2 Akorinto 4:1-18

  • Kuŵala kwa uthenga wamampha (1-6)

    • Ambula kugomezga abulumutizgika maŵanaŵanu (4)

  • Chuma muviyaŵi vadongu (7-18)

4  Mwaviyo pakuti te ndi uteŵeti wenuwu chifukwa cha lisungu lo tikulongoleka, tiwere vuli cha.  Kweni tasiya vinthu vakuchitiska soni, vo vichitika mwakubisa, tichita cha vinthu mwauryarya pamwenga kutimbanyizga mazu ngaku Chiuta. Kweni pa masu paku Chiuta tilongo kuti te chakuwoniyapu chamampha ku njuŵi ya ŵanthu wosi mwakuchitiska kuti uneneska uwoneki.  Asani uthenga wamampha wo tipharazga ubenekereka, ndikuti ubenekereka ku ŵanthu wo anangika,  pakati paku ŵeniwo chiuta wa mugonezi wunu* wabulumutizga maŵanaŵanu nga ŵanthu ambula kugomezga, kuti kuŵala kwa* uthenga wamampha waunkhankhu wakukamba vaku Khristu yo ntchikozgu chaku Chiuta, kuleki kuŵaŵaliya.  Pakuti tipharazga vakukwaskana ndi taŵeni cha, kweni vakukwaskana ndi Yesu Khristu kuti ndi Mbuya kweniso kuti isi te akapolu ŵinu chifukwa chaku Yesu.  Pakuti Chiuta ndiyu wakukamba kuti: “Ukweru uŵali mu mdima,” ndipu iyu wambulika mumitima yidu kuti tiŵaŵaliyi ndi unkhankhu wa kuziŵa Chiuta, mwakugwiriskiya ntchitu chisku chaku Khristu.  Kweni te ndi chuma chenichi muviyaŵi vadongu, kuti nthazi yakujumpha yo tituŵa nayu, yingatuliyanga kwaku isi cha, kweni yituliyi kwaku Chiuta.  Tikandirizgika mu nthowa yeyosi, kweni tifinyikizika mpaka kutondeka kwenda cha. Timala zeru, kweni tisoŵe limu chakuchita cha.  Titombozgeka, kweni tijowoleka cha, tiwisikiya pasi, kweni tinangika cha. 10  Nyengu zosi mumaliŵavu ngidu, tikunthiyapu masuzgu ngakuti tingafwa nangu nge ngo Yesu wangukumana nangu, kuti umoyu waku Yesu nawu so uwoneke mumaliŵavu ngidu. 11  Pakuti isi amoyu, nyengu zosi tituŵa pa ngozi yakuti tingafwa chifukwa chaku Yesu, kuti umoyu waki uwoneke so mumaliŵavu ngidu ngo ngatufwa. 12  Mwaviyo nyifwa yigwira ntchitu kwaku isi, kweni kwaku yimwi, mbumoyu. 13  Sonu chifukwa te ndi mtima umoza wachivwanu, ndipu chivwanu chenichi ndichu chikulembeka kuti: “Ndenga ndi chivwanu, mwaviyo ndingulongoro”; nasi te ndi chivwanu, mwaviyo tilongoro, 14  chifukwa tiziŵa kuti Yo wakuyuska Yesu, wazamuyuska so isi nge mo wakuyuskiya Yesu, ndipu wazakutipereka limoza ndi yimwi. 15  Pakuti vosi ivi vichitika chifukwa chaku yimwi, kuti kusazgikiyaku kwa wezi ukulu ukongwa kusapaliyi, chifukwa anandi apemphera mwakuwonga ndipu venivi vichitiska kuti Chiuta wakankhuskiki. 16  Mwaviyo, tiwere vuli cha, kweni chinanga kuti munthu yo tili kubwalu wamala, kweni munthu yo tili mukati waja mufya zuŵa ndi zuŵa. 17  Pakuti chinanga kuti masuzgu* ngakujalisa cha ndipu ngapepu, ngatitiwovya kuti tije ndi unkhankhu wo ulutirizga kuja ukulu ukongwa* ndipu ngwamuyaya. 18  Venivi vichitika asani tileka kulereska pa vinthu vakuwoneka, kweni tilutirizga kulereska pa vinthu vambula kuwoneka. Pakuti vinthu vakuwoneka vakanyengu kamanavi, kweni vambula kuwoneka, vamuyaya.

Mazu Ngam'mphata

Pamwenga kuti, “nyengu yinu.” Wonani Mazu ngo Ngakonkhoskeka.
Pamwenga kuti, “ukweru wa.”
Pamwenga kuti, “mayeseru.”
Mazu ngaki chayingu, “wo ulutirizga kuzita.”