Aefeso 5:1-33

  • Kulongoro vamampha kweniso jalidu lamampha (1-5)

  • Yendani nge ŵana a kuŵala (6-14)

  • Muzaziki ndi mzimu (15-20)

    • Muyigwiriskiyengi ntchitu mwakwenere nyengu yinu (16)

  • Ulongozgi kwa anthulumi akuto ndi anthukazi akuyirwa (21-33)

5  Mwaviyo, muyezgengi Chiuta nge ŵana ŵaki akwanjiwa.  Ndipuso lutirizgani kwenda mu chanju nge mo Khristu nayu wakutiyanjiya* ndi kujipereka yija chifukwa chaku isi,* nge chakupereka kweniso sembi, ndipu venivi ndi fungu lamampha ukongwa kwaku Chiuta.  Malusu ngaheni ngakugonana* kweniso mtundu wewosi wa ukazuzi pamwenga mbunu, vingazumbulikanga ndi kuzumbulika cha pakati pinu, nge mo akupaturika atenere kuchitiya.  Mungazumbuwanga cha chinanga ndi mijalidu yakuchitiska soni, pamwenga nkhani zakupusa, pamwenga njerengu zakutuka, vo ndi vinthu vambula kwenere. Mumalu mwaki, muwongengi.  Pakuti fundu iyi mutiyiziŵa kweniso yimwi mwaŵeni muŵanika umampha kuti munthu weyosi wakuchita malusu ngaheni ngakugonana* pamwenga munthu wakufipiskika, pamwenga wakuchita mbunu, kung’anamuwa kusopa ngoza, wazamuhara cha Ufumu waku Khristu kweniso waku Chiuta.  Munthu weyosi wangakupusikaningi cha ndi mazu ngaŵakaŵaka, pakuti chifukwa cha vinthu venivi, ukali waku Chiuta uziyengi ŵana ambula kuvwiya.  Mwaviyo, mungachitangaku nawu cha.  Pakuti kali yimwi mwenga mdima kweni sonu ndimwi ukweru mwakukoliyana ndi Ambuya. Lutirizgani kwenda nge ŵana a kuŵala.  Pakuti ukweru utuzga mtundu wewosi wa chamampha, urunji kweniso uneneska. 10  Lutirizgani kusimikiza kuti chakuzomerezeka kwa Ambuya ndi nichi. 11  Ndipu lekani kuchitaku ntchitu zambula kovya za mdima, mumalu mwaki muzivumbuwi kuti ziheni. 12  Pakuti vinthu vo achita mwachisisi, vakuchitiska soni chinanga nkhuvizumbuwa. 13  Sonu vinthu vosi vo vivumbulika,* viziŵika chifukwa cha ukweru, pakuti chinthu chechosi cho chiziŵika, mbukweru. 14  Mwaviyo, kukambika kuti: “Yuka wakugona yiwi, kweniso yuka ku nyifwa, ndipu Khristu wakumbulikiyengi.” 15  Mwaviyo lutirizgani kuphwere ukongwa kuti mungayendanga nge ŵanthu ambula zeru cha, kweni nge ŵanthu azeru. 16  Nyengu yinu muyigwiriskiyengi ntchitu mwakwenere,* pakuti tija mu mazuŵa ngaheni. 17  Pa chifukwa chenichi lekani kuja ŵanthu ambula zeru, kweni lutirizgani kuziŵa kuti khumbu laku Yehova ndakuti wuli. 18  Kweniso mungaloŵiyanga cha ndi vinyu, mweniyo walongozge ku nkharu ziheni. Kweni lutirizgani kuzazika ndi mzimu. 19  Mukambiskanengi* masalimo, va kuthamika Chiuta kweniso sumu zauzimu; mumbengi ndi kuthamika Yehova mumitima yinu. 20  Nyengu zosi muwongengi Chiuta widu kweniso Awusefwi pa chinthu chechosi, mu zina la Ambuyafwi Yesu Khristu. 21  Weyosi watherengi ku munyaki mwakopa Khristu. 22  Anthukazi akuyirwa ajithereskengi kwa alumu ŵawu nge mo atijithereske kwa Ambuya, 23  pakuti munthulumi ndi mutu wa muwolu waki nge mo Khristu waliri mutu wa mpingu pakuŵa mtaski wa liŵavu lenili. 24  Ndipu nge mo mpingu utijithereske kwaku Khristu, anthukazi akuyirwa nawu atenere kujithereska kwa alumu ŵawu mu vinthu vosi. 25  Mwaŵanthulumi, lutirizgani kwanja awolu ŵinu nge mo Khristu nayu wakwanjiya mpingu ndipu wakujipereka chifukwa cha mpingu wo, 26  kuti wawupatuwi, wawutowesi ndi maji mwakugwiriskiya ntchitu mazu, 27  ndi chilatu chakuti walonde mpingu wo, we wakutowa ukongwa, wambula donthu, wambula nkhwinya pamwenga kanthu kekosi ka viyo, kweni we wakupaturika ndipuso wambula kalema. 28  Mwakuyanana waka, anthulumi atenere kwanja awolu ŵawu nge maliŵavu nga ŵeneku. Munthu yo watanja muwolu waki watijiyanja yija, 29  pakuti palivi munthu yo watinkha liŵavu laki, kweni watiliryisa ndipuso watiliyanja, nge mo Khristu wachitiya ndi mpingu, 30  chifukwa te viŵalu va liŵavu laki. 31  “Pa chifukwa chenichi munthulumi wazamuleka awisi ndi anyina ndipu wazakujibatika ku* muwolu waki, ndipu wosi ŵaŵi azamuja liŵavu limoza.” 32  Chisisi chakupaturika ichi ntchikulu ukongwa. Sonu ndikamba vakukwaskana ndi Khristu kweniso mpingu. 33  Kweni chinanga vingaŵa viyo, munthulumi weyosi wayanjengi muwolu waki nge mo watijiyanjiya mweneku, ndipuso munthukazi nayu wamutumbikengi ukongwa mulumu waki.

Mazu Ngam'mphata

Panyaki kuti, “wakukuyanjiyani.”
Panyaki kuti, “yimwi.”
Mu Chigiriki, por·neiʹa. Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “vichenyeka.”
Mazu ngaki chayingu, “Mugulengi nyengu yakuŵikika.”
Panyaki kuti, “Mujikambiyengi.”
Pamwenga kuti, “ndipu wazamulutirizga kuja ndi.”