2 Atesalonika 1:1-12

  • Moni (1, 2)

  • Kukuwa kwa chivwanu cha Atesalonika (3-5)

  • Kuweze ambula kuvwiya (6-10)

  • Kupemphere mpingu (11, 12)

1  Ini Paulo, nde limoza ndi Silivano* kweniso Timote. Ndilembe mpingu wa Atesalonika wakukoliyana ndi Chiuta Ada kweniso Ambuya Yesu Khristu kuti:  Wezi ukulu ndi chimangu vakutuliya kwaku Chiuta Ada kweniso Ambuya Yesu Khristu, viŵi namwi.  Titenere kuwonga Chiuta nyengu zosi chifukwa chaku yimwi abali. Venivi vakwenere chifukwa chivwanu chinu chikuwa ukongwa ndipu chanju cho mwe nachu pakati pinu mosi, chilutirizga kusazgikiyaku.  Venivi vichitiska kuti tikunyadiyeningi pakati pa mipingu yaku Chiuta chifukwa cha kukunthiyapu kwinu kweniso chivwanu chinu muchitombozgeka kweniso mu masuzgu nginu ngosi ngo mukumana nangu.*  Uwu mbukaboni wakuti Chiuta wayeruzga mwaurunji, ndipu venivi vachitiska kuti yimwi muje akwenere Ufumu waku Chiuta wo mutiwusuzgikiya nadi.  Pakuti mburunji nadi kuti Chiuta waweze suzgu kwaku wo atikusuzgani.  Kweni yimwi musuzgika, mwazamupumuwa limoza ndi isi pa nyengu yo Ambuya Yesu azamuvumbulikiya kutuliya kuchanya ndi angelu ŵawu anthazi,  mu motu wakulipuka, achiweze ŵanthu wo aleka kuziŵa Chiuta ndi wo aleka kuvwiya uthenga wamampha wakukwaskana ndi Yesu, Ambuyafwi.  Ŵanthu ŵenaŵa azamuyeruzgika kuti anangiki kwamuyaya ndi kutuzgikapu pa masu pa Ambuya ndi pa unkhankhu wa nthazi zawu. 10  Venivi vazamuchitika pa nyengu yo aziyengi kuti azikankhuskiki mwakukoliyana ndi akupaturika ŵawu ndipuso kuti wosi wo ŵe ndi chivwanu aziŵawoni kuti mbakuziziswa, chifukwa munguvwana ndi ukaboni wo tingukupaskani. 11  Mwaviyo nyengu zosi titikupempheriyani, kuti Chiuta widu wakuwoneni kuti mwe akwenere kudanika ndipuso kuti ndi nthazi zaki wagwiri mwakukwana ntchitu zosi zo zitimukondwesa kweniso ntchitu yeyosi ya chivwanu. 12  Ve viyo kuti mwakukoliyana ndi wezi ukulu waku Chiuta ndipuso wa Ambuya Yesu Khristu, zina la Ambuya Yesu likankhuskiki kuziya mwaku yimwi ndipuso namwi mwakukoliyana ndi yiwu.

Mazu Ngam'mphata

Wadanika so kuti Sila.
Pamwenga kuti, “kweniso mu masuzgu ngo mukunthiyapu.”