2 Akorinto 8:1-24

  • Mphasu zakuluta nazu kwa Akhristu a ku Yudeya (1-15)

  • Tito watumikengi ku Korinto (16-24)

8  Sonu abali, tikhumba kuti muziŵi vakukwaskana ndi wezi ukulu waku Chiuta wo waperekeka ku mipingu ya ku Makedoniya.  Likondwa lawu likulu kweniso ukavu wawu, vinguŵachitiska kuti aje akupaska ukongwa pa nyengu yo ayesekanga ukongwa chifukwa cha masuzgu.  Pakuti angupereka mwakukoliyana ndi mo asaniriya ndipu ndipereka ukaboni kuti angupereka vinandi kuluska mo asaniriya.  Mwakukhumba kwawu atipemphanga kuti aŵi ndi mwaŵi wakupereka mphasu zawezi,* kuti achiteku uteŵeti wakovya akupaturika.  Yiwu anguchita vo taŵanaŵananga pe cha, kweni chakwamba angujipereka ŵija kwa Ambuya kweniso kwaku isi kuporote mu khumbu laku Chiuta.  Mwaviyo, tinguchiska Tito kuti nge mo wangwambiyapu kali ntchitu yeniyi pakati pinu, wamalizi so kulonde mphasu zinu zo mupereka chifukwa cha chanju.  Muchita umampha ukongwa mu vinthu vosi. Chivwanu chinu ntchakukho. Mukuziŵa kulongoro. Muziŵa vinthu ukongwa. Vinthu vosi mutivichita mwaphamphu. Mutanja ukongwa anyinu nge mo isi titikuyanjiyani. Mwaviyo namwi so lutirizgani kuja ndi mtima wakupaska.  Ndikamba venivi kuti ndikulamuleni cha, kweni kuti ndikuwovyeni kuziŵa phamphu la ŵanthu anyaki kweniso kuti ndiwoni asani chanju chinu ntchauneneska.  Pakuti muziŵa wezi ukulu wa Ambuyafwi Yesu Khristu, kuti chinanga kuti ŵenga akukhupuka, anguja akavu chifukwa chaku yimwi, kuti yimwi muje akukhupuka kuziya mu ukavu wawu. 10  Pa nkhani yeniyi ndipereka maŵanaŵanu ngangu: Ndikamba venivi kuti muyanduwi, pakuwona kuti chaka chajumphapu kutuliya po mungwambisiya venivi ndipu mungwambisa ŵaka cha, kweni mungulongo so kuti mukhumbisiska kuchitapu kanthu. 11  Mwaviyo, malizani so vo mukwamba kuchita kuti khumbu linu lakuti muchitepu kanthu lifiskiki mwakukoliyana ndi vo mwe navu. 12  Pakuti asani mphasu yaperekeka mwakukhumbisiska, njakuzomerezeka kwaku Chiuta, ndipu yitenere kuperekeka mwakukoliyana ndi vo munthu walivi cha, kweni mwakukoliyana ndi vo we navu. 13  Pakuti ndikhumba cha kuti kwa anyaki vije vambula kusuzga, kweni kwaku yimwi vije vakusuzga. 14  Pa fundu yakuti paŵi kuyanana, vinandi vo mwe navu pasonu panu viwovyi pa kupereŵere kwawu, kuti vinandi vo ŵe navu viwovyi so pa kupereŵere kwinu, ndi chilatu chakuti paŵi kuyanana. 15  Nge mo vikulembeke kuti: “Munthu yo wenga ndi vinandi, wenga ndi vinandi ukongwa cha, ndipu munthu yo wenga ndi vimana wenga ndi vimana ukongwa cha.” 16  Sonu wawongeki Chiuta, chifukwa wachitiska kuti Tito waje ndi mtima wakukuŵanaŵaniyani nge mo isi tichitiya, 17  chifukwa tati tamuchiska, wanguchitapu kanthu, kweni mwakukhumba kwaki ngwakunozgeka kuza kwaku yimwi. 18  Kweni limoza ndi iyu tatumiza mubali yo mipingu yosi yitimulumba chifukwa cha vo wachita vakukwaskana ndi uthenga wamampha. 19  Ndi venivi pe cha, kweni wakusankhika ndi mipingu kuti tiyendengi nayu, tichiwonere mphasu zakuperekeka chifukwa cha chanju, kuti Ambuya akankhuskiki kweniso kuti tilongo ukaboni wakuti tikhumbisiska kovya anyaki. 20  Mwaviyo tiphwere kuti munthu weyosi waleki kutisaniya chifukwa pa nkhani ya vakupereka vawanangwa vo isi tiwonere. 21  Pakuti ‘tiphwere vinthu vosi mwauneneska, pa masu paku Yehova, ndi pa masu pa ŵanthu.’ 22  Ndipuso nditikutumiziyani mubali widu limoza ndi yiwu, mweniyo tamuyesa mwakuwerezawereza ndipu wasanirika kuti ngwaphamphu pa vinthu vinandi, kweni sonu wachita phamphu ukongwa chifukwa chakuti watikugomezgani ukongwa. 23  Asani mukayikiya vakukwaskana ndi Tito, iyu ndi munyangu* kweniso wakugwira nayu ntchitu pakovya yimwi, pamwenga asani mukayikiya vakukwaskana ndi abali ŵidu, yiwu mbakutumika a mipingu kweniso mbunkhankhu waku Khristu. 24  Mwaviyo, longoni kuti mutiŵayanja ndipuso longoni mpingu chifukwa cho tingumalikiya vakukwaskana ndi yimwi.

Mazu Ngam'mphata

Pamwenga kuti, “mphasu zakuperekeka chifukwa cha chanju.”
Mazu ngaki chayingu, “iyu ngwakugaŵana nayu.”