Aheberi 5:1-14

  • Yesu waluska wasembi mura weyosi (1-10)

    • Nge mo vinguŵiya ndi Melekizedeki (6, 10)

    • Wangusambira kuvwiya chifukwa cha masuzgu (8)

    • Udindu wa kupereka utaski wamuyaya (9)

  • Watcheŵeska pa nkhani ya kuleka kukhwima (11-14)

5  Pakuti wasembi mura weyosi wakutoleka pakati pa ŵanthu, wasankhika kuti wateŵete ŵanthu pa vinthu vakukwaskana ndi kusopa Chiuta, kuti waperekengi mphasu ndi sembi za maubudi.  Iyu wafiska kuchita vinthu mwakuzika ndi ŵanthu ambula kuziŵa vinthu kweniso akubuda, pakuti iyu nayu ngwakunanga,  ndipu pa chifukwa chenichi, watenere kujipereke sembi ya maubudi ngaki, nge mo wapereke so sembi ya maubudi nga ŵanthu anyaki.  Munthu wachita kujipaska yija cha ulemu wenuwu, kweni watiwulonde pijapija asani wadanika ndi Chiuta nge mo venge ndi Aroni.  Mwakuyanana ŵaka, Khristu wangujikankhuska yija cha mwakuja wasembi mura, kweni wangukankhuskika ndi Mweniyo wangumukambiya kuti: “Yiwi ndiwi mwana wangu; msanawale ndaja wusu.”  Ndipuso nge mo wakambiyapu pamalu panyaki kuti, “Ndiwi wasembi kwamuyaya nge mo vinguŵiya ndi Melekizedeki.”  Pa nyengu ya umoyu waki wapacharu chapasi,* Khristu wangupereka mapempheru ngakuŵeyere ndipuso mapemphu, mwakuliya ukongwa kweniso ndi masozi kwaku Yo wangamutaska ku nyifwa ndipu wangumukika chifukwa chakuti wawopanga Chiuta.  Chinanga kuti wenga mwana waki, wangusambira kuvwiya chifukwa cha masuzgu ngo wangukumana nangu.  Ndipu wati wapangika kuja wakufikapu, wanguja ndi udindu wakupereka utaski wamuyaya ku ŵanthu wosi wo atimuvwiya, 10  chifukwa wakusankhika ndi Chiuta kuja wasembi mura nge mo vinguŵiya ndi Melekizedeki. 11  Te ndi vinandi vo tingakamba vakukwaskana ndi iyu, kweni mphakusuzga kuvikonkhoska chifukwa mwe ambula kuvwisa vinthu. 12  Chinanga kuti pa nyengu iyi mungwenere kuja asambizi, kweni namwi mukhumbika munthu munyaki kuti wakusambizeni kutuliya pakwamba vinthu vipusu va mu mazu ngakupaturika ngaku Chiuta, ndipu mwayamba so kukhumba mkaka mumalu mwa chakurya chakukhoma. 13  Pakuti munthu weyosi yo walutirizga kumwa mkaka watingaziŵiliya cha mazu nga urunji, chifukwa ndi litema. 14  Kweni chakurya chakukhoma ntcha ŵanthu akukhwima, ŵeniwo mwakugwiriskiya ntchitu lusu lawu la kuziŵa vinthu, asambira kupambanisa pakati pa chamampha ndi chiheni.

Mazu Ngam'mphata

Mazu ngaki chayingu, “Mu mazuŵa ngo wenga munthu.”