1 Yohane 4:1-21

  • Kwesa mazu ngakukambirika (1-6)

  • Kuziŵa kweniso kwanja Chiuta (7-21)

    • “Chiuta ntchanju” (8, 16)

    • Mu chanju mulivi mantha (18)

4  Akwanjiwa, ndi mazu ngosi cha ngakukambirika ngo* mutenere kungagomezga, kweni mungayesengi dankha kuti muwoni asani ngakutuliya nadi kwaku Chiuta, pakuti achimi anandi aboza asere mucharu.  Nthowa yo tingaziŵiya kuti mazu ngakukambirika ngatuliya kwaku Chiuta, ndi iyi: Mazu ngakumbirika ndi Chiuta ngengosi ngazomerezengi kuti Yesu Khristu wanguza mu liŵavu kutuwa kwaku Chiuta.  Kweni mazu ngakukambirika ngengosi ngo ngaleka kuzomereza Yesu, ngakutuliya kwaku Chiuta cha. Ndipuso mazu ngenanga, nga ŵanthu akususka Khristu, ŵeniwo munguvwa kuti atuza, ndipu sonu ŵe mucharu kali.  Mwaŵana, yimwi mwe akutuliya kwaku Chiuta, ndipu mwaŵathereska, chifukwa yo wakoliyana ndi yimwi, ndi mukulu kuluska yo wakoliyana ndi charu.  Yiwu mbakutuliya kucharu ndichu chifukwa chaki alongoro vakutuliya kucharu ndipu charu chitiŵavwiya.  Isi te akutuliya kwaku Chiuta. Weyosi yo waziŵa Chiuta watitivwiya; weyosi yo waleka kutuliya kwaku Chiuta, watitivwiya cha. Venivi ndivu vititiwovya kupambanisa pakati pa mazu ngakukambirika ngauneneska ndi mazu ngakukambirika ngaboza.  Akwanjiwa, tiyeni tilutirizgi kwanjana chifukwa chanju chituliya kwaku Chiuta, ndipu weyosi yo we ndi chanju ngwakutuliya kwaku Chiuta ndipuso waziŵa Chiuta.  Weyosi yo walivi chanju watimuziŵa cha Chiuta, pakuti Chiuta ntchanju.  Chanju chaku Chiuta chivumbulika kwaku isi, kuti Chiuta wangutumiza Mwana waki wapade mucharu kuti isi tisaniyi umoyu kuporote mwaku iyu. 10  Chanju chaki ching’anamuwa kuti isi ndisi tikwanja Chiuta cha, kweni iyu ndiyu wakwanja isi ndipu wangutumiza Mwana waki nge sembi yakupepese maubudi ngidu.* 11  Akwanjiwa, asani Chiuta watitiyanja viyo, ndikuti isi nasi titenere kwanjana. 12  Palivi munthu yo wakuwonapu Chiuta. Asani tilutirizga kwanjana, Chiuta walutirizga kuja mwaku isi ndipuso chanju chaki chifiskika mwaku isi. 13  Chifukwa chakuti wakutipaska mzimu waki, tiziŵa kuti tilutirizga kukoliyana ndi iyu, ndipuso kuti iyu ngwakukoliyana ndi isi. 14  Ndipuso isi taŵeni tawona ndipuso tijaliya ukaboni kuti Ada akutuma Mwana wawu nge Mtaski wa charu. 15  Weyosi yo wazomereza kuti Yesu ndi Mwana waku Chiuta, Chiuta walutirizga kukoliyana nayu munthu waviyo, ndipu iyu nayu wakoliyana ndi Chiuta. 16  Ndipu isi taziŵa kweniso tagomezga chanju cho Chiuta we nachu kwaku isi. Chiuta ntchanju, ndipu munthu yo walutirizga kuja ndi chanju, walutirizga so kukoliyana ndi Chiuta, ndipu Chiuta nayu walutirizga kukoliyana nayu. 17  Mu nthowa yeniyi chanju chafiskika mwaku isi kuti tizije ndi wanangwa wakulongoro* mu zuŵa la cheruzgu, chifukwa nge mo iyu waliri, ndimu so nayu waliri mucharu ichi. 18  Mu chanju mulivi mantha, kweni chanju chakufikapu chituzgapu mantha, chifukwa mantha ngatitichitiska kuja akumangika. Kukamba uneneska, mweniyo we ndi mantha, we ndi chanju chakufikapu cha. 19  Te ndi chanju chifukwa iyu ndiyu wangwamba kutiyanja. 20  Asani munthu wakamba kuti, “Nditanja Chiuta,” kweni watinkha mubali waki, ngwaboza. Pakuti munthu yo waleka kwanja mubali waki mweniyo watimuwona, wangamuyanja cha Chiuta mweniyo waleka kumuwona. 21  Ndipu te ndi dangu ili lakutuliya kwaku iyu, lakuti weyosi yo watanja Chiuta, watenere so kwanja mubali waki.

Mazu Ngam'mphata

Mazu ngaki chayingu, “ndi mzimu wewosi cha wo.”
Pamwenga kuti, “sembi yakubenekere maubudi ngidu; nthowa yakuzikisiya mtima.”
Pamwenga kuti, “tizije ndi chiganga.”