Aheberi 11:1-40

  • Vo chivwanu ching’anamuwa (1, 2)

  • Vakuwoniyapu va ŵanthu achivwanu (3-40)

    • Vingachitika cha kukondwesa Chiuta kwambula chivwanu (6)

11  Chivwanu ntchigomezgu chakusimikizika cha vinthu vo vilindizgika, ukaboni wakuwoneke limu* wa vinthu chayivu vo viwoneka cha.  Pakuti chifukwa cha chivwanu chenichi, ŵanthu a mu nyengu yakali ŵenga ndi ukaboni wakuti Chiuta wangukondwa nawu.  Chifukwa cha chivwanu, tiziŵa kuti migonezi yikuŵikika* mundondomeku yaki mwakugwiriskiya ntchitu mazu ngaku Chiuta, kuti vo viwoneka viŵeku kutuliya ku vinthu vo viwoneka cha.  Chifukwa cha chivwanu, Abelu wangupereka sembi yamampha ukongwa kwaku Chiuta kuluska yaku Kayini, ndipu kuporote mu chivwanu chenichi wenga ndi ukaboni wakuti wenga murunji, pakuti Chiuta wangukondwa ndi* chawanangwa chaki. Ndipu chinanga kuti wakufwa, weche kulongoro kuporote mu chivwanu chaki.  Chifukwa cha chivwanu, Enoki wangusamisika kuti waleki kuwona nyifwa ndipu wangusanirika so kwekosi cha chifukwa Chiuta wangumusamisa. Pakuti wechendasamisiki wenga ndi ukaboni wakuti wangukondwesa Chiuta.  Ndipuso kwambula chivwanu vingachitika cha kukondwesa Chiuta, pakuti weyosi yo watuza kwaku Chiuta, watenere kugomezga kuti iyu waliku nadi ndipuso kuti wapereka mphotu ku ŵanthu wosi wo atimupenja ndi mtima wosi.  Chifukwa cha chivwanu, Nowa wati watcheŵeskeka vakukwaskana ndi vinthu vo wenga wechendaviwoni, wangulongo kuti watopa Chiuta, ndipu wangukhoma chingaraŵa kuti a munyumba yaki ataskikiyemu. Ndipuso kuporote mu chivwanu chenichi, wangususka charu ndipu wanguja wakuhara urunji wo uŵapu chifukwa cha chivwanu.  Chifukwa cha chivwanu, Abrahamu wati wadanika, wanguvwiya ndipu wanguluta kucharu cho wazilondiyanga nge chihara. Wanguluta chinanga kuti waziŵangaku cha ko walutanga.  Chifukwa cha chivwanu, wanguja nge mulendu mucharu chakulayizgika nge kuti waja mucharu chachilendu. Iyu wajanga mumahema limoza ndi Isaki kweniso Yakobe wo ŵenga akuhariya nayu limoza layizgu. 10  Pakuti walindizganga tawuni yakuja ndi mafawundeshoni chayingu, yeniyo Chiuta ndiyu wakuyipanga kweniso kuyizenga. 11  Chifukwa cha chivwanu, Sara wangulonde nthazi yakume nthumbu, chinanga kuti nyengu yaki ndipu yajumphapu, pakuti wanguwona kuti Mweniyo wangulayizga ngwakugomezgeka.* 12  Pa chifukwa chenichi, kutuliya ku munthu yumoza mweniyo wenga nge wakufwa, kukubalika ŵana anandi nge nyenyezi zakuchanya ndipuso ambula kuŵerengeka nge mchenga wa mumphepeti mwa nyanja. 13  Wosi angufwa ŵe ndi chivwanu chinanga kuti angungawona cha malayizgu ngachifiskika; kweni angungawona nge patali ndipu angungalonde kweniso angupharazga pakweru kuti yiwu mbalendu ndipuso ambula kujalisa mucharu cho. 14  Pakuti wosi wo akamba venivi, alongo kuti atijipenje ndi mtima wosi malu ngawu. 15  Ndipu asani kuti nyengu zosi akumbukanga malu ngo angutuwaku, atingi aŵengi ndi mwaŵi wakuti aweriyeku. 16  Kweni sonu atesesa kuti asaniyi malu ngamampha ukongwa ngakuchanya. Mwaviyo, Chiuta wachita nawu soni cha kuti wadanikengi kuti Chiuta wawu, pakuti wakuŵanozge tawuni. 17  Chifukwa cha chivwanu, Abrahamu wati wayeseka, wanguja nge kuti wapereka kali Isaki. Munthu mwenuyu, yo wangukondwa ukongwa kulonde malayizgu, wakhumbanga kupereka mwana waki yumoza pe, 18  chinanga kuti Chiuta wangumukambiya kuti: “Yo yazamudanika kuti mphapu* yaku yazamutuliya mwaku Isaki.” 19  Kweni wanguŵanaŵana kuti Chiuta waziŵa kumuyuska chinanga nkhu nyifwa, ndipu mwantharika wangumulonde nadi kutuliya kweniko. 20  Chifukwa cha chivwanu, Isaki nayu wangutumbika Yakobe ndi Esawu pa nkhani ya vinthu vo vazanga. 21  Chifukwa cha chivwanu, Yakobe we pafupi kufwa, wangutumbika mwana munthulumi weyosi waku Yosefi ndipuso wangusopa Chiuta wanyekeza pachanya pa nthonga yaki. 22  Chifukwa cha chivwanu, Yosefi we pafupi kufwa wangukambiya limu vakukwaskana ndi ulendu wa ŵana aku Isirayeli ndipu wanguŵapaska ulongozgi wakukwaskana* ndi viwanga vaki.* 23  Chifukwa cha chivwanu, Mozesi wangubisika ndi apapi ŵaki kwa myezi yitatu kutuliya po wanguwiyaku, chifukwa anguwona kuti mwana yo wenga wakutowa ndipu angopa cha vo fumu yingulamula. 24  Chifukwa cha chivwanu, Mozesi wati wakuwa, wangukana kudanika kuti mwana wa mwana munthukazi waku Farawo, 25  ndipu wangusankha kuti wasuzgikiyi limoza ndi ŵanthu aku Chiuta, mumalu mwakusaniya likondwa la ubudi la kanyengu kamanavi, 26  chifukwa wawonanga kunyozeka kwaku Khristu, kuti ntchuma chakuzirwa kuluska chuma chaku Ijipiti. Venga viyo chifukwa walereseskanga pa mphotu yo wazilondiyanga. 27  Chifukwa cha chivwanu, wangutuwaku ku Ijipiti, kweni wangutuwaku chifukwa cha kopa ukali wa fumu cha, pakuti wangulutirizga kuma gwa nge kuti wawona wambula kuwoneka Yo. 28  Chifukwa cha chivwanu, wanguchita mwambu wa Pasika ndipuso wanguwaza ndopa, kuti wakunanga waleki kubaya* ŵana ŵawu aumwali. 29  Chifukwa cha chivwanu, angumbuka pa Nyanja Yiyera nge kuti atenda pamtunda, kweni po Aijipiti ayambukanga, yinguŵameza. 30  Chifukwa cha chivwanu, mpanda wa ku Yeriko unguwa ŵanthu ŵati aguba mwakuwuzunguliya mazuŵa 7. 31  Chifukwa cha chivwanu, Rahabi yo wenga huli, wangufwiya nawu limoza cha ŵanthu wo anguleka kuvwiya, pakuti wangulonde askoli mwachimangu. 32  Ndipu ndingakambanji so chinyaki? Pakuti nyengu yindimaliyengi kuti ndilutirizgi kukonkhoska vaku Gidiyoni, Baraki, Samusoni, Yefita, Davidi kweniso Samuyeli ndi achimi anyaki. 33  Kuporote mu chivwanu anguthereska maufumu, anguchitiska kuti paŵi urunji, angulonde malayizgu, angujala milomu ya nkharamu, 34  anguthereska nthazi ya motu, angupona ku wuyi wa lipanga. Chinanga kuti ŵenga akulopwa, angupaskika nthazi, anguja anthazi mu nkhondu ndipu anguthereska magulu ngankhondu ngo ngazanga. 35  Anthukazi angulonde akufwa ŵawu wo anguyuka ku nyifwa kweni ŵanthu anyaki angutombozgeka chifukwa angukana kuti afwatuliki mwakuwomboleka ndi chinthu chinyaki, ndi chilatu chakuti asaniyi chiyuka chamampha ukongwa. 36  Ndipu anyaki anguyeseka mwakunyozeka ndipuso angukwechulika, ndipu kuluska penapa, angumangika ndi simbi kweniso kuponyeka mujeri. 37  Anguponyeka mya, anguyeseka, angucheketeka pakati ndi sowu, angubayika ndi lipanga, anguyingayinga avwala vikopa va mbereri, vikopa va mbuzi, achisoŵa vakukhumbika, achisuzgika, achichitikiya nkhaza, 38  ndipu charu chaŵayeneriyanga cha. Anguyingayinga muchipululu, mumapiri, mumphanji* ndipuso mumphaku za charu. 39  Ndipu wosi yaŵa, chinanga kuti ukaboni unguperekeka chifukwa cha chivwanu chawu, angukuwona cha kufiskika kwa layizgu lo, 40  chifukwa Chiuta wanguchiwone limu chinthu chamampha chakuti watipaski, kuti yiwu aleki kuja akufikapu kwambula isi.

Mazu Ngam'mphata

Pamwenga kuti, “ukaboni wakusimikizika.”
Pamwenga kuti, “zinyengu zikuŵikika.” Wonani Mazu ngo Ngakonkhoskeka.
Pamwenga kuti, “wangumuchitiya ukaboni mwakuzomereza.”
Pamwenga kuti, “ngwakuthembeka.”
Mazu ngaki chayingu, “mbewu.”
Pamwenga kuti, “dangu lakukwaskana.”
Pamwenga kuti, “ndi kuŵikika kwaki mumasanu.”
Mazu ngaki chayingu, “kukwaska.”
Wonani mazu ngamumphata pa Mateyu 8:20.