Aheberi 3:1-19

  • Yesu ndi mura kuluska Mozesi (1-6)

    • Vinthu vosi vikuzengeka ndi Chiuta (4)

  • Kutcheŵeska pa nkhani ya kuŵavi chivwanu (7-19)

    • “Msanawale asani mwavwa mazu ngaki” (7, 15)

3  Mwaviyo, abali akupaturika yimwi mwe mugulu lakudanikiya kuchanya, ŵanaŵaniyani vaku Yesu yo ngwakutumika kweniso wasembi mura mweniyo titimuzomera.*  Iyu wenga wakugomezgeka kwaku Chiuta yo wangumusankha, nge mo Mozesi nayu wenge wakugomezgeka munyumba yosi yaku Chiuta.  Pakuti iyu* ndiyu wakwenere unkhankhu ukulu kuluska Mozesi, chifukwa yo wazenga nyumba we ndi ulemu ukulu kuluska nyumba yo.  Mbuneneska kuti nyumba yeyosi ye ndi yo wakuyizenga, kweni Chiuta ndiyu wazenga vinthu vosi.  Sonu Mozesi wenga wakugomezgeka nge mteŵeti munyumba yosi yaku Chiuta, nge ukaboni wa vinthu vakuti vizikambiki kunthazi.  Kweni Khristu wenga wakugomezgeka nge mwana wakuwonere nyumba yaku Chiuta. Isi te nyumba yaku Chiuta asani tikoleska nadi mpaka pakumaliya wanangwa widu wakulongoro ndipuso chilindizga cho timalikiya.  Mwaviyo, nge mo mzimu wakupaturika ukambiya kuti, “Msanawale asani mwavwa mazu ngaki,  munganonopesanga mitima yinu cha, nge mo venge pa nyengu yo apapi ŵinu akali angundifyisiya mtima, nge mo venge mu zuŵa lakundiyesa mu chipululu,  mwenimo apapi ŵinu akali angundiyesa, chinanga kuti anguwona ntchitu zangu kwa vyaka 40. 10  Ndichu chifukwa chaki ndinguseruka ndi mugonezi uwu ndipu ndinguti: ‘Nyengu zosi yiwu alandizgika mumitima yawu, ndipu nthowa zangu atiziziŵa cha.’ 11  Mwaviyo, ndati ndakwiya ndingulapizga kuti: ‘Yiwu azamusere cha mu chipumulu changu.’” 12  Abali, phweriyani kope kuti munthu munyaki pakati pinu wangayamba kuja ndi mtima uheni wambula chivwanu mwa kutuwaku kwaku Chiuta wamoyu. 13  Kweni lutirizgani kuchiskana zuŵa lelosi, lo lidanika kuti “Msanawale,” ndi chilatu chakuti paŵevi wakunonopa mtima chifukwa cha chinyengu cha nthazi ya ubudi. 14  Pakuti tija akusangana ndi Khristu pijapija asani chigomezgu cho tenga nachu pakwamba, titichikoleska mpaka pakumaliya. 15  Nge mo Malemba ngakambiya kuti, “Msanawale asani mwavwa mazu ngaki, munganonopesanga mitima yinu cha, nge mo venge pa nyengu yo apapi ŵinu akali angundifyisiya mtima.” 16  Kumbi mbayani wo anguvwa kweni angumufyisa mtima? Asi ndi wosi wo angutuwa mu Ijipiti mwakulongozgeka ndi Mozesi? 17  Kweniso, kumbi mbayani wo Chiuta wanguseruka nawu kwa vyaka 40? Asi mbeniwo angubuda, wo angufwiya muchipululu? 18  Kumbi mbayani wo wanguŵalapizgiya kuti azamusere cha mu chipumulu chaki? Asi mbeniwo anguchita vinthu mwambula kuvwiya? 19  Mwaviyo, tawona kuti angutondeka kuseremu chifukwa cha kuŵavi chivwanu.

Mazu Ngam'mphata

Pamwenga kuti, “titimusumuwa.”
Kung’anamuwa, Yesu.