Aheberi 1:1-14

  • Chiuta walongoro kuporote mu Mwana waki (1-4)

  • Mwana ngwapachanya ukongwa kuluska angelu (5-14)

1  Mwaka, Chiuta wangulongoro ndi apapi ŵidu akali mwakugwiriskiya ntchitu achimi, mu nyengu zinandi ndipuso mu nthowa zinandi.  Kweni sonu mu mazuŵa ngakumaliya yanga, walongoro nasi kuporote mu Mwana, yo wakumusankha kuti waje wakuhara vinthu vosi, ndipuso kuporote mwaku mwenuyu, wakupanga migonezi.*  Iyu walongo unkhankhu waku Chiuta ndipuso ntchikozgu chayichu cha mo Chiuta waliri, ndipu wakoleze vinthu vosi mwakugwiriskiya ntchitu mazu ngaki nganthazi. Ndipu wati watitowesa ku ubudi widu, wanguja pampandu kuchanya, kujanja lamaryi la Wakutumbikika Ukongwa.  Mwaviyo waluska angelu, mwakuti wahara zina lamampha ukongwa kujumpha lawu.  Mwakuyeruzgiyapu, kumbi ndi mungelu nuyu yo Chiuta wakumukambiyapu kuti: “Yiwi ndiwi mwana wangu; msanawale ndaja wusu”? Ndipuso kuti: “Ndazamuja wisi, ndipu iyu wazamuja mwana wangu”?  Kweni asani watumiza so mwana waki Wakwamba kuti wazi pacharu chapasi, wakamba kuti: “Ndipu angelu wosi aku Chiuta amugwadiyi.”  Ndipuso vakukwaskana ndi angelu, Chiuta wakamba kuti: “Wapanga angelu ŵaki kuja mizimu, ndipuso ateŵeti ŵaki kuja mulipu wa motu.”  Kweni vakukwaskana ndi Mwana, wakamba kuti: “Chiuta ndiyu mpandu waku waufumu muyaya mpaka muyaya, ndipu nthonga yaku ya Ufumu ndi nthonga yakunyoloka.*  Ungwanja urunji ndipu ungutinkha kuleka kuvwiya marangu. Ndichu chifukwa chaki Chiuta, Chiuta waku, wakukusankha mwakukupaka mafuta nga likondwa likulu kuluska anyaku.” 10  Ndipuso kuti: “Yimwi Ambuya, pakwamba mungujalika mafawundeshoni nga charu, ndipu kuchanya, ndi ntchitu za manja nginu. 11  Vinthu venivi vazamumala, kweni yimwi mwazamumala cha; ndipu vosi vazamumala nge mo malaya ngachitiya. 12  Mwazakuvivunga nge mkhanju ndipuso nge laya, ndipu vazamusinthika. Kweni yimwi mwazamusintha cha ndipuso vyaka vinu vazamumala cha.” 13  Kweni kumbi ndi mungelu nuyu yo wakumukambiyapu kuti: “Ja kujanja langu lamaryi mpaka po ndaŵikiya arwani ŵaku nge chakukandapu maphazi ngaku”? 14  Asi yiwu wosi ndi mizimu yakuchita uteŵeti wakupaturika, yakutumika kuchiteŵete wo azamuhara utaski?

Mazu Ngam'mphata

Pamwenga kuti, “zinyengu.”
Pamwenga kuti, “yaurunji.”