Afilipi 1:1-30

  • Moni (1, 2)

  • Kuwonga Chiuta; pempheru laku Paulo (3-11)

  • Uthenga wamampha upharazgika chinanga kuti pe masuzgu (12-20)

  • Asani ndija ndi umoyu, ndijaliya Khristu, ndipu asani ndafwa, ndiyanduwengi (21-26)

  • Muchitengi vinthu mwakukoliyana ndi uthenga wamampha (27-30)

1  Ini Paulo limoza ndi Timote, akapolu aku Khristu Yesu, tilembe akupaturika wosi akukoliyana ndi Khristu Yesu wo ŵe ku Filipi, limoza ndi akuwonere kweniso ateŵeti akovya kuti:  Wezi ukulu kweniso chimangu vakutuliya kwaku Chiuta Awusefwi ndipuso Ambuya Yesu Khristu, viŵi namwi.  Nyengu zosi ndiwonga Chiuta wangu asani nditikukumbukani  mu pempheru langu lelosi lakuŵeyere chifukwa chaku yimwi mosi. Nyengu yeyosi yo ndipemphera mwakuŵeyere, ndikondwa,  chifukwa cha vo muchita kuti mulutisi panthazi uthenga wamampha kutuliya pa zuŵa lakwamba mpaka sonu.  Pakuti pa fundu iyi pe, nde ndi chigomezgu chosi kuti yo wakwambisa ntchitu yamampha pakati pinu, ndiyu wazakuyimaliza mpaka mu zuŵa laku Khristu Yesu.  Mphakwenere kuti ndiŵanaŵanengi viyo vakukwaskana ndi yimwi mosi, pakuti mwe mumtima mwangu ndipuso yimwi musangana nani wezi ukulu mu kumangika kwangu ndipuso pakuvikiliya ndi kujalikiska mwadangu uthenga wamampha.  Pakuti Chiuta ndi kaboni wangu kuti ndikhumbisiska kukuwonani mosi ndi chanju chikulu nge cho Khristu Yesu we nachu.  Ndipu venivi ndivu ndilutirizga kupemphere kuti chanju chinu chilutirizgengi kukuwa limoza ndi kuziŵa vinthu mwauneneska ndipuso kuvwisa vinthu vosi; 10  kuti musimikizi kuti vinthu vakukhumbika ukongwa ndi nivi, ndi chilatu chakuti muje ambula kalema kweniso ambula kuguŵiska ŵanthu anyaki mpaka mu zuŵa laku Khristu; 11  ndipuso kuti muzaziki ndi chipasu chaurunji, cho chiziya mwaku Yesu Khristu, kuti Chiuta wakankhuskiki kweniso wathamikiki. 12  Sonu ndikhumba kuti yimwi abali muziŵi kuti vo vandichitikiya, vawovya kuti uthenga wamampha uluti panthazi, 13  mwakuti kumangika kwangu chifukwa chaku Khristu, kwaziŵika umampha pakati pa asilikali wosi akuvikiliya fumu kweniso ŵanthu anyaki wosi. 14  Sonu abali anandi mwa Ambuya aja ndi chiganga chifukwa cha kumangika kwangu, ndipu alutirizga kulongo chiganga pakulongoro mazu ngaku Chiuta mwambula mantha. 15  Mbuneneska kuti anyaki apharazga Khristu chifukwa cha bina ndipuso mphindanu, kweni anyaki ŵe ndi maŵanaŵanu ngamampha. 16  Achiŵi yaŵa apharazga Khristu chifukwa cha chanju, pakuti aziŵa kuti ndikuŵikika kuti ndivikiliyi uthenga wamampha. 17  Kweni akwamba yaŵa apharazga chifukwa cha mphindanu, ndipu ŵe ndi maŵanaŵanu ngaheni, pakuti akhumba kundiyambisiya masuzgu mu kumangika kwangu. 18  Sonu cho chichitika ntchinthu wuli? Cho chichitika ŵaka ntchakuti mu nthowa yeyosi, kwali paŵi chinyengu pamwenga uneneska, Khristu wapharazgika, ndipu venivi vitindikondwesa ukongwa. Kukamba uneneska ndilutirizgengi kukondwa, 19  pakuti ndiziŵa kuti venivi vichitiskengi kuti nditaskiki kuporote mu mapempheru nginu ngakuŵeyere ndipuso chovyu cha mzimu waku Yesu Khristu. 20  Venivi vikoliyana ndi vo ndikhumbisiska kweniso vo ndilindizga vakuti ndazamuchitapu soni cha mu nthowa yeyosi, kweni nge mo vajaliya kuvuli kosi uku, mwakugwiriskiya ntchitu wanangwa wakulongoro, Khristu sonu wakuzgiki mwakugwiriskiya ntchitu liŵavu langu, kwali ndingaja wamoyu pamwenga ndingafwa. 21  Kwaku ini, asani ndija ndi umoyu, ndijaliya Khristu, ndipu asani ndafwa, ndiyanduwengi. 22  Sonu asani ndilutirizga kuja ndi umoyu mu liŵavu, ntchipasu cha ntchitu yangu, kweni cho ndingasankha ndingakamba cha. 23  Ndigaŵikanengi pa vinthu viŵi venivi, pakuti ndikhumba kufwatuka ndi kujaliya limoza ndi Khristu, chenicho ndisimikiza kuti ntchinthu chamampha ukongwa. 24  Kweni mphakwenere ukongwa kuti ini ndilutirizgi kuja mu liŵavu chifukwa chaku yimwi. 25  Mwaviyo, pakuti ndisimikiza va nkhani yeniyi, ndiziŵa kuti ndilutirizgengi kuja ndi umoyu ndipu ndilutirizgengi kuja ndi yimwi mosi kuti muluti panthazi kweniso kuti mukondwengi mu chivwanu, 26  kuti likondwa linu lizazi ukongwa mwaku Khristu Yesu chifukwa chaku ini asani ndaza so kwaku yimwi. 27  Chakukhumbika ukongwa ntchakuti, muchitengi vinthu mwakukoliyana ndi uthenga wamampha wakukwaskana ndi Khristu, kuti chinanga ndingaza kuzikuwonani pamwenga po nde kutali, ndivwengi vakukwaskana ndi yimwi kweniso ndiziŵengi kuti mwe ambula kunderezeka mu mzimu umoza ndi mtima umoza,* ndipu mosi pamoza mutesesa kuja ndi chivwanu cha uthenga wamampha, 28  ndipuso mutiŵawopa cha wo atikususkani. Venivi vilongore limu kuti azamubayika, kweni yimwi mwazamutaskika; ndipu venivi vatuliya kwaku Chiuta. 29  Pakuti yimwi mwapaskika mwaŵi chifukwa chaku Khristu kuti muje ndi chivwanu mwaku iyu, kweniso kuti musuzgiki chifukwa chaku iyu. 30  Chifukwa mukumana ndi masuzgu ngo munguwona ini ndichikumana nangu, ngeningo sonu mutuvwa kuti ndeche kukumana nangu.

Mazu Ngam'mphata

Pamwenga kuti, “ndipuso mwakukoliyana.”