Agalatiya 1:1-24

  • Moni (1-5)

  • Palivi uthenga wamampha unyaki (6-9)

  • Uthenga wo Paulo wapharazga utuliya kwaku Chiuta (10-12)

  • Mo Paulo wangusinthiya ndipuso ntchitu zaki zakwamba (13-24)

1  Ini Paulo, wakutumika wakutuliya ku ŵanthu cha pamwenga kuporote mwa munthu, kweni kuporote mwaku Yesu Khristu ndi Chiuta, Wusefwi, yo wangumuyuska ku nyifwa,  limoza ndi abali wosi wo nde nawu, ndilembe mipingu ya ku Galatiya kuti:  Wezi ukulu kweniso chimangu vakutuliya kwaku Chiuta Awusefwi ndipuso kwa Ambuya Yesu Khristu, viŵi namwi.  Iyu wangujipereka yija chifukwa cha maubudi ngidu, kuti titaskiki ku mugonezi uheni wo* tilimu, mwakukoliyana ndi khumbu laku Chiuta widu kweniso Awusefwi,  kwaku iyu kuŵi unkhankhu muyaya mpaka muyaya. Ame.  Ndazizwa kuti mupetukaku* liŵi ukongwa kwaku Yo wakukudanani mwakugwiriskiya ntchitu wezi ukulu waku Khristu, ndipu mwaluta ku uthenga wamampha wamtundu unyaki.  Kuti pe uthenga wamampha unyaki cha; kweni pe ŵanthu anyaki wo atikusuzgani ndipu akhumba kutimbanyizga uthenga wamampha wakukwaskana ndi Khristu.  Kweni chinanga tingaŵa isi pamwenga mungelu wakutuliya kuchanya, asani wangakupharazgiyani uthenga wamampha wakupambana ndi wo tingukupharazgiyani, mbwenu watembeki.  Nge mo ndakambiya kali, ndiwerezapu so, Weyosi yo watikupharazgiyani uthenga wamampha wakupambana ndi wo mukulonde, watembeki. 10  Kumbi sonu ndikhumba kukopa ŵanthu pamwenga Chiuta? Pamwenga kumbi ndikhumba kukondwesa ŵanthu? Asani ndingulutirizga kukondwesa ŵanthu, ndatingi ndiŵengi kapolu waku Khristu cha. 11  Pakuti ndikhumba kuti muziŵi abali kuti uthenga wamampha wo ndingukupharazgiyani, ngwakutuliya ku ŵanthu cha. 12  Chifukwa ndinguwulonde kutuliya ku munthu cha pamwenga kusambizika, kweni Yesu Khristu ndiyu wangundivumbuliya. 13  Mukuvwa vakukwaskana ndi mo ndachitiyanga muchisopa cha Chiyuda kuti ndawutombozganga ukongwa* mpingu waku Chiuta ndipuso ndawunanganga. 14  Ndipu mu ŵanthu amtundu wangu, ndachitanga umampha ukongwa muchisopa cha Chiyuda kuluska nthanga zangu, chifukwa ndenga ndi phamphu ukongwa pa midawuku ya apapi ŵangu. 15  Kweni Chiuta yo wangundituzga munthumbu ya ama ndi kundidana kuporote mu wezi waki ukulu, wati wawona kuti nkhwamampha 16  kuvumbuwa Mwana waki kuporote mwaku ini, kuti ndipharazgi uthenga wamampha wakukwaskana ndi iyu ku ŵanthu amitundu yinyaki, ndinguluta nyengu yeniyo cha kuchipempha ulongozgi ku munthu weyosi.* 17  Kweniso ndingulutapu cha ku Yerusalemu ku ŵanthu wo ŵenga akutumika ini ndechendaje wakutumika, kweni ndinguluta ku Arebiya, pavuli paki ndinguwere ku Damasiko. 18  Pati pajumpha vyaka vitatu, ndinguluta ku Yerusalemu kuchikumana ndi Kefa* ndipu ndinguja nayu mazuŵa 15. 19  Kweni ndinguwonaku wakutumika weyosi cha, kupatuwaku Yakobe mvurwa wa Ambuya. 20  Sonu vakukwaskana ndi vinthu vo nditikulembiyani, nditikusimikiziyani pa masu paku Chiuta kuti ndipusika cha. 21  Pavuli paki, ndinguluta muvigaŵa va Siriya ndi Kilikiya. 22  Kweni ndaziŵikanga cha ku mipingu ya mu Yudeya yo yakoliyananga ndi Khristu. 23  Yiwu avwanga ŵaka kuti: “Munthu yo kali watitombozganga, sonu wapharazga uthenga wamampha wakukwaskana ndi chivwanu cho kali wachinanganga.” 24  Mwaviyo, angwamba kukankhuska Chiuta chifukwa chaku ini.

Mazu Ngam'mphata

Pamwenga kuti, “nyengu yiheni yo.” Wonani Mazu ngo Ngakonkhoskeka.
Pamwenga kuti, “mutuwaku.”
Mazu ngaki chayingu, “ndawutombozganga mwakujumphisa.”
Mazu ngaki chayingu, “ku mnofu ndi ndopa.”
Wadanika so kuti Peturo.