Aheberi 6:1-20

  • Yesesani kufika pakukhwima (1-3)

  • Ŵanthu wo ŵawa, akhoma so Mwana pachimiti (4-8)

  • Simikizani chilindizga chinu (9-12)

  • Kusimikizika kwa layizgu laku Chiuta (13-20)

    • Layizgu laku Chiuta ndipuso cho walapizga visinthika cha (17, 18)

6  Mwaviyo, pakuti tikujumphaku ku chisambizu chakwamba chenichi chakukwaskana ndi Khristu, tiyeni tiyesesi kuti tifiki pakukhwima. Tingayambanga kuzenga so fawundeshoni cha, ko nkhulapa ntchitu zakufwa kweniso kuvwana mwaku Chiuta,  chisambizu cha maubatizu ndipuso kuŵika manja, kuyuka kwa akufwa ndipuso cheruzgu chamuyaya.  Ndipu asani Chiuta wazomereza, tiyesesengi kufika pakukhwima.  Kweni ŵanthu wo nyengu yinyaki angulonde ukweru, ŵeniwo akulaŵapu mphasu yawezi yakuchanya, wo so akulondiyaku mzimu wakupaturika  ndipuso ŵeniwo akulaŵapu mazu ngamampha ngaku Chiuta ndi nthazi za mugonezi* wo utuza,  kweni ŵawa, mphakusuzga kuŵayuska so kuti alapi, chifukwa yiwu ŵija akhoma so Mwana waku Chiuta pachimiti ndipuso atimulengesa pakweru.  Pakuti dongu litumbikika ndi Chiuta asani lilonde vuwa yo yituwa kaŵikaŵi, ndipu lituzga vakume vakovya wo atililima.  Kweni asani lituzga minga ndi vinthembwi,* atilijowo, lija kamanavi kutembeka ndipu pakumaliya paki liwotcheka.  Chinanga kuti tilongoro viyo, kweni isi tisimikiza kuti vinthu ve umampha kwaku yimwi akwanjiwa, mwe ndi vinthu vo vingakuwovyani kuti muzitaskiki. 10  Pakuti Chiuta ngwambula urunji cha kuti wangaluwa ntchitu yinu ndi chanju cho munguchilongo pa zina laki, pakuti munguteŵete akupaturika ndipu mweche kuŵateŵete. 11  Kweni tikhumba kuti weyosi waku yimwi walongo phamphu laviyo, kuti tije ndi chigomezgu chosi pa nkhani ya chilindizga mpaka pakumaliya. 12  Ndipuso kuti muleki kuja alesi, kweni muyezgengi wo kuporote mu chivwanu ndi kuzizipizga, ahara malayizgu. 13  Pakuti Chiuta wachilayizga Abrahamu wangulapizgiya paku iyu mweneku, chifukwa pengavi munthu munyaki weyosi wakumuluska wakuti wangalapizgiyapu. 14  Iyu wangukamba kuti: “Ndazakukutumbika nadi, ndipu ndazakukuchitiska kuti uyandani.” 15  Sonu Abrahamu wati wazizipizga, wangulonde layizgu lenili. 16  Pakuti ŵanthu alapizga mwakugwiriskiya ntchitu zina la munthu wakuluska yiwu, ndipu vo alapizga vichitiska kuti mphindanu yimali, chifukwa ntchisimikizu chakuti vo akamba vauneneska. 17  Mwakuyanana ŵaka, Chiuta pakukhumba kuŵalongo umampha akuhara layizgu kuti iyu wasintha cha khumbu laki,* wangusimikiziya* mwakuchita kulapizga, 18  kuti kuporote mu vinthu viŵi vo vingasinthika cha, vo Chiuta wangapusika cha, isi tathaŵiya kumalu ngakubisamaku tichiskiki ukongwa ndi chilatu chakuti tikoleski chilindizga cho chaŵikika panthazi pidu. 19  Te ndi chilindizga chenichi nge ndondowa ya maumoyu ngidu. Ntchakusimikizika kweniso ntchakukho, ndipu chititisereza mukati kujumpha ketani, 20  mo Yesu yo we panthazi pidu wakusere mumalu mwaku isi. Iyu waja wasembi mura kwamuyaya nge mo vinguŵiya ndi Melekizedeki.

Mazu Ngam'mphata

Pamwenga kuti, “nyengu yo yituza.” Wonani Mazu ngo Ngakonkhoskeka.
Wonani mazu ngamumphata pa Mateyu 7:16.
Pamwenga kuti, “ulongozgi waki.”
Pamwenga kuti, “wanguseleriyapu.” Mazu ngaki chayingu, “wanguja mwendapakati.”