2 Akorinto 6:1-18

  • Wezi ukulu waku Chiuta ungawanga paŵaka cha (1, 2)

  • Uteŵeti waku Paulo ukonkhoskeka (3-13)

  • Mungamangikanga cha mugoli lakupambana (14-18)

6  Pakuti tigwira ntchitu limoza ndi Chiuta, titikupemphani so kuti mungalondiyanga wezi ukulu waku Chiuta ndi kumbwita chilatu chaki cha.  Pakuti iyu wakamba kuti: “Mu nyengu yakuzomerezeka ndingukuvwisiya, ndipu mu zuŵa la utaski ndingukuwovya.” Awonani! Iyi ndi nyengu yakuzomerezeka. Awonani! Ili ndi zuŵa la utaski.  Tichita cha chinthu chechosi chakuguŵiska, kuti uteŵeti widu uleki kusanirika ndi chifukwa.  Kweni mu nthowa yeyosi titijisimikiziya taŵeni kuti te ateŵeti aku Chiuta. Tichita venivi mwakukunthiyapu vinthu vinandi, mwakukumana ndi masuzgu, mwakusoŵa vakukhumbika pa umoyu, mwakukumana ndi mawunononu,  mwakupumika, mwakuŵikika mujeri, mwakutichitiya vivulupi, mwakugwira ntchitu mwaphamphu, mwakuleka kugona usiku, mwakuja ndi nja.  Tichita so venivi mwakuja akutowa, mwakuja akuziŵa vinthu, mwakuzizipizga, mwakuja alisungu, mwakuja ndi mzimu wakupaturika, mwakuja ndi chanju chambula chinyengu,  mwakukamba uneneska, mwakugwiriskiya ntchitu nthazi zaku Chiuta; kuporote mu vidya vaurunji kujanja lamaryi* ndi kujanja lamazge,*  kuporote mu unkhankhu kweniso kuyuyulika, kukamba viheni vaku isi kweniso kulumbika. Ŵanthu atitiwona nge aboza kweni te aneneska,  nge ambula kuziŵika kweni tiziŵika, nge ŵanthu wo atufwa* kweni awonani! te amoyu, nge akulangika kweni titoleke ku nyifwa cha, 10  nge achitima kweni tikondwa nyengu zosi, nge akavu kweni tipereka chuma chinandi ku ŵanthu, nge ambula kanthu kweni te ndi vinthu vosi. 11  Talongoro namwi kwambula kubisa* yimwi Akorinto, ndipu tasanuzga mtima widu. 12  Chanju chidu ntchifinyi cha* kwaku yimwi, kweni chanju chinu ndichu chifinyi kwaku isi. 13  Sonu ndilongoro namwi nge ŵana ŵangu, kuti namwi so musanuzgi mitima yinu. 14  Mungamangikanga cha mugoli limoza ndi ŵanthu ambula kugomezga, chifukwa mwe akupambana. Pakuti pe kukoliyana wuli pakati pa urunji ndi kuleka kuvwiya marangu? Pamwenga pe ubali wuli pakati pa ukweru ndi mdima? 15  Kweniso pe kukoliyana wuli pakati paku Khristu ndi Beliyali?* Pamwenga pe kuyanana wuli pakati pa munthu wakugomezga* ndi wambula kugomezga? 16  Ndipu pe kukoliyana wuli pakati pa nyumba yakusopiyamu yaku Chiuta ndi angoza? Pakuti isi te nyumba yakusopiyamu yaku Chiuta wamoyu, nge mo Chiuta wakukambiya kuti: “Ndazamuja pakati pawu kweniso ndazamukwenda pakati pawu, ndazamuja Chiuta wawu ndipu yiwu azamuja ŵanthu ŵangu.” 17  “Yehova watiti, ‘Mwaviyo, tuwanipu pakati pawu ndipu mujipatuwi, kweniso lekani kukwaska kanthu kekosi kaunyakazi’”; “‘ndipu ndazakukulonderiyani.’” 18  “Yehova Wanthazizosi watiti, ‘Ini ndazamuja wusemwi ndipu yimwi mwazamuja ŵana ŵangu anthulumi ndi anthukazi.’”

Mazu Ngam'mphata

Panyaki vakwambiya ndewu.
Panyaki vakujivikiliya.
Pamwenga kuti, “ŵanthu akwenere kubayika.”
Mazu ngaki chayingu, “Tajula mulomu widu kuti tilongoro namwi.”
Pamwenga kuti, “malu ngafinyi cha mumitima yidu.”
Mazu yanga ngatuliya ku Chiheberi ndipu ngang’anamuwa kuti, “Chaŵakaŵaka.” Ngamiya Satana.
Pamwenga kuti, “wakugomezgeka.”