2 Akorinto 9:1-15

  • Achiskika kuti aperekengi (1-15)

    • Chiuta watanja munthu yo wapereka mwakukondwa (7)

9  Sonu vakukwaskana ndi uteŵeti wo utovya akupaturika, mphakwenere cha kuti ndichiti kukulembiyani,  pakuti ndiziŵa kukhumbisiska kwinu ndipu ndimalikiya ŵanthu a ku Makedoniya kuti ŵanthu a ku Akaya aja akunozgeka kwa chaka sonu, ndipu phamphu linu lachiska anandi mwaku yiwu.  Kweni ndatuma abali kuti kumalika kwidu vakukwaskana ndi yimwi kuleki kuja kwaŵaka pa nkhani iyi, ndipuso kuti muje akunozgeka nge mo ndingukambiya kuti muchitiyi.  Kweni asani ndingaza ndi ŵanthu a ku Makedoniya ndi kusaniya kuti mwechendanozgeki, ini ndi yimwi tazamuchita soni ukongwa chifukwa chakuti titikugomezgani.  Sonu ndawona kuti mphakwenere kuchiska abali kuti ŵazi kweche nyengu kuzito mphasu zinu zinandi zakunozge limu zo mungulayizga, ndi chilatu chakuti venivi vichitikiyi limu, nge vinthu vakuchita kuphanga cha, kweni nge mphasu zakukhumba mwija.  Kweni pa nkhani yeniyi, weyosi yo wamija mwakasu, wazamuvuna timanavi, ndipu weyosi yo wamija vinandi, wazamuvuna vinandi.  Weyosi wachiti nge mo wasimikiziya mumtima mwaki, mwakudinginyika* cha pamwenga mwakuchichizgika, pakuti Chiuta watanja munthu yo wapereka mwakukondwa.  Kweniso Chiuta wangafiska kukusazgiyaniku wezi waki ukulu kuti nyengu zosi mujengi ndi vinthu vakukwana vakuti vikuwovyeningi, kweniso kuti mujengi ndi vinthu vinandi vakovya pa ntchitu zosi zamampha.  (Nge mo vikulembeke kuti: “Iyu wagaŵa ukongwa* ndipuso wapaska akavu. Urunji waki ulutiriya mpaka muyaya.” 10  Sonu Mweniyo wapereka mbewu yinandi ku wakumija kweniso yo wapereka chiŵandi kuti munthu waryi, wazamupereka ndi kuyandanisa mbewu kuti yimwi mumiji, ndipuso wazamusazgiyaku vakuvuna va urunji winu.) 11  Mu vinthu vosi, muwovyeka kuja akupaska mu nthowa zakupambanapambana, ndipu venivi vichitiska kuti ŵanthu awongengi kwaku Chiuta kuporote mu vakuchita vidu. 12  Pakuti uteŵeti wakovya ŵanthu wosi wenuwu, ngwakovya akupaturika pa vakukhumbika vawu pe cha, kweni utovya so kuti paŵi mapempheru nganandi ngakuwonga Chiuta. 13  Chifukwa cha ukaboni wo uteŵeti wenuwu upereka, yiwu akankhuska Chiuta pakuti mutijithereska ku uthenga wamampha wakukwaskana ndi Khristu weniwo mutiwupharazga pakweru, ndipuso pakuti mupereka mwamasangu kwaku yiwu kweniso ku ŵanthu wosi. 14  Yiwu atikupempheriyani mwakuŵeyere, ndipuso alongo kuti atikuyanjani chifukwa cha wezi ukulu ukongwa waku Chiuta wo mwalongoleka. 15  Wawongeki Chiuta chifukwa cha mphasu yaki yawezi yambula makambika.

Mazu Ngam'mphata

Pamwenga kuti, “mwambula kukhumba.”
Pamwenga kuti, “wagaŵa mwamasangu.”