1 Yohane 2:1-29

  • Yesu ndi sembi yakupepese (1, 2)

  • Kusunga marangu ngaku Chiuta (3-11)

    • Dangu lakali kweniso lifya (7, 8)

  • Vifukwa vakulembe kalata (12-14)

  • Mungayanjanga charu cha (15-17)

  • Kutcheŵeska vakukwaskana ndi ŵanthu akususka Khristu (18-29)

2  Mwaŵana akwanjiwa, nditikulembiyani vinthu venivi kuti muleki kuchita ubudi. Kweni asani munyaki wachita ubudi, te ndi wakovya* murunji yo ndi Yesu Khristu mweniyo we kwa Ada.  Iyu ndi sembi yakupepese* maubudi ngidu, ngidu pe cha, kweni yakupepese so maubudi nga charu chosi.  Ndipu asani tilutirizga kusunga marangu ngaki, tilongo kuti tamuziŵa.  Munthu yo wakamba kuti, “Ndamuziŵa,” kweni wasunga cha marangu ngaki, ngwaboza, ndipu mwaku iyu mulivi uneneska.  Kweni mweniyo wasunga mazu ngaki, munthu mwenuyu watanja nadi Chiuta mwakufikapu. Ndipu asani tichita venivi, tilongo kuti te akukoliyana ndi iyu.  Mweniyo wakamba kuti walutirizga kukoliyana ndi iyu, watenere kulutirizga kwenda nge mo iyu wayendiyanga.  Akwanjiwa, nditikulembiyani dangu lifya cha, kweni dangu lakali lo mwaja nalu kutuliya pakwamba. Dangu* lakali lenili, ndi mazu ngo mukuvwa.  Nditikulembiyani so dangu lifya, lenilo ndauneneska kwaku iyu ndi kwaku yimwi, chifukwa mdima uluta, ndipu ukweru wauneneska wayamba kali kuŵala.  Mweniyo wakamba kuti we mu ukweru kweni watinkha mubali waki, weche mu mdima. 10  Mweniyo watanja mubali waki walutirizga kuja mu ukweru, ndipu mwaku iyu mulivi chifukwa chechosi chakumuguŵiska. 11  Kweni mweniyo watinkha mubali waki, we mu mdima ndipu watenda mu mdima, kweniso ko waluta waziŵaku cha, chifukwa mdima wabulumutizga masu ngaki. 12  Mwaŵana, nditikulembiyani pakuti maubudi nginu ngagowokereka chifukwa cha zina laki. 13  Nditikulembiyani yimwi mwaŵada, chifukwa mwamuziŵa mweniyo wakuŵapu kutuliya pakwamba. Ndilembe yimwi anyamata, chifukwa mwamuthereska muheni yo. Ndilembe yimwi mwaŵana, chifukwa mwaziŵa Ada. 14  Ndilembe yimwi mwaŵada, chifukwa mwamuziŵa mweniyo wakuŵapu kutuliya pakwamba. Ndilembe yimwi anyamata chifukwa mwe ndi nthazi ndipu mazu ngaku Chiuta ngalutirizga kuja mwaku yimwi, kweniso mwathereska muheni yo. 15  Mungayanjanga charu cha pamwenga vinthu vamucharu. Asani munyaki watanja charu ndikuti watanja Ada cha; 16  chifukwa chechosi cha mucharu, kwali ndi khumbiru la liŵavu, khumbiru la masu kweniso kujiwonesa ndi vinthu vo munthu we navu pa umoyu,* vituliya kwa Ada cha, kweni kucharu. 17  Ndipuso charu ndi khumbiru laki viluta, kweni munthu yo wachita khumbu laku Chiuta, waŵengeku mpaka muyaya. 18  Mwaŵana, ili ndi ora lakumaliya, ndipu nge mo mwavwiya, wakususka Khristu watuza, ndipuso chinanga ndi sonu panu, akususka Khristu mbanandi. Ndipu venivi vititisimikiziya kuti ili ndi ora lakumaliya. 19  Yiwu akutuwaku kwaku isi chifukwa ŵenga anyidu cha,* pakuti akaŵengi anyidu atingi alutirizgengi kuja ndi isi. Kweni akutuwaku kuti viziŵiki kuti ndi wosi cha wo mbanyidu. 20  Ndipuso mukusankhika ndi wakupaturika, ndipu yimwi mosi muziŵa. 21  Nditikulembiyani chifukwa chakuti muleka kuziŵa uneneska cha, kweni chifukwa chakuti mutiwuziŵa ndipuso pakuti palivi boza lo lituliya mu uneneska. 22  Kumbi waboza ndiyani kuleka yo wakana kuti Yesu ndi Khristu? Mwenuyu ndiyu wasuska Khristu, mweniyo wakana Ada ndi Mwana. 23  Weyosi yo wakana Mwana, walivi so Ada. Kweni weyosi yo wazomera Mwana, we ndi Ada so. 24  Kweni yimwi, vo mukuvwa kutuliya pakwamba, vilutirizgi kuja mwaku yimwi. Asani vo munguvwa kutuliya pakwamba vilutirizga kuja mwaku yimwi, ndikuti mulutirizgengi kukoliyana ndi Mwana kweniso Ada. 25  Kweniso cho iyu wakutilayizga, mbumoyu wamuyaya. 26  Nditikulembiyani vinthu venivi chifukwa ŵanthu anyaki akhumba kukulandizgani. 27  Kweni yimwi, kusankhika ko mukusankhika ndi iyu, kulutirizga kuja mwaku yimwi, ndipu mukhumbika so munthu weyosi cha kuti wakusambizeni; kweni kusankhika ndi iyu, kutikusambizani vinthu vosi, ndipu nkhwauneneska, nkhwaboza cha. Nge mo kutikusambiziyani, lutirizgani kuja akukoliyana ndi iyu. 28  Mwaviyo, mwaŵana, lutirizgani kukoliyana ndi iyu kuti po wazamuwoneke, tizije ndi wanangwa wakulongoro, tingazimuthaŵanga cha chifukwa cha soni pa nyengu ya kuŵapu kwaki. 29  Asani muziŵa kuti iyu ndi murunji, ndikuti muziŵa so kuti weyosi yo wachita vinthu mwaurunji, ngwakutuliya kwaku iyu.

Mazu Ngam'mphata

Pamwenga kuti, “wakutimiya.”
Pamwenga kuti, “sembi yakubenekere; nthowa yakuzikisiya mtima.”
Wonani Mazu ngo Ngakonkhoskeka.
Pamwenga kuti, “kujitumbwa ndi katundu yo munthu wenayu.”
Pamwenga kuti, “ŵenga ŵidu cha.”