Aheberi 8:1-13

  • Chihema chimiya vinthu vakuchanya (1-6)

  • Kupambana kwa phanganu lakali ndi lifya (7-13)

8  Sonu fundu yikulu yo tikamba njakuti: Te ndi wasembi mura nge mwenuyu ndipu waja kuchanya, kujanja lamaryi la mpandu waufumu wa Wakutumbikika Ukongwa.  Iyu ndi mteŵeti wa malu ngakupaturika ndipuso wa chihema chauneneska cho chajinthika ndi Yehova, munthu cha.  Pakuti wasembi mura weyosi wasankhika kuti waperekengi mphasu ndi sembi; mwaviyo penga pakwenere kuti uyu nayu wapereki chinthu chinyaki.  Asani wenga pacharu chapasi watingi wajengi cha wasembi, chifukwa alipu kali ŵanthu wo apereka vawanangwa mwakukoliyana ndi Dangu.*  Ŵanthu yaŵa achita uteŵeti wakupaturika mu chakuwoniyapu chayichu kweniso mu chithuthuzi cha vinthu vakuchanya, nge mo Mozesi wanguchitiya pa nyengu yo wenga pafupi kujintha chihema. Iyu wangupaskika dangu ndi Chiuta lakuti: Pakuti Iyu wakamba kuti: “Uwonesesi kuti wapanga vinthu vosi mwakulondo chakuwoniyapu cho ndingukulongo muphiri.”  Kweni sonu Yesu wapaskika uteŵeti wamampha ukongwa chifukwa ndi mwendapakati so wa phanganu lamampha, lo likujalikiskika mwadangu chifukwa cha malayizgu ngamampha.  Asani phanganu lakwamba lengavi kafukwa, patingi pakhumbikengi so phanganu lachiŵi cha.  Pakuti ŵanthu watiŵasaniya ndi mulandu wachikamba kuti: “Yehova wakamba kuti, ‘Awonani! Mazuŵa ngatuza penipo ndazamuchita phanganu lifya ndi nyumba yaku Isirayeli kweniso nyumba yaku Yuda.  Kweni lazamuyanana cha ndi phanganu lo ndinguchita ndi apapi ŵawu akali pa zuŵa lo ndinguko janja lawu pakuŵatuzga mucharu cha Ijipiti, chifukwa angulutirizga cha kusunga phanganu langu, mwaviyo ndinguleka kuŵaphwere,’ wakamba ndi Yehova. 10  “Yehova wakamba kuti, ‘Pakuti ili ndi phanganu lo ndazamuchita ndi nyumba yaku Isirayeli pavuli pa mazuŵa ngo. Ndazamuŵika marangu ngangu mumaŵanaŵanu ngawu ndipuso ndazakungalemba mumitima yawu. Ndipu ini ndazamuja Chiuta wawu, yiwu azamuja ŵanthu ŵangu. 11  “‘Ndipu palivi yo wazamusambiza so munyaki wa mucharu chaki kweniso mubali waki kuti: “Umuziŵi Yehova!” Pakuti kwamba mumana mpaka mura ukongwa pakati pawu, wosi azakundiziŵa. 12  Pakuti ndazakuŵachitiya lisungu pa ntchitu zawu zambula urunji ndipu ndazamukumbuka so cha maubudi ngawu.’” 13  Wachikamba kuti “phanganu lifya,” ndikuti lo wangupanga kali ndambula ntchitu. Sonu pakuti lamala ntchitu kweniso likota, ndikuti le pafupi kumala.

Mazu Ngam'mphata

Wonani Mazu ngo Ngakonkhoskeka.