Aefeso 1:1-23

  • Moni (1, 2)

  • Vitumbiku vauzimu (3-7)

  • Kuwunganisa vinthu vosi mwaku Khristu (8-14)

    • “Nthowa yakwendese vinthu” pa nyengu yakuŵikikiya limu (10)

    • Kudindika chidindu ndi mzimu “ntchikoli chakuperekeke limu” (13, 14)

  • Paulo wawonga Chiuta chifukwa cha Akhristu aku Efeso, watiŵapemphere (15-23)

1  Ini Paulo, wakutumika waku Khristu Yesu chifukwa cha khumbu laku Chiuta, ndilembe akupaturika wo ŵe ku Efeso, ndipuso ŵeniwo mbakugomezgeka mwakukoliyana ndi Khristu Yesu kuti:  Wezi ukulu kweniso chimangu vakutuliya kwaku Chiuta Awusefwi, ndi Ambuya Yesu Khristu viŵi namwi.  Walumbiki Chiuta, kweniso Wisewu wa Ambuyafwi Yesu Khristu, pakuti wakutitumbika ndi vitumbiku vosi vauzimu mumalu ngakuchanya mwakukoliyana ndi Khristu,  wachitisankha charu chechendajalikiskiki kuti tije akukoliyana ndi iyu,* ndi chilatu chakuti tilongo chanju, tije akupaturika kweniso ambula kalema pa masu paki.  Pakuti wakutisankhiya limu kuti tisambuki ŵana ŵaki kuporote mwaku Yesu Khristu, mwakukoliyana ndi vo vingumunozge kweniso khumbu laki,  ndi chilatu cha kuthamika wezi waki ukulu waunkhankhu wo wakuwupereka mwachanju kwaku isi mwakugwiriskiya ntchitu wakwanjiwa waki.  Mwakugwiriskiya ntchitu iyu, tafwatulika ndi sembi yakuwombole kuporote mu ndopa za munthu mwenuyu, ndipu tagowokereka nadi maubudi ngidu mwakukoliyana ndi chuma cha wezi waki ukulu.  Wanguchitiska kuti wezi ukulu wenuwu tiwulonde unandi mu zeru zosi kweniso mu kuvwisa vinthu,*  mwakutiziŵisa chisisi chakupaturika cha khumbu laki. Chisisi chenichi chikoliyana ndi venivo vikumunozge kweniso khumbu laki, 10  kuti waŵiki nthowa yakwendese vinthu asani nyengu yakuŵikika yamaliya limu, ndi chilatu chakuti wawunganisi pamoza vinthu vosi mwaku Khristu, vinthu vakuchanya ndi vinthu vapacharu chapasi. Mwaku iyu 11  mweniyo te akukoliyana nayu ndipuso tikuŵikika nge akuhara, pakuti wangutisankhiya limu mwakukoliyana ndi khumbu laku yo wafiska vinthu vosi nge mo wasankhiya mwakukoliyana ndi khumbu laki, 12  kuti isi taja akwamba ku chilindizga cha mwaku Khristu, tichitiski kuti Chiuta wathamikiki ndi kukankhuskika. 13  Kweniso mungulindizga mwaku iyu mwati mwavwa mazu ngauneneska, ngo mbuthenga wamampha wakukwaskana ndi utaski winu. Mwati mwagomezga, mungudindika chidindu kuporote mwaku iyu ndi mzimu wakupaturika wo mungulayizgika. 14  Mzimu wenuwu ntchikoli* chakuperekeke limu cha chihara chidu, ndi chilatu chakuti ŵanthu aku Chiuta afwatuliki mwakugwiriskiya ntchitu sembi yakuwombole, kuti Chiuta wathamikiki ndi kukankhuskika. 15  Ndichu chifukwa chaki po ndikuvwiya vakukwaskana ndi chivwanu cho mwe nachu mwa Ambuya Yesu ndipuso chanju chenicho mulongo akupaturika wosi, nani 16  ndilekeza cha kuwonga Chiuta chifukwa chaku yimwi. Ndilutirizga kukuzumbuwani mu mapempheru ngangu, 17  kuti Chiuta wa Ambuyafwi Yesu Khristu, Ada aunkhankhu, wakupaskeni mzimu wa zeru ndipuso wakuvwisa vinthu vo iyu wavumbuwa, kuti mumuziŵi umampha. 18  Iyu wangweruska masu nga mtima winu, kuti muziŵi chilindizga cho wakukudaniyani, kweniso chuma chaunkhankhu cho wasunga nge chihara cha akupaturika, 19  ndipuso ukulu wa nthazi zaki zakujumpha mwesu kwaku isi akugomezga. Venivi vikoliyana ndi vo wachita mwakugwiriskiya ntchitu nthazi zaki zikulu, 20  zo wangulongo Khristu po wangumuyuska ku nyifwa ndi kumujalika kujanja laki lamaryi mumalu ngakuchanya, 21  wakumuŵika pachanya ukongwa kuluska boma lelosi, mazaza ngosi, nthazi zosi, wakuwusa weyosi ndipuso zina lelosi lo lidanika, mu mugonezi wunu* kweniso mu mugonezi wo utuza. 22  Chiuta wathereske so vinthu vosi kusi kwa maphazi ngaki ndipuso wakumuŵika kuja mutu wa vinthu vosi vakukwaskana ndi mpingu, 23  wo ndi liŵavu laki. Mpingu wenuwu ngwakuzaza ndi iyu, yo wazaza vinthu vosi mu nthowa yeyosi.

Mazu Ngam'mphata

Kung’anamuwa Khristu.
Pamwenga kuti, “kweniso mu kuwamu.”
Pamwenga kuti, “ntchisimikizu cha vinthu vo vituza.”
Pamwenga kuti, “mu nyengu yinu.” Wonani Mazu ngo Ngakonkhoskeka.