Aheberi 9:1-28

  • Uteŵeti wakupaturika mumalu ngakupaturika nga pacharu chapasi (1-10)

  • Khristu wasere kuchanya ndi ndopa zaki (11-28)

    • Mwendapakati wa phanganu lifya (15)

9  Sonu phanganu lakwamba lajanga ndi marangu ngaki ngakuchitiya uteŵeti wakupaturika, ndipuso lajanga ndi malu ngaki ngakupaturika pacharu chapasi.  Pakuti chipinda chakwamba muchihema chinguzengeka ndipu mwenga chakuŵikapu nyali, thebulu ndipuso chakuŵikapu viŵandi vakulongo kwaku Chiuta. Chipinda chenichi chadanikanga kuti Malu Ngakupaturika.  Kweni kuseri kwa ketani lachiŵi kwenga chipinda cha chihema cho chadanikanga kuti Malu Ngakupaturika Ukongwa.  Mwenumu mwenga chiyaŵi chagolidi chakuwotchiyapu sembi za vakununkhira ndipuso bokosi laphanganu lo angulikuluŵa losi ndi golidi. Ndipu mubokosi lenili mwenga nthonga yaku Aroni yo yingusunda, mya ya phanganu ndipuso msuku wagolidi wo mwenga mana;  ndipu pachanya paki penga akerubi aunkhankhu wo chithuthuzi chawu chajalanga pa chakubenekere* maubudi. Kweni iyi ndi nyengu yakukonkhoske vinthu venivi cha.  Po vinthu venivi vikuzengeke mu nthowa yeniyi, asembi asere muchipinda chakwamba cha chihema kaŵikaŵi kuti akachiti uteŵeti wakupaturika;  kweni wasembi mura wasere yija muchipinda chachiŵi, kamoza pa chaka. Ndipu waseremu cha kwambula ndopa zo watijipereke iyu mweneku, kweniso zo wapereke maubudi nga ŵanthu anyaki ngo achita kwambula kuziŵa.  Mwaviyo, mzimu wakupaturika ulongole limu kuti nthowa ya kumalu ngakupaturika yenga yechendavumbuliki pa nyengu yo chihema chakwamba chenga checheŵaka.  Chihema chenichi ntchakuyeruzgiyapu cha mu nyengu yinu ndipu mwakukoliyana ndi ndondomeku yeniyi, vosi viŵi mphasu ndi sembi viperekeka. Kweni venivi vingafiska cha kuchitiska njuŵi ya munthu yo wachita uteŵeti wakupaturika kuŵa yakufikapu. 10  Vakwaskananga ŵaka ndi vakurya, vakumwa ndipuso mitundu yakupambanapambana yakusamba mwakukoliyana ndi mwambu.* Venga vakukhumbika mu dangu mwakukoliyana ndi liŵavu ndipu ŵanthu akhumbikanga kuchita venivi mpaka pa nyengu yakuŵikika yakunyoloske vinthu. 11  Kweni Khristu wati waza nge wasembi mura wa vinthu vamampha vo vinguchitika kali, wanguporota muchihema chikulu kweniso chamampha ukongwa, chakupangika ndi manja nga ŵanthu cha, kung’anamuwa kuti cha mu chilengedu ichi cha. 12  Wangusere mumalu ngakupaturika ndi ndopa za mbuzi cha pamwenga za matholi nganthulumi, kweni ndi ndopa zaku iyu mweneku. Wanguseremu kamoza pe mbwenu mpaka muyaya, kuti watisaniriyi utaski wamuyaya.* 13  Pakuti asani ndopa za mbuzi ndi za nkhuzi* ndipuso vyotu va tholi linthukazi vo viwazika pa ŵanthu wo afipiskika vitowesa liŵavu, 14  kwe wuli mo ndopa zaku Khristu, yo kuporote mu mzimu wamuyaya wangujipereka mweneku wambula kalema kwaku Chiuta, zingatowese njuŵi zidu ku ntchitu zakufwa kuti tichiti uteŵeti wakupaturika kwaku Chiuta wamoyu? 15  Ndichu chifukwa chaki iyu ndi mwendapakati wa phanganu lifya kuti wo adanika alonde layizgu la chihara chamuyaya, chifukwa nyifwa yachitika kuti yiwu afwatuliki ndi sembi yo yikuŵawombo ku maubudi ngo ŵenga nangu pasi pa phanganu lakali. 16  Pakuti po pe phanganu patenere so kuchitika nyifwa ya munthu yo wachita nayu phanganu lo, 17  pakuti phanganu ligwira ntchitu pa nyifwa, chifukwa ligwira ntchitu cha asani munthu yo wachita nayu phanganu ngwamoyu. 18  Ndimu so viliri kuti phanganu lakali lagwiranga ntchitu cha* kwambula ndopa. 19  Pakuti Mozesi wachikambiya ŵanthu wosi dangu lelosi la mu Dangu* lo wangupaskika, watonga ndopa za matholi, za mbuzi limoza ndi maji, weya uyera ndipuso hisopi* ndi kuwaza pabuku* kweniso pa ŵanthu wosi. 20  Iyu wakambanga kuti: “Izi ndi ndopa za phanganu lo Chiuta wakukulamulani kuti musungengi.” 21  Ndipu ndopa zo waziwazanga so pachihema kweniso paviyaŵi vosi vakuchitiya uteŵeti wakupaturika. 22  Ndipu mwakukoliyana ndi Dangu* pafufupi vinthu vosi vitoweseka ndi ndopa, ndipu kwambula kudila ndopa palivi chigowoke. 23  Mwaviyo penga pakwenere kuti vakuwoniyapu chayivu va vinthu vakuchanya vitoweseki mwakugwiriskiya ntchitu nthowa zenizi, kweni vinthu vakuchanya vikhumbika sembi zamampha ukongwa. 24  Pakuti Khristu wakusere mumalu ngakupaturika ngakupangika ndi manja cha, ngo ntchakuwoniyapu ŵaka cha malu chayingu. Kweni iyu wakusere kuchanya chayiku kuti sonu wawoneke pa masu paku* Chiuta mumalu mwaku isi. 25  Iyu wakuchita venivi mwakujipereka kaŵikaŵi cha nge mo vachitikiyanga po wasembi mura waserenga mumalu ngakupaturika chaka ndi chaka ndi ndopa zo zenga zaki cha. 26  Vikaŵengi viyo, watingi wasuzgikengi mwakuwerezawereza kutuliya po charu chikujalikiskikiya. Kweni sonu iyu mweneku wawoneke kamoza pe mbwenu mpaka muyaya pakumaliya pa mugonezi* kuti watuzgepu ubudi kuporote mu sembi yaki. 27  Nge mo viliri kuti ŵanthu atufwa kamoza pe mbwenu mpaka muyaya, kweni pavuli paki alonde cheruzgu, 28  ndimu so viliri kuti Khristu wakujipereka kamoza pe mbwenu mpaka muyaya, kuti wapingi maubudi nga ŵanthu anandi; ndipu nyengu yachiŵi yo wazamuwoneke wazamulimbana ndi ubudi cha, ndipu ŵanthu wo atimupenja ndi mtima wosi kuti ataskiki ndiwu azakumuwona.

Mazu Ngam'mphata

Pamwenga kuti, “chajalanga pamalu ngakupepese.”
Mazu ngaki chayingu, “mitundu yakupambanapambana ya maubatizu.”
Mazu ngaki chayingu, “kuti watiwombo mpaka muyaya.”
Pamwenga kuti, “ng’ombi yinthulumi.”
Mazu ngaki chayingu, “lajalikiskikanga cha.”
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “pampukutu.”
Wonani Mazu ngo Ngakonkhoskeka.
Mazu ngaki chayingu, “pa chisku chaku.”
Pamwenga kuti, “nyengu yinu.” Wonani Mazu ngo Ngakonkhoskeka.