2 Akorinto 3:1-18

  • Makalata ngakusimikiziya (1-3)

  • Ateŵeti a phanganu lifya (4-6)

  • Unkhankhu wa phanganu lifya ngukulu ukongwa (7-18)

3  Kumbi tayamba so kujisimikiziya taŵeni? Pamwenga tikhumbika makalata ngakutisimikiziya kwaku yimwi pamwenga ngakutuliya kwaku yimwi, nge mo ŵanthu anyaki achitiya?  Yimwi ndimwi makalata ngakulembeka pamitima yidu, ngeningo ngaziŵika kweniso ngaŵerengeka ndi ŵanthu wosi.  Pakuti yimwi mwalongoleka kuti ndimwi kalata yaku Khristu, yakulembeka ndi isi nge ateŵeti ndipuso njakulembeka ndi inki cha, kweni ndi mzimu waku Chiuta wamoyu. Njakulembeka pamya cha, kweni pamnofu, kung’anamuwa kuti pamitima.  Te ndi chigomezgu chenichi kwaku Chiuta kuporote mwaku Khristu.  Isi pakutija te akwenere cha kuwona kuti vinthu vosi vituliya kwaku taŵeni, kweni Chiuta ndiyu watitiwona kuti te akwenere nadi.  Iyu ndiyu watitiwona kuti te akwenere nadi kuja ateŵeti a phanganu lifya, lakuchita kulembeka cha, kweni la mzimu, pakuti marangu ngakulembeka ngapereka cheruzgu cha nyifwa, kweni mzimu upaska umoyu.  Sonu asani marangu ngo ngapereka nyifwa ndipuso ngakuchita kulembeka pamya, ngakuza mwaunkhankhu viyo, mwakuti Ayisirayeli angutondeka kulereseska chisku chaku Mozesi chifukwa cha unkhankhu wo wenga pachisku chaki, unkhankhu wo wazimalanga,  kumbi kuperekeka kwa mzimu kungatondeka kulongo unkhankhu ukulu ukongwa?  Pakuti asani marangu ngakulembeka ngo ngapereka cheruzgu cha nyifwa ngenga ngaunkhankhu, ndikuti kuperekeka kwa urunji kuŵengi ndi unkhankhu ukulu ukongwa! 10  Ndipu chinanga ntchinthu cho pakwamba chenga ndi unkhankhu, chikulondeka unkhankhu wo chifukwa cha unkhankhu ukulu ukongwa. 11  Sonu asani chinthu cho chazituzgikangapu chinguza mwaunkhankhu, ndikuti unkhankhu wambula kumala wazamukuŵa ukulu ukongwa! 12  Chifukwa chakuti te ndi chilindizga chenichi, tilongoro ndi wanangwa ukulu ukongwa, 13  ndipu tichita cha vo Mozesi wanguchita, pakuti iyu wangudika salu kumasu kuti Ayisirayeli aleki kulereska kumala kwa chinthu cho chazituzgikangapu. 14  Maŵanaŵanu ngawu ngangubulumutizgika. Pakuti mpaka msanawale, salu yeniyi yilutirizga kuja yambula kubenulika asani phanganu lakali liŵerengeka, chifukwa yituzgikapu mwakugwiriskiya ntchitu Khristu pe. 15  Ndipu mpaka msanawale, nyengu yeyosi yo vakulemba vaku Mozesi viŵerengeka, salu yeniyi yibenekere mitima yawu. 16  Kweni asani munthu wang’anamukiya kwaku Yehova, salu yo yibenulika. 17  Sonu Yehova ndi Mzimu, ndipu po pe mzimu waku Yehova pe wanangwa. 18  Ndipu isi tosi tilongo unkhankhu waku Yehova nge gilasi, chifukwa tabenulika salu kumasu ndipuso tasinthika kuja mu chikozgu chaki, kutuwa pa unkhankhu unyaki kufika pa unyaki, ndendende nge mo watisinthiya Yehova, yo ndi Mzimu.*

Mazu Ngam'mphata

Panyaki kuti, “nge mo uchitiya mzimu waku Yehova.”