2 Peturo 3:1-18

  • Ŵanthu akunyoza aleke dala kuziŵa kuti kutuza pharanyiku (1-7)

  • Yehova waswerengi cha (8-10)

  • Ŵanaŵaniyani mtundu wa munthu yo mutenere kuja (11-16)

    • Kuchanya kufya ndi charu chapasi chifyah (13)

  • Jani masu kuti muleki kulandizgika (17, 18)

3  Akwanjiwa, iyi ndi kalata yachiŵi sonu kukulembiyani. Nge mo ndingukulembiyani mukalata yangu yakwamba, ndisukunyisa lusu linu lakuŵanaŵana umampha mwakukukumbusani,  kuti mukumbukengi mazu ngo ngakukambika kali* ndi achimi akupaturika ndipuso dangu la Ambuya, Mtaski, kuporote mwa akutumika ŵinu.  Chakwamba ziŵani kuti, mu mazuŵa ngakumaliya, akunyoza azamukuza ndi kunyoza kwawu ndipu azamulutirizga kuchita mwakukoliyana ndi makhumbiru ngawu  ndi kukamba kuti: “Kwe pani kuŵapu kwaki kwakulayizgika? Chifukwa kwambiya pa zuŵa lo apapi ŵidu akali akufwiya, vinthu vilutirizga kuja nge mo venge kutuliya po chilengedu chikwambiya.”  Pakuti akaniya dala fundu yauneneska yakuti, kali kwenga kuchanya ndipuso charu chapasi chakuti gwa pamaji ndipu chenga pakati pa maji chifukwa cha mazu ngaku Chiuta.  Chifukwa cha mazu ngenanga, charu cha mu nyengu yo, chingunangika chati chazaza ndi maji.  Kweni chifukwa cha mazu ngenanga so, kuchanya ndi charu chapasi vasungikiya motu ndipu vilutirizga kusungika mpaka pa zuŵa la cheruzgu ndipuso pa zuŵa la kunangika kwa ŵanthu ambula kopa Chiuta.  Akwanjiwa, ndikhumba cha kuti muleki kuziŵa kuti kwaku Yehova, zuŵa limoza le nge vyaka 1,000, ndipu vyaka 1,000 ve nge zuŵa limoza.  Yehova waswerengi cha kufiska layizgu laki nge mo ŵanthu anyaki aŵanaŵaniya kuti waswera. Iyu wazizipizga namwi chifukwa wakhumba cha kuti weyosi waku yimwi wanangiki, kweni wakhumba kuti weyosi walapi. 10  Kweni zuŵa laku Yehova lizengi nge munkhungu, penipo kuchanya kwazamutuwapu mwakupoma, kweni vinthu vo vipanga kuchanya ndi charu chapasi vazamusongonoka chifukwa cha kotcha kwanthazi, ndipu charu limoza ndi ntchitu zaki vazamuwoneke pakweru. 11  Pakuti vinthu vosi venivi vazamusongonoka mu nthowa yeniyi, ŵanaŵaniyani mtundu wa munthu yo mutenere kuja. Mutenere kuja ndi nkharu yakupaturika kweniso muchitengi vinthu vakulongo kuti mwe akujipereka kwaku Chiuta, 12  muchilindizga kweniso muchilutirizga kukumbuka* kuŵapu kwa zuŵa laku Yehova, penipo charu chazamunangika ndi motu, ndipu vinthu vo vipanga kuchanya ndi charu chapasi vazamusongonoka chifukwa cha kotcha kwanthazi! 13  Kweni mwakukoliyana ndi layizgu laki, tilindizga kuchanya kufya ndi charu chapasi chifya, ndipu mwenumu mwazamuja urunji. 14  Mwaviyo akwanjiwa, pakuti mulindizga vinthu venivi, ŵikanipu mtima kuti pakumaliya iyu wazikusaniyeni ambula mdonthu, ambula kalema ndipuso mwe muchimangu. 15  Kweniso, muwonengi kuti kuzizipizga kwa Ambuyafwi mbutaski, nge mo Paulo mubali widu wakwanjiwa wakulembe mwakukoliyana ndi zeru zo wangupaskika. 16  Iyu wakulongoro vakukwaskana ndi vinthu venivi mumakalata ngaki ngosi, kweni vinthu vinyaki vo wakulemba, vakusuzga kuvivwisa ndipu ŵanthu ambula kusambira* kweniso ambula kujalikiskika ativinyongolo nge mo achitiya so ndi Malemba nganyaki ngosi, ndipu atijidaniya pharanyiku. 17  Mwaviyo yimwi akwanjiwa, pakuti mwaziŵiya limu, jani masu kuti ŵanthu wo aleka kuvwiya marangu aleki kukulandizgani ndi ubudi wawu, kweniso kuti muleki kusukunyika. 18  Kweni lutirizgani kukuwa mu wezi ukulu kweniso kuziŵa Ambuyafwi ndi Mtaski widu Yesu Khristu. Kwaku iyu kuŵi unkhankhu sonu mpaka muyaya. Ame.

Mazu Ngam'mphata

Pamwenga kuti, “vinthu vo vikukambikiya limu.”
Pamwenga kuti, “muchikhumbisiska.” Mazu ngaki chayingu, “muchithaŵirizga.”
Pamwenga kuti, “ambula kusambizika.”