi chifukwa chakuti asimikiza nadi kuti avwisa vinthu, ndi chilatu chakuti achiziŵi mwauneneska chisisi chakupaturika chaku Chiuta. Chisisi chenichi ndi Khristu.  Chuma chosi cha zeru kweniso kuziŵa vinthu, vikubisika mwakuphwere mwaku iyu.  Ndikamba venivi kuti paŵevi munthu wakukulandizgani ndi mazu ngakukopa.  Chinanga kuti mwakuliŵavu nde namwi limoza cha, kweni mwauzimu nde namwi limoza, ndipu ndikondwa kuwona kuti muchita vinthu mwakwenere ndipuso chivwanu chinu mwaku Khristu ntchakukho.  Mwaviyo, mwakukoliyana ndi mo mwazomere Khristu Yesu, Ambuya, lutirizgani kwenda mwakukoliyana ndi iyu.  Mume misisi, muzengeki mwaku iyu, ndipuso mujalikiskiki mu chivwanu, nge mo mukusambizikiya, ndipu chivwanu chinu chikuwi muchiwonga Chiuta.  Phweriyani kuti munthu weyosi waleki kukukoni ukapolu mwakugwiriskiya ntchitu zeru za ŵanthu kweniso uryarya waŵakaŵaka mwakukoliyana ndi mudawuku wa ŵanthu, ndipuso fundu zipusu zo charu chitende, mwakukoliyana ndi Khristu cha;  chifukwa mijalidu yosi yaku Chiuta yazaza mwaku iyu. 10  Musoŵa kanthu kekosi cha chifukwa chaku iyu, ndipu iyu ndiyu mutu wa boma lelosi ndipuso muwusu wewosi. 11  Mwakuja nayu pa ubwezi, mungudumulika, ndipu kudumulika kwinu kukuchitika ndi manja cha, kweni mwakuzuwa liŵavu la umunthu kweniso kudumulika mwakukoliyana ndi Khristu. 12  Pakuti munguwundikiya limoza ndi iyu mu ubatizu waki, ndipu mwakuja nayu pa ubwezi, munguyuskikiya nayu limoza kuporote mu chivwanu chinu, mu ntchitu zanthazi zaku Chiuta, mweniyo wangumuyuska ku nyifwa. 13  Kweniso chinanga kuti mwenga akufwa ku maubudi nginu ndipuso mwenga ambula kudumulika, Chiuta wakukupaskani umoyu limoza ndi Khristu. Ndipu iyu wakutigowoke ndi mtima wosi maubudi ngidu ngosi, 14  wakusisita chikalata chakuchita kulembeka ndi manja cho chenga ndi marangu kweniso cho chatisuskanga. Wakuchituzgapu mwakuchikhome pachimiti chakutombozgekiyapu.* 15  Mwakugwiriskiya ntchitu chimiti chakutombozgekiyapu,* wazuwa maboma ndipuso mazaza ngosi, wangathereska pakweru ndipu watingalongozga mwakugiya. 16  Mwaviyo munthu wangakuyeruzganingi cha pa nkhani ya vo muturya ndi kumwa, pamwenga pa nkhani ya kukumbuka mazuŵa nga maphwandu pamwenga kusunga zuŵa la mwezi wufya pamwenga kusunga sabata. 17  Vinthu venivi ntchithuthuzi cha vinthu vo vituza, kweni chayivu ve mwaku Khristu. 18  Munthu wakwanja kujiyuyuwa kwaboza, kweniso wakusopa angelu, “wakungangamiya” vinthu vo wawona, wangakuphanganingi cha mphotu. Chifukwa cha kuŵanaŵana kwaki nge munthu wambula kufikapu, iyu watijikuzga kwambula chifukwa chakuvwika, 19  ndipu walondo cha mutu, mweniyo kuporote mwaku iyu liŵavu losi lilonde vakukhumbika ndipuso lilungana pamoza mwakugwiriskiya ntchitu malunga ngaki kweniso misipi ya mumalunga ndipu likuwa nge mo Chiuta wakhumbiya. 20  Asani mukufwiya limoza ndi Khristu ku fundu zipusu zo charu chitende, ntchifukwa wuli muchita vinthu nge kuti mweche kuchigaŵa cha charu mwakujithereska ku marangu ngakuti: 21  “Mungachikonga cha, mungachiyesanga cha, mungachikwaskanga cha,” 22  kung’anamuwa vinthu vo vimala asani titivigwiriskiya ntchitu, mwakukoliyana ndi marangu ndi visambizu va ŵanthu? 23  Chinanga kuti ngenanga ngawoneka nge kuti ngazeru, kweni ngatiŵawovya cha ŵanthu kuti alimbani ndi makhumbiru nga liŵavu lawu. Ve viyo chifukwa chakuti ŵanthu asankha ŵija mo angasope Chiuta, atijiyuyuwa mwaboza ndipuso asuzga maliŵavu ngawu.

Mazu Ngam'mphata

Mazu ngaki chayingu, “wo ŵechendawonepu chisku changu.”
Wonani Mazu ngo Ngakonkhoskeka.
Panyaki kuti, “Mwakugwiriskiya ntchitu iyu.” Wonani Mazu ngo Ngakonkhoskeka.